ރާއްޖޭގެ ކަނޑުފަޅުގެ ސަރަހައްދުތައް ބޭނުންކުރާ ގޮތް ބަލައި ތަރުތީބު ކުރުމަށް މިހާރު ކުރިއަށް ގެންދާ ސައިންޓިފިކް ދިރާސާގެ މުހިއްމު އާލާތްތަކެއް ކަނޑަށް ދޫވެ، ގެއްލިއްޖެ އެވެ.

ރާއްޖޭގެ ކަނޑުތައް ހިމާޔަތް ކުރުމަށް، ސަރުކާރުން އިސްކޮށް ތިބެ ހިންގާ 'ނޫރާއްޖެ' ޕްރޮގްރާމާއި ނެޝަނަލް ޖިއޮގްރަފިކްގެ 'ޕްރިސްޓީން ސީސް' ގުޅިގެން، މި ދިރާސާ ފަށާފައިވަނީ މިދިޔަ އާދިއްތަ ދުވަހެވެ.

އެއް މަސް ދުވަހުގެ މުއްދަތަށް ކުރިއަށްގެންދާ މި އެކްސްޕެޑިޝަނުގެ ދަށުން ގއ. އަދި ގދ. އަތޮޅުގެ އިތުރުން ފުވައްމުލަކާއި އައްޑުއަށް ދަތުރުކުރުމަށް ވަނީ ހަމަޖެހިފައެވެ.

'ނޫރާއްޖެ' ޕްރޮގްރާމްގެ ކޯޑިނޭޓަރު މޫސާ ޒަމީރު ހަސަން ވިދާޅުވީ ދިރާސާގެ މުހިއްމު ސާމާނުތައް ގެއްލިފައިވަނީ، ގދ. ކާޑެއްދޫ ދެކުނުފަރާތު ބޭރަށް، މިދިޔަ ބުރާސްފަތި ދުވަހު ކަނޑަށް ދޫކޮށްފައި ވަނިކޮށް ކަމަށެވެ.

އޭނާ ވިދާޅުވީ އެއީ ކަނޑުގެ މަތީ ފަށަލައިގައި އުޅޭ މަސްތައް މޮނީޓާކޮށް، މައުލޫމާތު އެއްކުރުމަށް، އެ ފަދަ މަސްތައް ގަޔާވާ ގޮތަށް، ދޫކޮށްފައި ހުންނަ 'ބްރަވް' ސިސްޓަމެއް ކަމަށެވެ.

އެ އާލާތް މާކަނޑަށް ދޫކޮށްލީ ބޮއެ އެއްސުމަށް ފަހު 'ބްރަވް ސިސްޓަމް' އޮތް ތަން ދެނެގަންނާނީ އެ ކަމަށް ހާއްސަ ޓްރެކިން ވަސީލަތެއް މެދުވެރިކޮށް"އެކަމަކު އަޅުގަނޑުމެންނަށް އެ ޓްރެކް ނުކުރެވި އިނީ. އެހެންވެ، އެ ސިސްޓަމް ވީ ތަނެއް މިހާރު އެއްގޮތަކަށް ވެސް ނޭނގެ،" އޭނާ ވިދާޅުވި އެވެ.

މި އާލާތްތައް ގެއްލުނުކަން ރަށްރަށަށް މިހާރު ވަނީ އަންގާފަ އެވެ. އެ ސިސްޓަމްގައި ރީނދޫ ކުލައިގެ 10 ބޮއި އަޅާފައި ވަނީ އަޅާފަ އެވެ. އަދި އޭގައި ދިދައެއް ހަރުކޮށްފައި ހުންނާނެ އެވެ.

"އޮޔާ، އެ ސިސްޓަމް މިހާރު ދުރަށް ދަތުރުކޮށްފާނެ ކަމަށް ލަފާ ކުރެވޭ،" މޫސާ ޒަމީރު ވިދާޅުވި އެވެ.

މި އާލާތްތައް ފެނިއްޖެނަމަ މޫސާ ޒަމީރު 7772155 މައީޝާ މުހައްމަދުއަށް ގުޅައި އެ މައުލޫމާތު ހިއްސާކޮށްދިނުމަށް ނޫރާއްޖެއިން އެދެ އެވެ.

މި ދިރާސާ ދަތުރުގައި ބައިވެރިވާ ސައިންސްވެރިން ރާއްޖޭގެ ދެކުނުގެ ކަނޑުތަކުގެ ހާލަތު، ކެމެރާ މެދުވެރިކޮަށް ދެނެގަންނާނެ ކަމަށް މޫސާ ޒަމީރު ވިދާޅުވި އެވެ.