Flydubai hamalaa: Iran ge baiverivun oiynama varugadha radhdheh dheyne kamuge inzaaru

އިޒްރޭލަށް ދަތުރުކުރި ފްލައިދުބާއީގެ ފްލައިޓެއްގެ ޕައިލެޓަށް ދިން ހަމަލާއާ އީރާނާ ގުޅުމެއްވާކަން ސާބިތުވެއްޖެނަމަ، އެ ގައުމަށް ވަރަށް ވަރުގަދަ ހަމަލާތަކެއް ދޭނެކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ދެއްވައިފި އެވެ.

މިދިޔަ ބުދަ ދުވަހު ހިނގި މި ނުރައްކާތެރި ހާދިސާގައި، ބޯޓު ވެއްޓުނަނުދީ ސަލާމަތްކުރުމަށް ފަސިންޖަރުން ވަނީ އެހީތެރިވެދީފަ އެވެ. މި ހާދިސާއާ ގުޅިގެން ބޯޓު ވަނީ ސައުދީ އަރަބިއްޔާއަށް ކުއްލި ހާލަތުގައި ޖައްސާފަ އެވެ.

އެމެރިކާގެ ރައީސް މި އިންޒާރު ދެއްވިއިރު، މި ހާދިސާއަކީ ޓެރަރިޒަމާ ގުޅުންހުރި ކަމެއްތޯ ބެލުމަށް ޔޫއޭއީން ވަނީ ތަހުގީގެއް ފަށާފަ އެވެ. އަދި މި ހަމަލާ ދިން ކަމަށް ތުހުމަތުކުރެވޭ މީހާއަކީ ހަރުކަށި ފިކުރުގެ މީހެއް ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ވިދާޅުވެފަ އެވެ.

ދުބާއީން ތެލްއަވީވަށް ދަތުރުކުރި މި ފްލައިޓްގެ ހާދިސާގައި އީރާނުގެ ބައިވެރިވުމެއް އޮތްތޯ ވައިޓް ހައުސްގައި ނޫސްވެރިން ސުވާލުކުރުމުން ޓްރަމްޕް ވިދާޅުވީ، މިހާތަނަށް ލިބިފައިވާ މައުލޫމާތަށް ބަލާއިރު އެކަމުގެ ފުރުސަތު އެބައޮތް ކަމަށާއި، ނަމަވެސް އެކަން އިތުރަށް ބަލަމުންދާ ކަމަށެވެ.

އީރާނުގެ ބައިވެރިވުމެއް އޮތްކަން ސާބިތުވެއްޖެނަމަ އެމެރިކާއިން ރައްދު ދޭނެތޯ ސުވާލުކުރުމުން ޓްރަމްޕް ވިދާޅުވީ، އެމީހުންނަށް ވަރަށް ވަރުގަދަ ހަމަލާއެއް ދޭނެ ކަމަށެވެ.

ޓްރަމްޕްގެ މި އިންޒާރު އައިސްފައިވަނީ އެ ސަރަހައްދުގައި އެމެރިކާގެ އަސްކަރީ ބާރު ގަދަކުރަމުންދާ ދަނޑިވަޅެއްގަ އެވެ. އެމެރިކާގެ މީޑިއާ ރިޕޯޓްތައް ބުނާގޮތުން، އެމެރިކާގެ މަނަވަރު 'ޔޫއެސްއެސް ތިއޮޑޯ ރޫޒަވެލްޓް' އާއި އޭގެ ފްލީޓް މިހާރު ދަނީ މެދުއިރުމައްޗަށް ދަތުރުކުރަމުންނެވެ.

މި ހާދިސާ ހިނގި ގޮތުގެ ތަފްސީލު ހޯދުމަށް ޔޫއޭއީ އާއި ސައުދީ އަރަބިއްޔާއިން ދަނީ ގުޅިގެން މަސައްކަތް ކުރަމުންނެވެ. ސައުދީ އަރަބިއްޔާއިން ބުނި ގޮތުގައި، ކޯ-ޕައިލެޓް ވަނީ ޔޫއޭއީގެ ސަލާމަތީ ޓީމަކާ ހަވާލުކޮށްފަ އެވެ. ފުރަތަމަ ތަހުގީގުން އެނގޭ ގޮތުގައި އޭނާ ވަނީ ބޯޓުގެ ކެޕްޓަނަށް ހަމަލާދީފަ އެވެ.

މި ހަމަލާއާ ގުޅިގެން ބޯޓުގެ ކޮންޓްރޯލް ހޯދުމަށް ބޮޑު ހަމަނުޖެހުމެއް ހިނގާފައިވެ އެވެ. ބޯޓު ސައުދީއަށް ޖެއްސުމަށްފަހު، ފަސިންޖަރުން ވަނީ އެހެން ފްލައިޓެއްގައި އިޒްރޭލަށް ގެންގޮސްފަ އެވެ.

ޓީވީ ޝޯއެއްގައި ވާހަކަދައްކަވަމުން ނަތަންޔާހޫ ވިދާޅުވީ، ކޯ-ޕައިލެޓަކީ ހަރުކަށި ފިކުރުގެ މީހެއް ކަމަށެވެ. އަދި އޭނާ ބޯޓުގެ ފަޅުވެރިންނާ މުހާތަބުކޮށް "އަހަރެން މަރާލާ، އަހަރެން މަރާލާ" އޭ ބުނި ކަމަށާއި، އެއީ އަމިއްލައަށް މަރުވާން އުޅުނު މީހެއްކަން ސާފުވާ ކަމަށްވެސް ނަތަންޔާހޫ ވިދާޅުވި އެވެ.

ޔޫއޭއީގެ ޗީފް ޕްރޮސެކިއުޓަރު ވިދާޅުވީ މިއީ ޓެރަރިސްޓް އަމަލެއްތޯ ބަލާނެ ކަމަށެވެ. އަދި މި ތަހުގީގު އިސްވެ ކުރިއަށްގެންދާނީ ޔޫއޭއީއިން ކަމަށާއި، އިޒްރޭލުން އެކަމުގައި ބައިވެރިވާނެ ކަމަށް ނަތަންޔާހޫ ވިދާޅުވި އެވެ.

ހަމަލާދިން ކޯ-ޕައިލެޓަކީ އޮމާންގެ ރައްޔިތެއްކަން ހާމަކުރަމުން، އިޒްރޭލަށް ދަތުރުކުރާ ފްލައިޓެއްގައި މަސައްކަތް ކުރުމުގެ ހުއްދަ އޭނާއަށް ލިބުނު ގޮތް ބަލާނެ ކަމަށް ނަތަންޔާހޫ ވިދާޅުވިނއެވެ.

މި ބޮޑު ހާދިސާއިން ބޯޓު ސަލާމަތްކުރި ކަމަށްޓަކައި އިންޑިއާގެ ރައްޔިތެއް ކަމަށްވާ ކެޕްޓަން ސްމިތު މަޗާރާއި ފަސިންޖަރުންނަށް ނަތަންޔާހޫ ވަނީ ޝުކުރު އަދާކުރައްވާފަ އެވެ. ފްލައިޓް ރޭޑާ24 ގެ މައުލޫމާތުން އެނގޭ ގޮތުގައި، އެއް މިނެޓުގެ ތެރޭގައި ބޯޓު ވަނީ 17,000 ފޫޓަށް ތިރިވެފަ އެވެ.

ކެޕްޓަން މަޗާރު ދެއްކި ހިތްވަރަށް ނަތަންޔާހޫ ވަނީ ތައުރީފު ކުރައްވާފަ އެވެ. އަދި ޔޫއޭއީގައި ހުންނަވާ އިންޑިއާގެ ސަފީރު ވަނީ ޒަހަމްވި ކެޕްޓަނަށް ޒިޔާރަތް ކުރައްވާފަ އެވެ. އިންޑިއާގެ ބޮޑުވަޒީރު ނަރެންދުރަ މޯދީ ވެސް ވަނީ ކެޕްޓަން މަޗާރަކީ "ހީރޯއެއް" ގެ ގޮތުގައި ސިފަކުރައްވާފަ އެވެ.

ފަސިންޖަރުން ބުނި ގޮތުގައި، އުރުދުން މަތިން ދަތުރުކުރަނިކޮށް ބޯޓުގެ ކޮންޓްރޯލް ވަނީ ވަރަށް ބޮޑަށް ގެއްލިފަ އެވެ. "ކޯ-ޕައިލެޓް މަސައްކަތް ކުރީ ޕައިލެޓް މަރާލައި، ބޯޓު ވައްޓާލައިގެން އަމިއްލައަށް މަރުވާން،" ފަސިންޖަރަކު ކިޔައިދިނެވެ.

ފްލައިދުބާއީން ބުނީ، އެ ފްލައިޓުގައި ދަތުރުކުރި އެ އެއާލައިންގެ އެހެން ޕައިލެޓަކު ބޯޓު ރައްކާތެރިކަމާއެކު ޖައްސާފައިވާ ކަމަށެވެ. އަދި ތަހުގީގު ނިމެންދެން އިޒްރޭލަށް ކުރާ ދަތުރުތައް މެދުކަނޑާލާފައިވާ ކަމަށްވެސް އެ އެއާލައިނުން ބުންޏެވެ.