ކުދިބޮޑު ގިނަބަޔަކު އިންތިޒާރުކުރަމުން އަންނަ ފިލްމު "ރޮބޯމޭން – ދަ މޫވީ"ގެ ޓިކެޓް ގަންނަން ބޭނުންވާ ފަރާތްތަކަށް ޓިކެޓް ބުކް ކުރުމުގެ ފުރުސަތު ހުޅުވާލައިފި އެވެ.

ރޮބޯމޭން ދަ މޫވީ ރިލީޒްކުރުމަށް ހަމަޖެހިފައި ވަނީ މިމަހުގެ 26 އިން ފެށިގެން އޮލިމްޕަސް ސްކްރީނުގަ އެވެ. މި ފިލްމުގެ ޓިކެޓް ބުކް ކުރަން ބޭނުންވާ ފަރާތްތަކުން 7656000 ނަމްބަރަށް ގުޅައިގެން މިހާރު ޓިކެޓް ބުކް ކުރެވޭނެ ކަމަށް މީޑިއާނެޓުން ބުނެ އެވެ.

ރޮބޯމޭން އަކީ ފާއިތުވި އަހަރުތަކުގައި ގިނަ ދިވެހިންގެ މަގްބޫލުކަން ހޯދާފައިވާ ހުނަރުވެރި ތަރިއެކެވެ. ޚާއްސަކޮށް ކުޑަކުދިންގެ ހިތުގައި ރޮބޯމޭންވަނީ ހާއްސަ ޖާގައެއް ހޯދާފަ އެވެ. ރޮބޯމޭން ދަ މޫވީގެ އޮޑިޝަންގައި ވެސް ވަނީ 100 އަށް ވުރެ ގިނަ ކުދިން ބައިވެރިވެފަ އެވެ. މިދިޔަ މަހު ވަނީ މި ފިލްމުގައި ހަރަކާތްތެރިވާ ތަރިން، ފިލްމުގެ ޕޯސްޓަރު އަދި ފިލްމުގެ ޓްރެއިލާ ރިލީޒްކޮށްފަ އެވެ.

މީޑިއާނެޓްގެ އެމް އޮޖިނަލްސް ބެނާގެ އުފައްދާ މި ފިލްމަކީ އޯކޭޒް އިންކް އަދި މީޑިއާނެޓުގެ ވީޑިއޯކްލަބްގެ ފަރާތުން އުފައްދާ ފިލްމެކެވެ. މި ފިލްމުގެ ޝޯވްތައް އޮލިމްޕަސް ސްކްރީނުގައި އެޅުވުމަށް ހަމަޖެހިފައި ވަނީ މެންދުރުފަހު އެވެ. އެއީ ވީހާވެސް ގިނަ ކުޑަކުދިންނަށް ފިލްމު ބަލާލުމުގެ ފުރުސަތު ދިނުމުގެ ގޮތުންކަމަށް ފިލްމު އުފައްދާ ފަރާތުން ބުނެ އެވެ.

މި ފިލްމާ ބެހޭ އެންމެ ފަހުގެ މައުލޫމާތާއި ފިލްމުގެ ބައެއް މަންޒަރުތައް ފޭސްބުކް އަދި އިންސްޓަގްރާމް މެދުވެރިކޮށް ބެލުންތެރިންނަށް ލިބޭނެ އެވެ. ރޮބޯމޭން ދަ މޫވީ އަށް ޚާއްސަ ސޯޝަލް މީޑިއާ ޕޭޖެއް ވަނީ ތައާރަފްކޮށްފަ އެވެ.