ތަހުގީގީ ނޫސްވެރިކަމުގެ ދާއިރާއިން އަދަދު ނޫހަށް އެވޯޑު ލިބުމުން މީޑިއާ ކައުންސިލްގެ ރައީސް އަހްމަދު މުސްތަފާ ޕީއެސްއެމްގައި އަދާކުރަމުންދިޔަ ވަޒީފާއިން ވަކިކޮށްފި އެވެ.

ޕީއެސްއެމްގެ އޮފިޝަލަކު ވަނީ "ހުރިހާ"އަށް އެކަން ކަށަވަރުކޮށްދީފަ އެވެ. މުސްތަފާ ވަޒީފާއިން ވަކިކުރި ސަބަބު ކަމަށް ކަނޑައަޅާފައި ވަނީ ޕީއެސްއެމްގެ ޗެނަލްތަކުން ބްރޯޑްކާސްޓް ނުކުރަންޖެހޭ މަންޒަރެއް ބްރޯޑްކާސްޓްކުރެވިފައިވުމެވެ. އެކަމުގައި މުސްތަފާ ކުށްވެރިކުރިއިރު، އޭނާ އެކަމުގެ ޒިންމާ ނަންގަވަންޖެހޭ އެއްވެސް ސަބަބެއް ނެތް ކަމަށް އެ އޮފިޝަލް ވިދާޅުވި އެވެ.

"މިއީ ސަރުކާރުން އަންގައިގެން ނިންމި ނިންމުމެއް ކަމަށް އަޅުގަނޑަށް ތުހުމަތު ކުރެވެނީ. މިއީ ނުހައްގުން މުސްތަފާއަށް ދިން ވަރަށް ބޮޑު އަނިޔާއެއް،" އޮފިޝަލް ވިދާޅުވި އެވެ.

ތަހުގީގީ ނޫސްވެރިކަމުގެ ދާއިރާއިން އަދަދު ނޫހަށް އެވޯޑު ލިބިފައި ވަނީ ރައީސް ޑރ. މުހައްމަދު މުއިއްޒުގެ ދޮންމަންމަގެ ކަންބޮޑުވުންތައް ހިމަނައިގެން އަދަދު ނޫހުން ގެނެސްދިން ވީޑިއޯ ރިޕޯޓަށެވެ. އެ ރިޕޯޓްގައި ރައީސް މުއިއްޒު ދޮންމަންމައާ މެދު އަމަލުކުރެއްވި އިހާނެތި ގޮތްތައް ހެއްކާއެކު ގެނެސްދީފައިވެ އެވެ.

މީޑިއާ ކައުންސިލްގެ ރައީސް މުސްތަފާ ޕީއެސްއެމްގައި އަދާކުރަމުންދިޔަ ވަޒީފާއިން ވަކިކުރުމުން ގިނަ ބަޔަކު ދަނީ އެކަމާ ކަންބޮޑުވުންފާޅުކުރަމުންނެވެ.

މުސްތަފާ ވަޒީފާއިން ވަކިކޮށްފައި މިވަނީ ރައީސް މުއިއްޒަށް މިނިވަންމުއައްސަސާތަކަށް ނުފޫޒުފޯރުވޭގޮތަށް ބައެއް ގާނޫނުތަކަށް އިސްލާހު ގެންނަން ހުށަހަޅާފައިވާ ކަމަށް ރައްޔިތުންގެ މަޖިލީހުގެ މެމްބަރުން ތުހުމަތުކުރަމުން އަންނަ ދަނޑިވަޅެއްގަ އެވެ.

އެގޮތުން އިލެކްޝަންސް ކޮމިޝަނާއި އެންޓި ކޮރަޕްޝަން ކޮމިޝަންގެ ރައީސާއި ނައިބު ރައީސް އައްޔަންކުރުމުގެ ބާރު ރައީސް މުއިއްޒަށް ލިބޭގޮތަށް ގާނޫނު އިސްލާހުކުރަން ސަރުކާރުން ވަނީ މަޖިލީހަށް އެކަން ހުށަހަޅާފަ އެވެ.