އަންނަ މަހު ބާއްވަން ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް އެ ޕާޓީގެ ރައީސް މުހައްމަދު ނަޝީދު ފޯމު ހުށަހަޅުއްވައިފި އެވެ.

ރިޔާސީ ޕްރައިމަރީގައި ވާދަކުރެއްވޭނީ މަދުވެގެން 500 އާންމު މެންބަރުންގެ ތާއީދު ފޯމާއެކު ހުށަހެޅުމުންނެވެ. ނަޝީދުގެ ކެމްޕެއިން ޓީމުން ވަނީ ކުޑަ ދުވަސްކޮޅެއްގެ ތެރޭގައި އެ އަދަދަށް ފޯމު ހަމަކޮށްފަ އެވެ.

ނަޝީދު ފޯމު ހުށަހެޅިކަން އެމަނިުފާނުގެ ފަރާތްޕުޅުން އިއުލާން ކުރެއްވީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ.

އެމްޑީޕީގެ ރިޔާސީ ޕްރައިމަރީގެ ވޯޓުލުން އޮންނާނީ އަންނަ މަހުގެ 28 ވަނަ ދުވަހު އެވެ. ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވެސް ވަނީ ރިޔާސީ ޕްރައިމަރީގައި ވާދަކުރައްވާނެކަން އިއުލާން ކުރައްވާފަ އެވެ.

އެމަނިކުފާނުގެ ކެމްޕެއިން ޓީމުން ވެސް އަންނަނީ ތާއީދު ފޯމުގައި ސޮއިކުރުމުގެ މަސައްކަތް ކުރައްވަމުންނެވެ. ދާދިފަހުން ރައީސް ސޯލހު ވަނީ އެމްޑީޕީގެ ގައުމީ މަޖިލީހުގެ މެންބަރުންނާ ބައްދަލުކުރައްވައި ކެމްޕޭންގެ ކަންތައްތައް ކުރިއަށްގެންދާނެ ގޮތަކާ ބެހޭގޮތުން މަޝްވަރާ ކުރައްވާފަ އެވެ.