މަޝްހޫރު ސީރީޒް "ވެމްޕައާ ޑައިރީސް"ގެ ތަރި ނީނާ ޑޮބްރޭވްއާއި އޭނާގެ ލޯބިވެރިޔާ ކުރީގެ އޮލިމްޕިކްސް އެތުލީޓް، ޝޯން ވައިޓް އެންގޭޖް ވެއްޖެ އެވެ.

ޝޯން ނީނާއަށް ކައިވެނި ހުށައަޅާފައިވަނީ ނިއުޔޯކްގެ ގޯލްޑް ސްވޯން ރެސްޓޯރެންޓްގައި މީގެ ދެތިން ދުވަސް ކުރިންނެވެ. އެންގޭޖްމަންޓް އަނގޮޓިއެއްގެ ގޮތުގައި ހަދިޔާކުރީ ފަސް ކެރެޓްގެ އަގުބޮޑު ޑައިމަންޑް އަނގޮޓި އެކެވެ.

2019 ވަނަ އަހަރުން ފެށިގެން ލޯބީގެ ގޮތުން ގުޅިގެން އުޅޭ އެ ދެމީހުން އެންގޭޖްވިކަން ޔަގީން ކޮށްދީފައވަނީ ނީނާ އޭނާގެ އިންސްޓަގްރާމްގައި ކުރި ޕޯސްޓެއްގަ އެވެ.

ނީނާއާއި ޝޯން އެންމެ ފަހުން އެންގޭޖް ވެފައި މިވަނީ ކައިވެނި ހުށައަޅަން ޝޯން ދެފަހަރެއްގެ މަތިން މަސައްކަތް ކޮށް އެކަން ނާކާމިޔާބުވެފައި ވަނިކޮށެވެ.

އެންމެ ފުރަތަމަ އެކަން ކުރަން މަސައްކަތްކުރި ފަހަރު އެކަން ނިމިގެންދިޔައީ ނީނާގެ ކަކުލަށް އަނިޔާވެގެންނެވެ. ދެވަނަ ފަހަރު ޝޯން ކައިވެނި ހުށައަޅަން މަސައްކަތްކުރީ ކޭޕްޓައުންގަ އެވެ.

އެހެން ނަމަވެސް ހުރަސްތަކަކަށްފަހު އެންމެ ފަހުން ދެ ލޯބިވެރިން އެންގޭޖްވެފައިވާއިރު ހޮލީވުޑްގެ ތަރިންނާއި އާއްމުންވެސް އަންނަނީ އެ ދެމީހުންނަށް މަރުހަބާ ކިޔަމުންނެވެ.