މިދިޔަ އޭޕްރީލް 21 ވަނަ ދުވަހު ބޭއްވި ރައްޔިތުންގެ މަޖިލިސް އިންތިހާބުގައި ފުނަދޫ ދާއިރާގެ ގޮނޑި ކާމިޔާބު ކުރި މުހައްމަދު މަމްދޫހް (މަންޑޭ) އަށް ސިހުރު ހެދި ކަމުގެ ތުހުމަތުގައި ހައްޔަރުކުރި މީހާގެ ބަންދަށް އިތުރު 10 ދުވަސް ޖަހައިފި އެވެ.

އުމުރުން 60 އަހަރު މި ފިރިހެން މީހާ ފުނަދޫން ހައްޔަރުކުރީ މިމަހުގެ 3 ވަނަ ދުވަހު އެވެ. އެ ދުވަހު ފުނަދޫ މެޖިސްޓްރޭޓް ކޯޓުން އޭނާގެ ބަންދަށް ޖެހީ 15 ދުވަހު އެވެ. އެ މުއްދަތު އިއްޔެ އަށް ހަމަވުމާއެކު އޭނާގެ ބަންދަށް ގޮތެއް ނިންމުމަށް ކުޅުދުއްފުށީ ކޯޓަށް ގެންދިޔުމުން އޭނާގެ ބަންދަށް އިތުރު 10 ދުވަސް ވަނީ ޖަހައިފަ އެވެ.

ފުނަދޫގެ ބައެއް މީހުން ބުނި ގޮތުގައި ހައްޔަރު ކުރި މީހާއަކީ މިދިޔަ މަޖިލިސް އިންތިހާބުގައި ދާއިރާގެ ގޮނޑި ކާމިޔާބު ކުރެއްވި ޕީއެންސީގެ ކެންޑިޑޭޓު ހައްމަދު މަމްދޫހު (މަންޑޭ) އަށް ސިހުރު ހަދަން މަސައްކަތް ކުރި މީހެކެވެ.

މިކަމުގެ އަޑީގައި ހުރީ ފުނަދޫ ކައުންސިލްގެ ރައީސް އަދި ރައްޔިތުންގެ މަޖިލީހުގެ އިންތިހާބުގައި އެ ދާއިރާއަށް އަމިއްލަ ގޮތުން ވާދަކުރެއްވި އަހުމަދު އިބްރާހިމްފުޅު ކަމަށް އެ ރަށުގެ ރައްޔިތުން ވަނީ ތުހުމަތުކޮށްފަ އެވެ.

އެކަމަކު، އެ ތުހުމަތުތައް އަހުމަދު ވަނީ ދޮގު ކުރައްވައިފަ އެވެ. އަހުމަދާ ދެކޮޅަށް އެ ރަށުގައި ވަނީ މުޒާހަރާ ވެސް ކޮށްފަ އެވެ.