ޔޫރަޕިއަން ޔޫނިއަންގެ ގައުމުތަކަށް ފޭސްބުކްއާއި އިންސްޓަގުރާމްގެ ހިދުމަތް ހުއްޓާލާނެ ކަމުގެ އިންޒާރު އެ އެޕްލިކޭޝަންތަކުގެ ބެލެނިވެރި ކުންފުނި މެޓާއިން އަނެއްކާ ވެސް ދީފި އެވެ.

މެޓާއިން އީޔޫއަށް މި އިންޒާރު ދީފައިވަނީ އެ ޖަމާއަތުގެ ގާނޫނާއި ގަވާއިދުތަކަށް ގެނައި ބަދަލުތަކަކާއެކު ފޭސްބުކްއާއި އިންސްޓަގްރާމްގައި ޑޭޓާ ޓްރާންސްފާކުރުމަށް ހުރަސް އެޅޭތީ އެވެ.

އީޔޫގެ އާ ގަވާއިދުތަކުގެ ދަށުން ޔޫރަޕްގައި މި ދެ އެޕްލިކޭޝަން ބޭނުންކުރާ ފަރާތްތަކުގެ ޒާތީ މައުލޫމާތު އެމެރިކާގައި ހުންނަ އެ ކުންފުނީގެ މައި ސާވާތަކަށް ޓްރާންސްފާކުރުން މަނާކުރެ އެވެ.

މެޓާއިން ބުނީ އީޔޫގެ އާ ގަވާއިދުތަކަކީ އެ ކުންފުނީގެ ވިޔަފާރިއަށް ބުރޫއަރައި ކުންފުނީގެ މަގްސަދު ހާސިލްކުރުމަށް ހުރަސް އަޅާ ގަވާއިދުތަކެއް ކަމަށެވެ.

އެގޮތުން މި ގަވާއިދުތަކާއެކު އެކުންފުނިން ދާދިފަހުން އިއުލާންކުރި މެޓަވާސް ޕްލެޓްފޯމް ކުރިއަށް ގެންދިއުމަށް ހުރަސް އެޅޭނެ ކަމަށް އެ ކުންފުނިން ބުނެ އެވެ.

ފޭސްބުކްއާއި އިންސްޓަގްރާމް މެދުވެރިކޮށް ޔޫރަޕުން މެޓާއަށް އަހަރަކު 8.6 ބިލިއަން ޑޮލަރުގެ އާމްދަނީއެއް ލިބޭއިރު އެ ކުންފުނީގެ ހިދުމަތްތައް މި ބައްރަށް ހުއްޓާލައިިފި ނަމަ ބޮޑު ގެއްލުންތަކެއް ވާނެ އެވެ.