ބޮޑު އަލިފާނުގެ ހާދިސާއެއް ރޭ ހިނގި މ. ނެރުފެހިގޭގައި ހިންގަމުން އައި ގަރާޖަކީ ހުއްދަނެތި ހިންގާ ތަނެއްކަމަށް މާލޭ ސިޓީ ކައުންސިލުން ބުނެފި އެވެ.

މާލޭ ސިޓީ ކައުންސިލްގެ އޮފިޝަލަކު ވަނީ އެ ގަރާޖަކީ ހުއްދަ ނުނަގައި ހިންގާ ގަރާޖެއްކަން "ހުރިހާ"އަށް ކަށަވަރުކޮށްދީފަ އެވެ.

އޮފިޝަލް ވިދާޅުވީ އެތަނުގައި ގަރާޖެއް ހިންގަން ގޭގެ ވެރިފަރާތުން މިދިޔަ އަހަރުގެ ފެބްރުއަރީ މަހު ހުއްދައަށް އެދުނު ކަމަށެވެ. ނަމަވެސް ސިޓީ ކައުންސިލުން ހުއްދަ ނުދޭން ނިންމައި އެކަން އޭނާއަށް އަންގާފައިވާ ކަމަށް ވެސް އޮފިޝަލް ވިދާޅުވި އެވެ.

ގަރާޖުގެ ވެރި ފަރާތުން ބުނެފައި ވަނީ އަލިފާން ރޯވީ އެގޭގައި ބިދޭސީން ދިރިއުޅޭ ބަޔަށް ވަންނަ އިރު ހުންނަ ލަކުޑި ސިޑި ކައިރީގައި ކަމަށް ބެލެވޭކަމަށެވެ. ނަމަވެސް އެކަން ކަށަވަރު ކުރެވޭނެ ހެއްކެއް އަދި ނެތެވެ.

ފުލުހުން އަންނަނީ ވަރަށް ސީރިއަސް މައްސަލައެއްގެ ގޮތުގައި އެ މައްސަލަ ތަހުގީގު ކުރަމުންނެވެ. ރޭ 12:30 ހާއިރު ހިނގި އެ ހާދިސާގައި ފިހުނު 10 މީހަކު ވަނީ މަރުވެފަ އެވެ. އެ އެންމެންނަކީ ވެސް ބިދޭސީންނެވެ.

އެ މީހުން މިހާރު ތިބީ ގަލޮޅު މޯޗަރީގަ އެވެ.