މި އަހަރުގެ ހައްޖުގެ މަތިވެރި އަޅުކަން ރަސްމީކޮށް ހޯމަ ދުވަހު ފެށުނުއިރު، ބޭރު ގައުމުތަކުން 1.5 މިލިއަނަށް ވުރެ ގިނަ ހައްޖުވެރިން ސައުދީ އަރަބިއްޔާއަށް ގޮސްފައިވާ ކަމަށް އެ ގައުމުގެ ކަމާބެހޭ އިދާރާތަކުން ބުނެފި އެވެ.

ސައުދީގެ ހައްޖު ޕާސްޕޯޓް ފޯސްގެ ކޮމާންޑަރު ސާލިހް ބިން ސައުދު އަލް މުރައްބާ ވިދާޅުވި ގޮތުގައި ވައިގެ މަގާއި ކަނޑު މަގުން އަދި އެއްގަމު މަގުން ސައުދީއަށް އެތެރެވި ބޭރުގެ ހައްޖުވެރިންގެ އަދަދު މިހާރު ވަނީ 1.5 މިލިއަނަށް ވުރެ މައްޗަށް އަރާފަ އެވެ.

އިގްތިސޯދީ އަދި ސިޔާސީ ގޮންޖެހުންތަކުގެ ތެރެއިން މި އަހަރުގެ ހައްޖު މޫސުން ކުރިމަތިވެފައި ވަނީ އެ ސަރަހައްދަށް ނުތަނަވަސްކަން ބޮޑުވެފައިވާ ދަނޑިވަޅެއްގަ އެވެ. ހާއްސަކޮށް، މެދުއިރުމަތީގެ ހަނގުރާމައާ ގުޅިގެން އުފެދުނު ޖިއޯޕޮލިޓިކަލް ނުތަނަވަސްކަމުގެ ސަބަބުން ވެސް ހައްޖުގެ އަޅުކަމަށް އޮތް ޝައުގުވެރިކަން ކުޑަނުވާކަން ކަމާ ބެހޭ ފަރާތްތަކުން ފާހަގަކުރެ އެވެ.

https://www.instagram.com/reel/DYwOx5CNHR_/?utm_source=ig_web_copy_link

ސައުދީގެ އޮފިޝަލުން ވިދާޅުވާ ގޮތުގައި، މިހާ ގިނަ އަދަދެއްގެ މީހުން އެއްފަހަރާ ޖަމާވަމުން ދާއިރު، ހައްޖުވެރިންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އެންމެ ޒަމާނީ ވަސީލަތްތަކާއެކު ސަލާމަތީ ބާރުތަކުން ދަނީ ތައްޔާރީ ހާލަތެއްގައި ހަރަކާތްތެރި ވަމުންނެވެ.

ހައްޖުގެ މުހިންމު ދުވަސްތައް ކުރިއަށް ދާއިރު، މައްކާގެ މަސްޖިދުލް ހަރާމާއި މުގައްދަސް ބިންތަކުގައި ހައްޖުވެރިންނަށް ބޭނުންވާ ހިދުމަތްތައް ފޯރުކޮށްދިނުމުގައި ސައުދީގެ އެތައް ހާސް މުވައްޒަފުންނެއް ދަނީ ރެއާ ދުވާލު މަސައްކަތް ކުރަމުންނެވެ.