އާންމުގޮތެއްގައި ސްޓްރޯކް ޖެހުމަކީ އުމުރުން ދުވަސްވީ މީހުންނަށް ކުރިމަތިވާ ސިއްހީ މައްސަލައެއްގެ ގޮތުގައި ބެލެވުނު ނަމަވެސް، ފަހުގެ ދިރާސާއަކުން ހާމަވި ގޮތުގައި ޒުވާނުންނާއި މެދުއުމުރުގެ މީހުންގެ މެދުގައި ސްޓްރޯކް ޖެހޭ މިންވަރު ފާއިތުވި 30 އަހަރު ތެރޭގައި ވަނީ ގާތްގަނޑަކަށް ދެގުނައަށް އިތުރުވެފަ އެވެ.
އެމެރިކަން އެކެޑެމީ އޮފް ނިއުރޯލޮޖީގެ ސައިންޓިފިކް ޖާނަލް "ނިއުރޯލޮޖީ" ގައި ޝާއިއުކޮށްފައިވާ މި ދިރާސާގައިވާ ގޮތުން، އުމުރުން 20 އަހަރާއި 54 އަހަރާ ދެމެދުގެ މީހުންގެ މެދުގައި ސްޓްރޯކް ޖެހޭ މިންވަރު ވަނީ ނިސްބަތުން އިންތިހާއަށް އިތުރުވެފަ އެވެ.
ސިންސިނާޓީ ޔުނިވާސިޓީގެ މެޑިކަލް ދިރާސާވެރިން އިސް ނަގައިގެން ކުރިއަށްގެންދިޔަ މި ދިރާސާއިން ދައްކާ ގޮތުގައި، 1993 ވަނަ އަހަރާ އަޅާބަލާއިރު މިހާރު ޒުވާނުންގެ މެދުގައި ސްޓްރޯކްގެ ނުރައްކާ އޮތީ މީގެ ކުރިން މިން ކުރެވުނު މިންވަރަށްވުރެ މާ މަތީގަ އެވެ.
ނުރައްކާ އިތުރުވާ މުހިންމު ސަބަބުތައް
ސިއްހީ މާހިރުން ބުނާ ގޮތުގައި ޒުވާނުންގެ މެދުގައި ސްޓްރޯކް އިތުރުވަމުންދަނީ ދިރިއުޅުމުގެ އާދަކާދައާއި ސިއްހީ އެކި މައްސަލަތައް ޒުވާން އުމުރުގައި ކުރިމަތިވާ މިންވަރު އިތުރުވުމުގެ ސަބަބުންނެވެ. މީގެ ތެރޭގައި ހިމެނެނީ:
- ލޭމައްޗަށް ދިއުމާއި ކޮލެސްޓްރޯލް މަތިވުން: ޒުވާން އުމުރުގައި ލޭގެ ޕްރެޝަރު މަތިވުމާއި ކޮލެސްޓްރޯލް މަތިވުން ދެނެގަނެވި، އެކަމަށް އެކަށީގެންވާ ފަރުވާ ނުހޯދުން.
- ބަރުދަން އިތުރުވުން: ދިރިއުޅުމުގެ އާދަކާދައަށް އައި ބަދަލުތަކާއެކު ކެއިންބުއިމުގެ ނުބައި އާދަތަކުގެ ސަބަބުން ހަށިގަނޑުގެ ބަރުދަން އިތުރުވުން.
- ހަރަކާތްތެރިކަން ކުޑަވުން: ކަސްރަތު ނުކުރުމާއި، ގިނަ ވަގުތު އިށީނދެގެން އިނުމުގެ އާދަ އަދި ސްޓްރެސް އިތުރުވުން.
ސްޓްރޯކްގެ އަލާމާތްތައް ދެނެގަތުން (F.A.S.T.)
ސްޓްރޯކެއް ޖެހޭ ވަގުތު އަވަހަށް ފަރުވާ ދިނުމަކީ އޭގެ ސަބަބުން ލިބޭ މުޅި އުމުރުގެ ނުކުޅެދުންތެރިކަމުން ސަލާމަތްވުމަށް އޮތް އެންމެ މުހިންމު މަގެވެ. އެކަމަށްޓަކައި F.A.S.T. ގެ އުސޫލުން އަލާމާތްތައް ދެނެގަތުން މުހިއްމެވެ.
- F (Face - މޫނު): މޫނުގެ އެއްފަރާތް ވާގިނެތިގެން ތިރިއަށް އެލުން.
- A (Arms - އަތް): ދެއަތް މައްޗަށް ނެގުމަށް އުނދަގޫވުން ނުވަތަ އެއްއަތުން ބާރު ދޫވުން.
- S (Speech - ވާހަކަދެއްކުން): ވާހަކަ ދައްކަން އުނދަގޫވުން ނުވަތަ އަޑު ސާފު ނުވުން.
- T (Time - ވަގުތު): މިފަދަ އަލާމާތެއް ފެނިއްޖެނަމަ ލަސްނުކޮށް އަވަސް ފަރުވާގެ ސިއްހީ އެހީތެރިކަން ހޯދުން.
ޑޮކްޓަރުން އިރުޝާދު ދެއްވަނީ ޒުވާން އުމުރުގައިވެސް ހިތުގެ ސިއްހަތަށާއި ލޭގެ ދައުރުވުމަށް ސަމާލުކަންދީ، ގަވާއިދުން ސިއްހީ ޗެކަޕް ހެދުމަށެވެ.
އެއާއެކު ދުންފަތުގެ އިސްތިއުމާލު ކުރުމުން ދުރުހެލިވެ، ސިއްހަތަށް ފައިދާހުރި ކާނާ ބޭނުން ކުރުމަކީ ޒުވާން އުމުރުގައި ސްޓްރޯކް ޖެހުމުގެ ނުރައްކަލުން ރައްކާތެރިވުމަށް ކުރެވިދާނެ އެންމެ މުހިންމު ކަންކަމެވެ.
