ސިހުރު ހެދުމުގެ ތުހުމަތުގައި ހައްޔަރުކުރި އެންވާރަމަންޓް މިނިސްޓްރީގެ ސްޓޭޓް މިނިސްޓަރު ޝަމްނާޒް އަލީ ސަލީމް ދޫކޮށްލައިފި އެވެ.

ސިހުރު ހެދުމުގެ ތުހުމަތުގައި، ޖޫން މަހުގެ 26 ވަނަ ދުވަހު، ޝަމްނާޒާއި އިތުރު ދެ މީހަކު ހައްޔަރުކުރި އެވެ. އޭނާ އާއެކު ހައްޔަރުކުރި ދެމީހުން ވެސް ވަނީ މިހާރު ދޫކޮށްލައިފަ އެވެ.

އެމީހުން ހައްޔަރުކޮށް، ތަހުގީގުކޮށްފައި ވަނީ ރައީސް މުހައްމަދު މުއިއްޒާއި އެ މަނިކުފާނުގެ އާއިލާއަށް އަމާޒުވާ ސިހުރު ހެދުމުގެ މައްސަލައެކެވެ.

ޝަމްނާޒް އާއި އޭނާގެ ކޮއްކޮ ސަނާ މި މައްސަލައިގައި ހައްޔަރުކުރިއިރު ތިބީ ސަރުކާރުގެ ސިޔާސީ މަގާމުތަކުގަ އެވެ. އެގޮތުން ޝަމްނާޒް އަކީ އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރެވެ. އަދި އޭނާގެ ކޮއްކޮ ސަނާ އަކީ ހަމަ އެ މިނިސްޓްރީގެ ސީނިއާ ޕޮލިޓިކަލް ޑިރެކްޓަރެކެވެ. ނަމަވެސް މިހާރު އެ ދެ މީހުން ވެސް މަގާމުން ވަކިކޮށްފައިވާކަމަށް ބައެއް މީޑިއާތަކުން ރިޕޯޓްކޮށްފައިވެ އެވެ.

ޝަމްނާޒް ކުރިން ކައިވެނިކޮށްގެން އުޅުނީ މިހާރު ސަސްޕެންޑް ކޮށްފައިވާ ރައީސުލްޖުމްހޫރިއްޔާ އޮފީހުގެ މިނިސްޓަރު އާދަމް ރަމީޒާ އެވެ. ނަމަވެސް އެ ކައިވަނި ނިމުމަކަށް އައިސްފައިވާ ކަމަށް މި މައްސަލައިގެ ތެރެއިން ވަނީ ހާމަވެފަ އެވެ.