ވެލާނާ އިންޓަނޭޝަނަލް އެއާޕޯޓު އިންޑިއާގެ ޖީއެމްއާރު ކުންފުންޏަށް ވިއްކާލެއްވި ބޭފުޅަކު، މިއަދު ރާއްޖެއަށް ފައިދާވާނެ ގޮތް ކިޔައިދެއްވަން އުޅުއްވުމަކީ އެންމެ ރަނގަޅު ގޮތް ނޫން ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް، ކުރީގެ ރައީސް މުހައްމަދު ނަޝީދަށް ވަރުގަދަ ރައްދެއް ދެއްވައިފި އެވެ.

ޕީޕަލްސް ނެޝަނަލް ފްރަންޓް (ޕީއެންއެފް) އިން ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން މިފަދައިން ވިދާޅުވީ، ރަސްމާލެ މަޝްރޫއު ހިންގުމަށް ޔޫއޭއީގެ އީގަލް ހިލްސް ކުންފުންޏާ ހަވާލުކުރުމާ ގުޅިގެން އިދިކޮޅު ފަރާތްތަކުން ނުރުހުން ފާޅުނުކުރުމަށް އެދިވަޑައިގެން ރައީސް ނަޝީދު ދެއްކެވި ވާހަކަފުޅުތަކާ ގުޅިގެންނެވެ.

އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ރައީސް ނަޝީދު ވަނީ، ރަސްމާލެ މަޝްރޫއާ ގުޅުވައި އީގަލް ހިލްސްގެ ވެރިޔާ މުހައްމަދު އަލައްބާރަށް ފުރައްސާރަ ކުރުމަކީ ރާއްޖެއަށް ވަރަށް ބޮޑަށް ގެއްލުންވެދާނެ ކަމެއް ކަމަށާއި، އޭގެ ސަބަބުން ރާއްޖޭގައި މިހާރު ހުރި ޔޫއޭއީގެ އިންވެސްޓްމަންޓްތަކަށް ވެސް ހުއްޓުން އަތުވެދާނެ ކަމަށް ވިދާޅުވެފަ އެވެ.

ރައީސް ނަޝީދުގެ މި ވާހަކަފުޅުތަކަށް އިޝާރާތް ކުރައްވައި ރައީސް ޔާމީން ވިދާޅުވީ، ރައީސް ނަޝީދަކީ އެމަނިކުފާނުގެ އަމިއްލަ ވެރިކަމުގައި ގައުމަށް އެތައް ބޮޑެތި ގެއްލުންތަކެއް ލިބޭނެ ފަދަ ޑީލްތައް ނިންމެވި ބޭފުޅެއް ކަމަށެވެ. އެހެންކަމުން، މިއަދު ރާއްޖެއަށް ހެޔޮ ގޮތް ނިންމަން ރައީސް ނަޝީދު އިރުޝާދު ދެއްވުމަކީ ބަލައިގަނެވޭނެ ކަމެއް ނޫން ކަމަށް އެމަނިކުފާނު ފާހަގަކުރެއްވި އެވެ.

މީގެއިތުރުން، ރައީސް މުހައްމަދު މުއިއްޒުގެ ސަރުކާރުން ކުރިއަށްގެންދާ މިފަދަ ބިޔަ މަޝްރޫއުތަކަށް ފާޑުވިދާޅުވަމުން ރައީސް ޔާމީން ވަނީ، ދިވެހިންގެ މުސްތަގުބަލު ވިއްކާލައިގެން ކަންކަން ކުރަމުންދާއިރު، އެފަދަ ކަންކަމުގައި ރައްޔިތުންގެ ފެންނަ ނުފެންނަ ވޯޓެއް (ރިފަރެންޑަމެއް) ނަގަން ޖެހޭނެ ކަމަށް ވެސް ވިދާޅުވެފަ އެވެ.