ޓެކްސީ ޑްރައިވަރުން ޝަކުވާ ކުރަން ފެށުމުން ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ ޑޮމެސްޓިކް ޓާމިނަލްއަށް ކުރާ ޓެކްސީ ދަތުރުތަކަށް އިތުރު 10ރ. ނެގޭ ގޮތަަށް ހަދައި ތިން ލަގެޖަށް ވުރެ އިތުރަށް ޓެކްސީއަކަށް އަރުވާ ނަމަ އިތުރަށް ފައިސާ ނަގާ ގޮތަށް މާލެ ސަރަހައްދުގެ ޓެކްސީގެ އަގުތައް ޓްރާސްޕޯޓު މިނިސްޓްރީން އަލުން އިއުލާންކޮށްފި އެވެ.

މީގެ އިތުރުން ޓްރާންސްޕޯޓް މިނިސްޓްރީން ވަނީ މީގެ ކުރިން ކަނޑައަޅާފައި ނުވާ 7-10 ސީޓު ހުންނަ ވޭން ޓެކްސީގެ އަގުތައް ވަނީ ފުރަތަމަ ފަހަރަށް ކަނޑައަޅައިފަ އެވެ.

އެއާޕޯޓުން ދަތުރުކުރާ ޑްރައިވަރުން ހިތުހުރި އަގުތަކެއް ނަގަމުން ދަނިކޮށް، ސަރުކާރުން އަގުތައް އަލުން ކަނޑައެޅުމަށްފަހު ޓްރާންސްޕޯޓް މިނިސްޓްރީން ބުނީ ޓެކްސީ ކުރުމުގެ އަގުތައް ކަނޑައަޅާފައި ވަނީ ދަތުރުކުރެވޭ ސަރަހައްދާއި ޕެޓްރޯލް ހަރަދު ފަދަ ކަންކަމަށް ރިއާޔަތްކޮށް ކަމަށެވެ. އަގުތައް ކަނޑައެޅުމުގައި ޓެކްސީ ޑްރައިވަރުންނާއި ހިދުމަތް ހޯދާ މީހުންގެ މަސްލަހަތަށް ބުރޫނާރާނެ ގޮތަށް ބެލި ކަމަށް ވެސް އެ މިނިސްޓްރީން ބުންޏެވެ.

ޓްރާސްޕޯޓު މިނިސްޓްރީން މިއަދު ނެރުނު އިއުލާނެއްގައިވާ ގޮތުން އާ އަގުތަކަށް އަމަލުކުރާނީ އަންނަ އާދީއްތަ ދުވަހުން ފެށިގެންނެވެ.

ހަ ސީޓަށް ވުރެ މަދު ސީޓު ހުންނަ ކާރުތަކުގެ ދަތުރުތައް އަދިވެސް ކުރެވޭނީ މިދިޔަ އަހަރުގެ ޖުލައި މަހު ކަނޑައެޅި އަގުތަކުގަ އެވެ.

ހަ ސީޓަށް ވުރެ މަދު އުޅަނދުތައް:

  • ޒޯނު އެތެރޭގެ ދަތުރުތައް (މާލެ، ހުޅުމާލެ، ހުޅުމާލެ 2 ގެ އެތެރޭގެ ދަތުރުތައް) - 30ރ.
  • މާލެ އިން ހުޅުމާލެ 1 އަށް 85ރ.
  • މާލެ އިން ހުޅުމާލެ 2 އަށް 100ރ.
  • މާލެ އިން ވެލާނާ އިންޓަނޭޝަނަލް އެއާޕޯޓަށް 70ރ.
  • ހުޅުމާލެ 1 އިން މާލެ އަށް 85ރ.
  • ހުޅުމާލެ 1 އިން ހުޅުމާލެ 2 އަށް 40ރ.
  • ހުޅުމާލެ 1 އިން ވެލާނާ އިންޓަނޭޝަނަލް އެއާޕޯޓަށް 80ރ.
  • ހުޅުމާލެ 2 އިން މާލެ އަށް 100ރ.
  • ހުޅުމާލެ 2 އިން ހުޅުމާލެ 1 އަށް 40ރ.
  • ހުޅުމާލެ 2 އިން ވެލާނާ އިންޓަނޭޝަނަލް އެއާޕޯޓަށް 85ރ.
  • ވެލާނާ އިންޓަނޭޝަނަލް އެއާޕޯޓުން މާލެ އަށް 70ރ.
  • ވެލާނާ އިންޓަނޭޝަނަލް އެއާޕޯޓުން ހުޅުމާލެ 1 އަށް 80ރ.
  • ވެލާނާ އިންޓަނޭޝަނަލް އެއާޕޯޓުން ހުޅުމާލެ 2 އަށް 85ރ.

ޓްރާންސްޕޯޓު މިނިސްޓްރީން ބުނީ ޑޮމެސްޓިކް ޓާމިނަލަށް ކުރެވޭ ދަތުރުތަކުން އެއާޕޯޓަށް ކަނޑައަޅާފައިވާ އަގުގެ އިތުރަށް 10ރ. ނެގޭނެ ކަމަށެވެ. އަދި ޓެކްސީއަށް އަރުވާ ލަގެޖުގެ ތެރެއިން ތިން ލަގެޖަށް ވުރެ އިތުރުވާ ނަމަ، އިތުރުވާ ކޮންމެ ލަގޭޖަކަށް 5ރ. ޗާޖުކުރެވޭނެ ކަމަށް ވެސް ކަނޑައަޅާފައިވެ އެވެ.

މިދިޔަ ޑިސެމްބަރު މަހުން ފެށިގެން ވީއައިއޭގެ ޑޮމޮސްޓިކް ޓާމިނަލަށް ޓެކްސީތަކަށް މަޑުކުރެވޭ ގޮތް ހެދި ނަމަވެސް، ޓްރާންސްޕޯޓް މިނިސްޓްރީން އޮތީ އެފަދަ ދަތުރުތަކަށް އަގެއް ކަނޑަނާޅަ އެވެ. އެހެންވެ ޑްރައިވަރުން އެ ސަރަހައްދަށް މަޑު ކުރަނީ އެ މީހުން ބޭނުންވާ އަގަކަށެވެ.

7-10 ސީޓާ ދެމެދުގެ އުޅަނދުގައި ދަތުރުކުރެވޭނެ އަގުތައް:

  • ޒޯނު އެތެރޭގެ ދަތުރުތައް (މާލެ، ހުޅުމާލެ، ހުޅުމާލެ 2 ގެ އެތެރޭގެ ދަތުރުތައް) - 45ރ.
  • މާލެ އިން ހުޅުމާލެ 1 އަށް 130ރ.
  • މާލެ އިން ހުޅުމާލެ 2 އަށް 155ރ.
  • މާލެ އިން ވެލާނާ އިންޓަނޭޝަނަލް އެއާޕޯޓަށް 110ރ.
  • ހުޅުމާލެ 1 އިން މާލެ އަށް 130ރ.
  • ހުޅުމާލެ 1 އިން ހުޅުމާލެ 2 އަށް 60ރ.
  • ހުޅުމާލެ 1 އިން ވެލާނާ އިންޓަނޭޝަނަލް އެއާޕޯޓަށް 125ރ.
  • ހުޅުމާލެ 2 އިން މާލެ އަށް 155ރ.
  • ހުޅުމާލޭ 2 އިން ހުޅުމާލެ 1 އަށް 60ރ.
  • ހުޅުމާލެ 2 އިން ވެލާނާ އިންޓަނޭޝަނަލް އެެއާޕޯޓަށް 130ރ.
  • ވެލާނާ އިންޓަނޭޝަނަލް އެއާޕޯޓުން މާލެ އަށް 110ރ.
  • ވެލާނާ އިންޓަނޭޝަނަލް އެއާޕޯޓުން ހުޅުމާލެ 1 އަށް 125ރ.
  • ވެލާނާ އިންޓަނޭޝަނަލް އެއާޕޯޓުން ހުޅުމާލެ 2 އަށް 130ރ.