"ސްލޯ" ވުމަކީ އެމްޑީޕީ ދަންނަ ކަމެއް ނޫން ކަމަށް ވިދާޅުވެ އެ ޕާޓީގެ ރައީސް މުހައްމަދު ނަޝީދު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ވަރަށް ބޮޑަށް ފާޑުވިދާޅުވެއްޖެ އެވެ.

ރިޔާސީ ޕްރައިމަރީގެ ކެމްޕޭނަށް ފުވައްމުލަކަށް މިއަދު ފެއްޓެވި ދަތުރުފުޅުގައި ދޫނޑިގަމުގައި ސަޕޯޓަރުންނާއި ބައްދަލުކުރައްވާ ވާހަކަ ދައްކަވަމުން ނަޝީދު ވިދާޅުވީ ރައީސް ސޯލިހްގެ ވެރިކަމުގެ ހަތަރު އަހަރުގެ ތެރޭގައި ކަންބޮޑުވުންހުރި އެތައް ކަމެއް އެބަހުރި ކަމަށެވެ.

އެމަނިކުފާނު ވިދާޅުވީ 2018 ވަނަ އަހަރުގެ ރިޔާސީ އިންތިހާބާއި އެއާ ޖެހިގެން ބޭއްވި މަޖިލީސް އިންތިހާބުގައި ފުވައްމުލަކުގެ ރައްޔިތުން ސަރުކާރަށް މެޖޯރިޓީ ދިން ނަމަވެސް އެރަށު ރައްޔިތުންނަށްވީ ކަމެއް ނެތް ކަމަށެވެ.

"އަޅުގަނޑަށް ކަންބޮޑުވުން އަންނަނީ ތިބޭފުޅުން އެ ދިންމިންވަރާއި ގާތަށްވެސް ސަރުކާރުން މި ފުވައްމުލަކަށް ދީފައި ނުވާތީ." ނަޝީދު ވިދާޅުވިއެވެ.

ފަތުރުވެރިކަމުގެ އެނދު ފުވައްމުލަކުގައި އިތުރުކުރުމަށް ވި ވައުދާ ގާތަށްވެސް މަސައްކަތް ނުކުރެވޭކަން އެމަނިކުފާނު ފާހަގަކުރެއްވި އެވެ. އަދި ދަނޑުވެރިކަމުގެ ލެބޯޓްރީއެއް ގާއިމުކުރުމަށްވެސް ވައުދުވެ އެކަން ނުވި ކަމަށް ވެސް ނަޝީދު ވިދާޅުވި އެވެ.

"ދެން އަޅުގަނޑުމެން ލަހޭ، ސްލޯއޭ، މާ މަޑުންނޭ، ފިނިހަކަ ދުވެލީގައޭ، އެއީ މި ޕާޓީ ދަންނަގޮތެއް ނޫނޭ. މި ވާހަކަތައް އަޑުއުފުލަމުން މިދަނީ ކެތް މަދުވާތީވެ،" ނަޝީދު ވިދާޅުވިއެވެ.

ނަޝީދު ވިދާޅުވީ ދައުލަތުން ދަރަނި ދައްކަން ބޮޑު ހޭދައެއް ކުރަންޖެހޭ ކަމަށާއި އެކަން ކުރުމަށް ރައްޔިތުންގެ އަތުން ނަގާ ޓެކްސް ކުރީ ބޮޑު ކަމަށެވެ. އެ ސަބަބާ ހުރެ ރައީސް ސޯލިހަށް ދެވަނަ ދައުރެއް ދެވެން ނެތް ކަމަށް ވެސް އެމަނިކުފާނު ވިދާޅުވި އެވެ.