ހިޔާނާތުގެ ތުހުމަތުކުރެވޭ އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް މޯލްޑިވްސް ކަރެކްޝަނަލް ސާވިސްގެ ވަޒީފާއިން ސަސްޕެންޑުކޮށްފި އެވެ.

އޭނާ ސަސްޕެންޑްކޮށްފައިވަނީ ކަރެކްޝަންސްގެ ޕްރިޒަންސް ކުލަބުގެ އެކައުންޓުން 200،000 އަށްވުރެ ގިނަ ރުފިޔާ އެކި އެކައުންޓުތަކަށް ޖަމާކުރިކަމަށް ބުނާ މައްސަލައާއި ގުޅިގެންނެވެ.

މި މައްސަލަ ފެންމަތިވެފައިވަނީ މިދިޔަ ޖުލައި މަހުގަ އެވެ. އެ ހިޔާނާތުގެ އަޑީގައި ހުންނެވީ އެ ކުލަބުގެ ރައީސްކަން ވެސް ކުރައްވާ އާސިފް ކަމަށް ބައެއް މުވައްޒަފުން އޭރުވަނީ ތުހުމަތުކޮށްފަ އެވެ.

އިއްޔެގެ ވަގުތެއްގައި އާސިފް ކަރެކްޝަންގެ ވަޒީފާއިން ވަގުތީގޮތުން ސަސްޕެންޑްކޮށް އެ އިދާރާގެ ހިއުމަން ރިސޯސް ސެކްޝަންގެ ހުއްދަ ނެތި ކަރެކްޝަންގެ އެއްވެސް އިމާރާތަކަށް އާސިފު ވަނުންވެސް ވަނީ މަނާކޮށްފަ އެވެ.

އޭނާ ސަންސްޕެންޑްކޮށް މިފަދައިން ފިޔަވަޅުއަޅާފައިވާކަން ހާމަކޮށްފައިވަނީ އިއްޔެ އެ އިދާރާގެ މުވައްޒަފުންނަށް ފޮނުވި އެންގުމެއްގައި އެވެ.

އާސިފްއަށް ފިޔަވަޅު އަޅާފައި މިވަނީ މިދިޔަ އޮގަސްޓް މަހު އޭނާގެ މައްސަލަ ބަލާދިނުމަށް އެދި އެ އިދާރާގެ އޮފިސަރުންތަކެއް ކޮމިޝަނާ އޮފް ޕްރިޒަންސް ހަސަން ޒަރީރަށް ޕެޓިޝަނެއްވެސް ހުށަހަޅާފައިވަނިކޮށެވެ.