އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައިދުގެ ދަރިކަލުންނަށް މެލޭޝިއާގައި ހުންނަ ރާއްޖޭގެ އެމްބަސީން މަތީ މަގާމެއް ދީފައިވާ ކަމަށް ބައެއް ނޫސްތަކުން މިއަދު ރިޕޯޓްކޮށްފި އެވެ.

ޝަހީމްގެ ދޮށީ ދަރިކަލުން އަބްދުﷲ މާހިލް ޝަހީމަށް މިދިޔަ މަހު ދީފައި ވަނީ ރާއްޖޭގެ އެމްބަސީގެ ތާޑް ސެކްރެޓަރީގެ މަގާމެވެ. މައުލޫމާތު އެނގޭ ބައެއް ފަރާތްތަކުން ބުނެފައި ވަނީ މި މަގާމަށް މުސާރަ އާއި އިނާޔަތްތަކާ އެކު މަހަކު 100،000 ރުފިޔާ ލިބޭނެ އެވެ.

ކުއާލަ ލަމްޕޫރުގެ އިންޓަނޭޝަނަލް އިސްލާމިކް މިނިސްޓްރީން ކިޔަވާ ވިދާޅުވުމަށް ފަހު ޝަހީމުގެ ދަރިކަލުން އާއިލާއާ އެކު ދިރިއުޅުއްވަނީ ވެސް މެލޭޝިއާގަ އެވެ.

ޝަހީމުގެ އަނބިކަނބަލުން ފާތިމަތު އާފިޔާ އަކީ މާލޭ ސިޓީ ގްރޫޕް އޮފް ހޮސްޕިޓަލްސްގެ ބޯޑު މެންބަރެކެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު. -ފޮޓޯ: އިސްލާމިކް މިނިސްޓްރީ

ރައީސް ޑރ. މުހައްމަދު މުއިއްޒު މި އަހަރު ކުރީކޮޅު ވަނީ ސިޔާސީ މަގާމުތަކަށް މީހުން ދެން ނުނަގާނެ ކަމަށް ވިދާޅުވެފަ އެވެ. ނަމަވެސް އޭގެ ފަހުން އެތައް ބަޔަކަށް މި ސަރުކާރުން މަތީ ސިޔާސީ މަގާމުތައް ދީފައިވެ އެވެ. އަދި ސަރުކާރުގެ ޚަރަދުތައް ބޮޑުވެގެން ސިޔާސީ މަގާމުތަކުން މީހުން މަދުކުރުމުގެ މަސައްކަތް ފަށާފައިވާ ކަމަށް ވެސް ދާދި ފަހުން އަޑުއަރާފައިވެ އެވެ.

ރައީސް މުއިއްޒު ވިދާޅުވެފައި ވަނީ އެމަނިކުފާނުގެ ސަރުކާރުގައި ސިޔާސީ މަގާމުތަކުގެ އަދަދު 700 އަށް ވުރެ އިތުރު ނުވާނެ ކަމަށެވެ. ނަމަވެސް އިދިކޮޅު ފަރާތްތަކުން ތުހުމަތު ކުރަނީ މި ސަރުކާރުގެ ސިޔާސީ މަގާމުތަކުގެ އަދަދު 2،000 އަށް ވުރެ މިހާރު އިތުރުވާނެ ކަމަށެވެ.

މި ސަރުކާރުގެ ސިޔާސީ މަގާމުތަކުގެ އަދަދު ހޯދުމަށް އެތައް ނޫސްތަކަކުން މަސައްކަތް ކުރި އިރު ވެސް އެ މައުލޫމާތު ރައީސް އޮފީހުން ހާމަކޮށްފައެއް ނުވެ އެވެ. އިންފޮމޭޝަން ކޮމިޝަނަރުގެ އޮފީސް މެދުވެރިކޮށް އާރްޓީއައި ލައިގެން ވެސް އެ މައުލޫމާތު ސަރުކާރުން ދީފައެއް ނުވެ އެވެ. ރައްޔިތުންގެ މަޖިލީހުގެ ކޮމިޓީއަކުން އެދުމުން ވެސް ސަރުކާރުގެ ސިޔާސީ މަގާމުތަކުގެ އަދަދު ހާމައެއް ނުކުރި އެެވެ.