މީޑިއާ ކައުންސިލަށް ކުރިމަތިލާ ކެންޑިޑޭޓުންގެ ނަންތައް ހާމަކޮށްފި

އަންނަ ހޮނިހިރު ދުވަހު ބާއްވާ މީޑިއާ ކައުންސިލުގެ އިންތިހާބުގައި ވާދަކުރާ ކެނޑިޑޭޓުންގެ ނަންތައް އާއްމުކޮށްފި އެވެ.

މީޑިއާ ކައުންސިލްގެ އިންތިހާބުގައި ވާދަކުރާ ކެންޑިޑޭޓުންގެ ނަމާއި ނަންބަރު މިހާރު ވަނީ ތަރުތީބުކޮށްފަ އެވެ.

މީޑިއާ ކައުންސިލަށް މީޑިއާތަކުން ވާދަކުރާ ކެންޑިޑޭޓުން

1- އަހުމަދު އާޒިފު - ސަން އޮންލައިން

2- މުހައްމަދު އަފްޟަލް - ދީނުގެ މަގު

3- މޫސާ ރަޝީދު - މިހާރު އޮންލައިން

4- މުހައްމަދު ސިމާޢު - ވަން އޮންލައިން

5- ޝިމްލާ އަހުމަދު - އޭއޯ ނިއުސް

6- މުހައްމަދު އަފްރާހު - ތިލަދުން

7- އަލީ ނިޝާން - އާފަތިސް އޮންލައިން

8- ހުސައިން ޝަރީފް - ވަގުތު އޮންލައިން

9- އަހުމަދު މުސްތަފާ - ޕަބްލިކް ސާވިސް މީޑިއާ

10- މުހައްމަދު ފަޟްލޫން - ސަންގު ޓީވީ

މީގެއިތުރުން އަމިއްލަގޮތުންވެސް ވަނީ 12 ކެންޑިޑޭޓަކު ވާދަކޮށްފަ އެވެ. އަމިއްލަގޮތުން ހޮވާ މެމްބަރުކަމަށް ކުރިމަތިލެވޭނީ މީޑިއާއާ ގުޅުންހުރި އެއްވެސް ދާއިރާއެއްގައި މަސައްކަތް ނުކުރާ މީހުންނަށެވެ.

މީޑިއާ ކައުންސިލް އެކުލެވިގެންވަނީ މީޑިއާގެ އިދާރާތައް ތަމްސީލުކުރާ 8 މެންބަރުންނާއި، ޢާންމުންގެ ތެރެއިން އިންތިޚާބު ކުރެވޭ 7 މެންބަރުންނާއެކު ޖުމްލަ 15 މެންބަރުންގެ މައްޗަށެވެ.

މީޑިއާ ކައުންސިލްގެ މެމްބަރުކަމަށް ކުރިމަތިލުމަށް ހުޅުވާލީ އެ ކައުންސިލްގައި ތިއްބަވާ 15 މެމްބަރުންގެ ތެރެއިން 13 މެމްބަރެއްގެ ދައުރު އަންނަ ޑިސެމްބަރު މަހުގެ 14 ވަނަދުވަހަށް ހަމަވާތީ އެވެ. ދައުރު ހަމަވަނީ މީޑިއާތައް ތަމްސީލުކުރާ 7 މެމްބަރަކާއި އާއްމުންގެ ތެރެއިން ކައުންސިލަށް އިންތިޚާބުވި 6 މެމްބަރެއްގެއެވެ.