ރިތިކް ރޯޝަންއާއި ސަބާ އާޒާދްއަކީ އެ ދެމީހުންގެ ޒާތީ ދިރިއުޅުމުގެ ސަބަބުން މީޑިއާގެ ފަލަ ސުރުހީތަކަށް އަބަދުވެސް އަރާ ދެ ތަރިންނެވެ.

އެގޮތުން އެންމެ ފަހުން މީޑިއާތަކުގައި ގަދަވި އެއް އަޑަކީ އެ ދެލޯބިވެރިން ކައިވެނި ކުރަން އުޅޭ އަޑުތަކެވެ. އެގޮތުން މިއަހަރުގެ ޑިސެމްބަރު މަހު ކައިވެނި ކުރަން ރިތިކްއާއި ސަބާ ތައްޔާރު ވަމުން އަންނަ ކަމަށް ހަބަރުތައް ބުނެ އެވެ.

މި ހަބަރުތައް އެއްވެސް ފަރާތަކުން އަދި ޔަގީން ކޮށްދީފައި ނުވާއިރު މިއީ އެދެމީހުންގެ ކައިވެނީގެ އަޑުތައް މީޑިއާގައި ގަދަވި ފުރަތަމަ ފަހަރެއް ނޫނެވެ.

މީގެ ކުރިން ވެސް ރިތިކްއާއި ސަބާ ކައިވެނި ކުރަން އުޅޭ ކަމަށް އެކި ފަހަރު މަތިން އިންޑިއާގެ މީޑިއާތަކުގައި ހަބަރު ފަތުރާފައިވެ އެވެ.

ރިތިކްއާއި ސަބާގެ ޖޯޑަކީ ބޮލީވުޑްގެ އެންމެ މައްސަލަބޮޑު ޖޯޑުތަކުގެ ތެރެއިން ޖޯޑެކޭ ދެންނެވިދާނެ އެވެ. އެގޮތުން ރިތިކް އޭނާގެ ފުރަތަމަ އަންހެނުން ސުޒޭން ޚާން ވަރިކުރީ ސަބާގެ ސަބަބުން ކަމަށް އަޑު ފެތުރިފައިވެ އެވެ.