މާލެ ސަރަހައްދުގައި އިޙުސާސް ކުރެވޭ ފިނިހޫނުމިން 39.2 ޑީގްރީ ސެލްސިއަސްއަށް އަރައިފި އެވެ. މިއީ މާލޭ ސަރަހައްދުގެ ފާއިތުވި ދުވަސްތަކުގައި ފިނިހޫނުމިން މިހާ މައްޗަށް އެރި ފުރަތަމަ ފަހަރެވެ.

މޫސުމާބެހޭ ގައުމީ އިދާރާއިން ބުނީ މިއަދަކީ މާލެ ސަރަހައްދަށް އާދަޔާ ހިލާފަށް ހޫނުގަދަ ދުވަހެއް ކަމަށެވެ. އެގޮތުން މާލެ ސަރަހައްދުގައި އިހުސާސްކުރެވޭ ފިނިހޫނުމިން ހުރީ 39.2 ޑީގްރީ ސެލްސިއަސްގައި ކަމަށް އެ އިދާރާއިން ބުނެ އެވެ.

މާލޭ ސަރަހައްދުގެ އިޙުސާސްކުރެވޭ ފިނިހޫނުމިން މަތިވެފައިވާއިރު، ބައެއް އަތޮޅުތަކުގައި ވެސް އިހުސާސްކުރެވޭ ފިނިހޫނުމިން ވަނީ މައްޗަށް އަރާފަ އެވެ. އެގޮތުން ލ. ކައްދޫގައި އިޙުސާސްކުރެވޭ ފިނިހޫނުމިން 37.4 ޑިގްރީ ސެލްސިއަސްގައި ހުރިއިރު، ހދ. ހަނިމާދޫގައި އިހުސާސްކުރެވޭ ފިނިހޫނުމިން ހުރީ 37.2 ޑިގްރީ ސެލްސިއަސްގައި ކަމަށް އެ އިދާރާއިން ބުނެ އެވެ.

މޫސުމާބެހޭ ގައުމީ އިދާރާއިން ބުނީ އެހެން ސަރަހައްދުތަކުގެ އިހުސާސްކުރެވޭ ފިނިހޫނުމިން ހުންނާނީ އާދައިގެ ވަރަކަށް ކަމަށެވެ. އެގޮތުން ނ. މާފަރުގައި އިޙުސާސްކުރެވޭ ފިނިހޫނުމިން 36.1 ޑިގްރީ ސެލްސިއަސް، ގދ. ކާޑެއްދޫގައި އިޙުސާސްކުރެވޭ ފިނިހޫނުމިން 36.3 ޑިގްރީ ސެލްސިއަސް، އަދި އައްޑޫ އަތޮޅު ގަމުގައި އިޙުސާސްކުރެވޭ ފިނިހޫނުމިން 35.6 ޑިގްރީ ސެލްސިއަސްގައި ހުންނާނެ ކަމަށް އެ އިދާރާއިން ބުނެ އެވެ.

ހޫނު ގަދަވުމުން ދިމާވެދާނެ ބައެއް ސިއްހީ މައްސަލަތައް:

  • ވަރުދެރަވުން
  • އަކުނިވަޔަށްދެމުން
  • ބޮލުގައި ރިއްސައި ބޯއެނބުރުން
  • ހަށިގަނޑުގައި ފެންމަދުވުން
  • ލޮލަށް ލިބޭ ގެއްލުން
  • ހަންގަނޑު އެނދުމުގެ ސަބަބުން ހަންގަނޑު ރަތްވެ، ފޮޅުނެގުން އަދި ކުދި ރަތް ބިހި ނެގުން

ހޫނުން ރައްކާތެރިވުމަށް ކުރެވިދާނެ ކަންކަން:

  • ބޭރަށްދާއިރު ކުޑަ ބޭނުންކުރުން
  • ކުލަމަޑު އަދި ހަށިގަނޑު ނިވާވާފަދަ ދޫހެދުން ލުން
  • ބޯ ނިވާވާނެފަދަ ފުޅާ ތޮތްޕެއް ބޭނުންކުރުން
  • އަވީގައި އުޅޭއިރު ސަންލޯޝަން ބޭނުންކުރުން
  • ހަށިގަނޑުން ފެން މަދުވިޔަނުދިނުމަށް ކަރުނު ހިއްކި ނަމަވެސް ގިނައިން ފެން ބުއިން
  • ރޯދަ ވީއްލުމުގައި ފެން ގިނައިން ހިމެނޭ މޭވާ ބޭނުން ކުރުން
  • އަވިއައިނު އެޅުން
  • ހަށިގަނޑުން ފެން ބޭރުވިޔަ ނުދިނުމަށް ހަކުރު އެކުލެވޭ ބުއިންތައް މަދުކުރުން

ހޫނު ގަދަ ވަގުތު ތަކުގައި ކުޑަކުދިން ބޭރަށް ނުގެންދިއުމަށް ސަމާލުކަން ދޭންޖެހެ އެވެ. އަދި ކޮންމެހެން ބޭރަށް ދާންޖެހިއްޖެ ހާލަތެއްގައި ވެސް ރައްކާތެރިކަމުގެ ފިޔަވަޅު އަޅާ ހޫނުގަދަ ވަގުތުގައި ބޭރުގަ އުޅޭވަގުތު މަދުކުރަންވާނެ އެވެ. ތުއްތު ކުއްޖާއަށް ގިނައިން ދިޔާތަކެއްޗާއި ފެން ދިނުމަށް ސަމާލުވާން ޖެހެ އެވެ.