މިނިވަން ނޫހުގެ ނޫސްވެރިޔާ އަހްމަދު ރިލްވާން އަބްދުﷲ ރަހީނުކޮށް މަރާލުމާއި ސޯޝަލް މީޑިއާ އެކްޓިވިސްޓް ޔާމީން ރަޝީދު މަރާލި މައްސަލައިގެ ތުހުމަތުގައި ދައުވާ އުފުލާފައިވަނިކޮށް ކްރިމިނަލް ކޯޓުން ދޫކޮށްލި އަހްމަދު އިސްމާއީލް (ބުރު އަހަނދު)ގެ ފައިގައި ޓެގް އަޅުވައިފި އެވެ.

އެނގިފައިވާ ގޮތުގައި އޭނާގެ ފައިގައި ޓެގް އަޅުވާފައި ވަނީ މިރޭ އެވެ.

ރިލްވާނާއި ޔާމީންގެ މަރާ ގުޅިގެން، އަހަނދުގެ މައްޗަށް ދައުލަތުން އުފުލާފައި ވަނީ ޓެރަރިޒަމްގެ އަމަލެއް ކުރަން ރޭވުމުގެ ދައުވާއަކާއި ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދައުވާއެކެވެ. އެ ދެ ދައުވާގެ ޝަރީއަތް ކުރިއަށްގެންދަނީ ސިއްރުކޮށްގެނެވެ. ކޯޓުން އޭނާ ދޫކޮށްލީ މިދިޔަ ބުދަ ދުވަހު އެވެ.

އެ މައްސަލައިގެ ޝަރީއަތުގެ އަޑުއެހުންތައް ވެސް ބާއްވަނީ ވަރަށް ލަސްލަހުންނެވެ. އެ މައްސަލައިގެ ޝަރީއަތް ލަސްކުރާ ސަބަބެއް ކްރިމިނަލް ކޯޓުން ނުބުނެ އެވެ.

ދައުލަތުން ތުހުމަތުކުރާ ގޮތުގައި އަހަނދަކީ ރިލްވާން މަރާލުމުގެ ކަންކަން ރާވައި އިންތިޒާމު ކުރުމާއި، ޔާމީން ރަޝީދު މަރާލުމަށް އޭނާއަށް ފާރަލުމުގެ ކަންކަން އިންތިޒާމު ކުރި މީހެކެވެ.