މާވެލް ސިނެމެޓިކް ޔުނިވާސްގެ 2019 ވަނަ އަހަރުގެ މަގުބޫލު ފިލްމު "އެވެންޖާސް: އެންޑްގޭމް" އަލުން ސިނަމާތަކުގައި ދައްކަން ފެށުމާއެކު، ހޮލީވުޑްގެ ބޮޑެތި ތަރިން ކަމަށްވާ ބްރެޑް ޕިޓް އާއި ރޮބަޓް ޕެޓިންސަންގެ އައު ފިލްމުތައް ބޮކްސް އޮފީހުގައި ފަހަތަށް ޖައްސާލައި ޗާޓުތަކުގެ އެއްވަނައަށް އަރައިފި އެވެ.

"އެވެންޖާސް: އެންޑްގޭމް އެންކޯ"އިން ވަނީ މި ހަފްތާ ބަންދުގައި މުޅި ދުނިޔެއިން މުޅި ޖުމްލަ 86 މިލިއަން އެމެރިކާ ޑޮލަރުގެ އާމްދަނީއެއް ހޯދާފަ އެވެ.

މީގެ ތެރެއިން 26 މިލިއަން ޑޮލަރު އުތުރު އެމެރިކާގެ ސިނަމާތަކުން ލިބުނުއިރު، ބޭރުގެ މާކެޓްތަކުން ވަނީ 60 މިލިއަން ޑޮލަރު ލިބިފަ އެވެ. މި އައު އާމްދަނީއާއެކު "އެވެންޖަރސް: އެންޑްގޭމް"ގެ މުޅި ޖުމްލަ އާމްދަނީ ވަނީ 2.88 ބިލިއަން ޑޮލަރަށް އަރާފަ އެވެ.

މި ފިލްމާއެކު މިހާރު ސިނަމާތަކުގައި ދައްކަމުން އަންނަ ބްރެޑް ޕިޓް މުހިންމު ރޯލުން ފެންނަ، ޑޭވިޑް އޭޔާ ޑައިރެކްޓް ކޮށްފައިވާ ސަވައިވަލް ތްރިލާ "ހާޓް އޮފް ދަ ބީސްޓް"އަށް މުޅި ދުނިޔެއިން ލިބުނީ 50.1 މިލިއަން ޑޮލަރެވެ. މީގެ ތެރެއިން އުތުރު އެމެރިކާއިން 20 މިލިއަން ޑޮލަރު ލިބިގެން ފިލްމު އުޅެނީ ތިންވަނައިގަ އެވެ.

އެއާއެކު ރޮބަޓް ޕެޓިންސަން ކުޅެފައިވާ ކްރައިމް ތްރިލާ "ޕްރައިމްޓައިމް"އަށް އުތުރު އެމެރިކާއިން 19.2 މިލިއަން ޑޮލަރުގެ އާމްދަނީއެއް ލިބިގެން އުޅެނީ ހަތަރުވަނައިގަ އެވެ. 15 މިލިއަން ޑޮލަރުގެ ކުޑަ ބަޖެޓަކުން އުފެއްދި މި ފިލްމަށް ވަނީ ބޮޑު ތަރުހީބެއް ލިބިފަ އެވެ. "ރެޒިޑެންޓް އީވިލް" ވަނީ 23.3 މިލިއަން ޑޮލަރާއެކު ދެވަނަ މަގާމު ހޯދާފަ އެވެ.

މާވެލްއިން "އެވެންޖާސް: އެންޑްގޭމް" އަލުން ސިނަމާތަކަށް ނެރުނީ ކުރިއަށް އޮތް "އެވެންޖާސް: ޑޫމްސްޑޭ" ފިލްމުގެ ހާއްސަ މަންޒަރުތަކަކާއި ނުފެންނަ ބައެއް މަންޒަރުތައް ހިމަނައިގެންނެވެ.

މީގެ އިތުރުން މުޅި ދުނިޔޭގެ އެންމެ އާމްދަނީ ބޮޑު ފިލްމުގެ މަގާމުގައި އޮތް "އެވެޓާ" (2.92 ބިލިއަން ޑޮލަރު)ގެ ރެކޯޑު މުގުރާލުމާވެސް އެންޑްގޭމް މިހާރު ވަނީ ވަރަށް ގާތަށް ޖެހިލާފަ އެވެ.