ސަރުކާރު ތެރޭގައި ހާއްސަކޮށް ސަރުކާރު ހިއްސާވާ ކުންފުނިތަކުގައި ކޮރަޕްޝަންގެ އަމަލުތައް އިތުރުވެފައިވާއިރު، މިފަހަރު ހިޔާނާތުގެ ތުހުމަތުތަކެއް ކުރެވިފައި ވަނީ ފިއުލް ސަޕްލައި މޯލްޑިވްސް (އެފްއެސްއެމް) އަށެވެ.

އެފްއެސްއެމްގެ ތެޔޮބޯޓުތަކުން ނުއަގުގައި ތެޔޮ ވިއްކަމުން ދާކަމަށް އެ މައުލޫމާތު ރަނގަޅެއް އެނގޭ މީހަކު ވަނީ "ހުރިހާ" އަށް މައުލޫމާތު ދީފަ އެވެ. އެގޮތުން މި ހިޔާނާތުގެ އަޑީގައި ހުންނެވީ އެ ކުންފުނީގެ މެނޭޖިން ޑިރެކްޓަރު އިސްމާއިލް ސުހައިލް ކަމަށް ވަނީ ތުހުމަތު ކޮށްފަ އެވެ.

ކޮރަޕްޝަން ހިންގުމަށް ސުހައިލް އަށް ކުންފުނީގެ ދެ މުވައްޒަފަކު އެހީތެރިވެ އެވެ. ތެޔޮ ބޯޓުތަކުގައި މަސައްކަތްކުރާ މުވައްޒަފުން ލައްވާ ތެޔޮ ވިއްކައިގެން ލިބޭ ފައިސާގެ ތެރެއިން ބައެއް އެމްޑީއަށް ނަގާ ކަމަށް ބުނެފައިވެ އެވެ. އެގޮތުން ހަފްތާއަކު، ހަތަރު ލައްކަ ރުފިޔާ އާއި ފަސްލައްކަ ރުފިޔާ އާ ދެމެދުގެ އަދަދެއް ތެޔޮ ވިއްކައިގެން ނަގާ ކަމަށާއި، އޭގެ ތެރެއިން މަދުވެގެން ލައްކައަކަށް ވުރެ ގިނަ ރުފިޔާ ކޮންމެ ދުވަހަކު ވެސް އެމްޑީގެ ފަރާތުން އަންނަ ދެމީހަކަށް ހަވާލުކުރާ ކަމަށްވެ އެވެ.

ބައެއްފަހަރު އެމްޑީގެ އަމިއްލަ އެކައުންޓަށާއި އޭނާގެ މަސްލަހަތު އޮންނަ ޖަމިއްޔާއެއްގެ އެކައުންޓަށް ވެސް ފައިސާ ޖަމާކުރަމުން ގެންދާ ކަމަށްވެ އެވެ. މީގެއިތުރުން ތެޔޮ ބޯޓުތަކުން ވިއްކާ ތެލުން ލިބޭ ފައިސާ މި ޖަމިއްޔާގެ އެކައުންޓަށް އެތައް ފަހަރަކު ފޮނުވާފައިވާ ކަމަށް މައުލޫމާތު ދިން ފަރާތުން ބުންޏެވެ.

އެމްޑީއަށް ކުރެވޭ ހިޔާނާތުގެ ތުހުމަތުތަކާއެކު، ކުންފުނީގެ ބޯޑުން މި މައްސަލަ ބަލަންފެށި ނަމަވެސް ފަހުން މައްސަލަ ހުއްޓިފައިވާ ކަމަށް އެ ކުންފުނީގެ މުވައްޒަފަކު ބުންޏެވެ.

ސަރުކާރު ތެރޭގައި ކޮރަޕްޝަންގެ އެތައް މައްސަލަތަކެއް ރައްޔިތުންގެ ސަމާލުކަމަށް އައިސްފައިވާއިރު، ކޮރަޕްޝަން ހިންގާ ފަރާތްތަމާމެދު ސަރުކާރުން އެއްވެސް ފިޔަވަޅެއް ނާޅަ އެވެ. އެޗްޑީސީގެ އެމްޑީ ފަޒްލް ރަޝީދުއަށް ވެސް ބޮޑެތި ތުހުމަތުތަކެއް ކުރެވޭއިރު ރަސްމީ އެއްވެސް އިދާރާއަކުން އެ މައްސަލަތައް ނުބަލަ އެވެ.