ސަރުކާރުގެ ސިޔާސީ މުވައްޒަފުންނަށް އުމްރާ ޗުއްޓީ ލިބޭ ގޮތަށް 'ސިޔާސީ މުވައްޒަފުންގެ ގޮތުގައި ރައީސުލްޖުމްހޫރިއްޔާ އައްޔަންކުރާ މުވައްޒަފުން އަމަލުކުރަން ޖެހޭ އުސޫލު' އިސްލާހުކޮށް މިއަދު އާންމުކޮށްފި އެވެ.

އެ ގަވާއިދުގެ 'ޗުއްޓީ އާއި ސަލާން ބުނުމާއި، ދަތުރުތައް' މި މާއްދާގައި ބުނެފައިވާ ގޮތުގައި ފުރަތަމަ ފަހަރަށް ހައްޖުގެ އަޅުކަން އަދާކުރާ ސަރުކާރުގެ ސިޔާސީ މުވައްޒަފުންނަށް ހައްޖަށް ދިއުމަށް ފުރާ ދުވަހުން ފެށިގެން 35 ދުވަހުގެ ޗުއްޓީއެއް ނެގިދާނެ އެވެ. މިއީ މުސާރަ ހިނގާ ގޮތަށް ލިބޭ ޗުއްޓީއެކެވެ.

މި މާއްދާއަށް ދެން އިތުރުކުރީ ފުރަތަމަ އުމުރާގެ އަޅުކަން އަދާކުރާ ސަރުކާރުގެ ސިޔާސީ މުވައްޒަފަށް ޗުއްޓީ ލިބޭނެ ކަމަށް ކަނޑައަޅާފައި އޮތް އިސްލާހެވެ. އެގޮތުން އުމުރާއަށް ލިބެނީ މުސާރަ ހިނގާ ގޮތަށް 15 ދުވަހުގެ ޗުއްޓީއެކެވެ.

އުމްރާގެ ޗުއްޓީ ސިޔާސީ މުވައްޒަފުންނަށް ލިބުނަސް ސިވިލް ސާވިސް މުވައްޒަފުންނަށް މިފަދަ ޗުއްޓީއެއް ނުލިބެ އެވެ.

މީގެއިތުރުން ސިޔާސީ މުވައްޒަފުންގެ މަގާމާ ގުޅޭ ދަތުރެއްގައި ދެވޭނީ ރައީސް އޮފީހުން ހާއްސަ ހުއްދައެއް ލިބުނުކަން ލިޔުމަކުން އެންގުމުން ކަމަށް ވެސް އެ އުސޫލަށް ގެނައި އިސްލާހުގައި ވަނީ ބަޔާންކޮށްފަ އެވެ.

'ސިޔާސީ މުވައްޒަފުންގެ ގޮތުގައި ރައީސުލްޖުމްހޫރިއްޔާ އައްޔަނުކުރާ މުވައްޒަފުން އަމަލުކުރަން ޖެހޭ އުސޫލު"އަކީ ވަޒީރުން ފިޔަވައި ސިޔާސީ މުވައްޒަފުންގެ ގޮތުގައި ރައީސުލްޖުމްހޫރިއްޔާ އައްޔަންކުރާ މުވައްޒަފުން އަމަލުކުރަން ޖެހޭ އުސޫލެވެ. ސިޔާސީ މުވައްޒަފުންކަމަށް ބަލަނީ، ރައީސުލްޖުމްހޫރިއްޔާ ނުވަތަ ރައީސުލްޖުމްހޫރިއްޔާ ކަނޑައަޅާ ފަރާތަކުން ސޮއިކުރާ ލިޔުމަކުން ވަޒީފާ ހަމަޖައްސާ ފަރާތްތަކެވެ.