ހުޅުމާލޭގެ ތިންވަނަ ފިޔަވަހިން ބިން ހިއްކަން ހަމަޖެހިފައިވާ ސަރަހައްދުގެ ތެރެއިން މިހާރު ނުހިއްކާ އޮތް ސަރަހައްދުގެ މަސައްކަތް މިމަހު ފަށާނެކަމަށް ހައުސިން ޑިވަލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.

ބިން ހިއްކުމުގެ މަސައްކަތް އަލުން ފެށުމުގެ ކުރިން، ރައްކާތެރިކަމުގެ ފިޔަވަޅެއްގެ ގޮތުން އެ ސަރަޙައްދުގައި އަޅާފައިވާ ކަނޑު އުޅަނދުފަހަރުތައް ނެގުމަށް އެޗްޑީސީން ވަނީ އަންގައިފަ އެވެ.

ހުޅުމާލޭގެ ތިންވަނަ ފިޔަވަހި ހިއްކުމުގެ މަސައްކަތް އެޗްޑީސީން ފަށާފައި ވަނީ މިދިޔަ އަހަރުގެ ސެޕްޓެންބަރު މަހުގެ 22 ވަނަ ދުވަހު އެވެ. ތިންވަނަ ފިޔަވަހި ހިއްކުމުގެ މަސައްކަތް ކުރަނީ 3 އޭރިއާއަކަށް ބަހާލައިގެންނެވެ. އެގޮތުން "ސައިޓް އޭ" ގައި ހިއްކަން ހަމަޖެހިފައިވާ 10 ހެކްޓަރުގެ ބިން މިހާރު ވަނީ ހިއްކާ ނިންމާފަ އެވެ. އަދި "ސައިޓް ބީ"ގައި ހިއްކަން ހަމަޖެހިފައިވާ ސަރަޙައްދުގެ ތެރެއިން 13 ހެކްޓަރު ބިން ހިއްކާ މިހާރު ވަނީ ނިންމާފަ އެވެ.

އެޗްޑީސީ އިން ބުނީ ހުޅުމާލޭގެ ތިން ވަނަ ފިޔަވަހި ހިއްކުމުގެ މަސައްކަތް މަޑުޖެހިފައިވަނީ ރާއްޖޭގައި ގާ ހުދުވުމުގެ މައްސަލަ އިތުރުވުމުގެ ސަބަބުން ބިން ހިއްކުމުގެ މަޝްރޫއުތައް މަޑުޖައްސާލަން އެންވަރަޔަމަންޓް ޕްރޮޓެކްޝަން އެޖެންސީ (އީޕީއޭ) އިން އެންގުމުން ކަމަށެވެ. އަދި މަސައްކަތް މަޑުޖައްސާލިއިރު، "ސައިޓް ބީ"އިން 16 ހެކްޓަރާއި "ސައިޓް ސީ"ގައި ހިމެނޭ 24 ހެކްޓަރުގެ ބިން ހިއްކާ ނުނިމޭ ކަމަށް އެ ކުންފުނިން ބުންޏެވެ. މި ސައިޓްތަކުގެ މަސައްކަތް މިމަހު ފެށޭނެ ކަމަށް ވެސް އެޗްޑީސީން ބުނެ އެވެ.

އެޗްޑީސީން ބުނީ ތިން ވަނަ ފިޔަވަހީގެ ބިން ހިއްކުމުގެ މަސައްކަތް އަލުން ފެށުމަށް ތައްޔާރުވަމުންދާއިރު، އެ ސަރަހައްދުގައި އަދިވެސް ކަނޑު އުޅަނދުތައް އަޅާފައި އޮތުމުން މަސައްކަތަށް ދަތިވާނެ ކަމަށެވެ.

ހަމައެއާއެކު މަސައްކަތުގެ ތެރެއިން އުޅަނދަކަށް ގެއްލުމެއް ލިބުމަކީވެސް އެކަށީގެންވާ ކަމެއް ކަމަށާއި މިހެންވެ އަންނަ އާދިއްތަ ދުވަހުގެ ކުރިން އުޅަނދުތައް ނެގުމަށް، ވެރިންނަށް އަންގާފައިވާކަމަށް އެޗްޑީސީން ބުނެއެ ވެ. އަދި އާދިއްތަ ދުވަހުގެ ފަހުން އެ ސަރަޙައްދުގައި އެއްވެސް ކަނޑު އުޅަނދެއް އެޅުމަކީ މަނާކަމެއް ކަމަށްވެސް އެޗްޑީސީ އިން ވަނީ ބުނެފަ އެވެ.

ހުޅުމާލޭގެ 3 ވަނަ ފިޔަވަހީގެ ބިން ހިއްކުމުގެ މަސައްކަތް ކުރަމުން އަންނަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑް (ސީއެމްސީ) އިންނެވެ. ހުޅުމާލޭގެ 3 ވަނަ ފިޔަވަހީގެ ބިން ހިއްކުމުގެ މަސައްކަތުގެ ދަށުން ޖުމްލަ 63 ހެކްޓަރުގެ ބިން ހިއްކާނެ އެވެ.

ހުޅުމާލޭގެ 3 ވަނަ ފިޔަވަހީގައި ގިނަ ޚިދުމަތްތަކާއި ވަސީލަތްތައް ތަރައްޤީކުރުމަށް ހަމަޖެހިފައިވާކަމަށް އެޗްޑީސީ އިން ބުނެ އެވެ. އެގޮތުން މި ފިޔަވަހި ވެސް ތަރައްގީ ކުރާނީ މަގުތަކާއި ބްރިޖްގެ އިތުރުން ޕާކްތަކާއި، ކުޅިވަރާއި މުނިފޫހިފިލުވުމުގެ ހަރަކާތްތަކަށް ވެސް ގިނަ ފުރުސަތުތައް ފަހިވާނެ ގޮތަށް ކަމަށް އެޗްޑީސީ އިން ބުނެ އެވެ.

ހުޅުމާލެއިން އަލަށް ހިއްކާ މި ބިމުގައިގައި ގެދޮރުވެރިކަމުގެ ބޭނުންތަކާއި އިންޑްސްޓްރިއަލް ބޭނުންތަކާއި މެރީނާގެ ބޭނުމަށް ބިން ބޭނުންކުރާނެ ކަމަށް އެޗްޑީސީ އިން ބުނެ އެވެ.