މުސްލިމު ނޫން ފަރާތްތަކަށް ރަސްމާލެއިން ދާއިމަށް ބިން ދޫކުރުމަކީ ފަލަސްތީނުގެ ބިންތައް ޒަޔަނިސްޓުންނަށް ލިބިގެންދިޔަ ފަދަ ނުރައްކާތެރި މުސްތަގުބަލަކަށް މަގުފަހިވާނެ ކަމެއް ކަމަށް އެމްޑީޕީގެ ކުރީގެ ޗެއާޕާސަން އަދި ކުރީގެ މިނިސްޓަރު ފައްޔާޒް އިސްމާއިލް މިއަދު ވިދާޅުވެއްޖެ އެވެ.

ފައްޔާޒް މިފަދައިން ވިދާޅުވީ ރާއްޖެ ޓީވީގެ ޕްރޮގްރާމެއްގައި ވާހަކަދައްކަވަމުންނެވެ.

ސިޓިޒަންޝިޕް ނެތް ބޭރުގެ ފަރާތްތަކަށް ރަސްމާލެއިން ދާއިމަށް ބިން ލިބޭގޮތަށް ހަމަޖެއްސުމުން، އެ ސަރަހައްދުގައި ދިރިއުޅޭ މުސްލިމު ނޫން މީހުންގެ ސަބަބުން ދުރު މުސްތަގުބަލުގައި ގައުމީ ސަލާމަތަށް ނުރައްކާތައް ކުރިމަތިވެދާނެ ކަމަށް ވިދާޅުވެ އޭނާ ކަންބޮޑުވުން ފާޅުކުރެއްވި އެވެ.

ދުނިޔޭގެ ބާރުގަދަ ގައުމުތަކާއި ބައިނަލްއަގުވާމީ މުޖުތަމައު މެދުވެރިކޮށް، އެފަދަ ފަރާތްތަކުގެ ދީނީ އަދި މަދަނީ ހައްގުތަކުގެ ނަމުގައި ގާނޫނުތަކަށް ބަދަލު ގެންނަން ޖެހޭ ހާލަތަކަށް ކަންކަން ގޮސްދާނެ ކަމަށް ފައްޔާޒު ވިދާޅުވި އެވެ. މިއީ އެތައް ގަރުނެއްގެ ތެރޭގައި ގައުމެއްގެ މިނިވަންކަމާއި ސިޔާދަތަށް ނުރައްކާވެދާނެ ފަދަ ކަމެއް ކަމަށް އޭނާ ފާހަގަކުރެއްވި އެވެ.

ފަލަސްތީނުގެ މައްސަލަ އުފެދިގެން އައިގޮތުގެ މައްޗަށް އަލިއޅުވާލައްވަމުން ފައްޔާޒް ވިދާޅުވީ، އޭރުގެ އޮޓަމަން އެމްޕަޔާގެ ދަށުގައި ފަލަސްތީން އޮތް ދުވަސްވަރު ޒަޔަނިސްޓު ޖަމާއަތްތަކުން އެ ސަރަހައްދުގެ ބިންތައް މަޑުމަޑުން ގަންނަމުން ގޮސް މިއަދު ބޮޑު ކާރިސާއަކަށް ވެފައިވާ ކަމަށެވެ. އެގޮތުން ބޭރުގެ ފަރާތްތަކަށް ބިން މިލްކުކޮށްދިނުމުގެ ސަބަބުން ދިގު މުއްދަތެއްގެ ތެރޭގައި އެ މީހުންގެ ނުފޫޒު ގަދަވެ، ދައުލަތުގެ ބާރުތައް ގެއްލިގެން ހިނގައިދާނެ ކަމުގެ އިންޒާރު އޭނާ ދެއްވި އެވެ.

"އެކަމަކު މިހާރު އޮތްގޮތުން އެވަނީ އެހެން. ކުއްޔޭ ބުނަނީ. އެކަމަކު ދާއިމަށް އެ ލިބެނީ. ދެން އޭގެ ސަބަބުން އުފެދިދާނެ ކަންތައްތަކީ ތިބޭފުޅުން މީގެ ދެތިން ސަތޭކަ އަހަރު ކުރިންސުރެ އަސްލު ފަލަސްތީނުގެ މިއަދުގެ މައްސަލަ ދިމާވާން ފެށީ އޭރުގެ އޮޓަމަން އެމްޕަޔާގެ ދަށުގައި ފަލަސްތީން އޮތްއިރުގައި އެކި ގައުމުތަކުގެ ޔަހޫދީން، ޒަޔަނިސްޓު ރެޖީމް، ޒަޔަނިސްޓު އޭރުގެ އެއޮތް އޯގަނައިޒޭޝަނުން ފަލަސްތީނުގެ ބިންތައް ގަންނަން ފެށީ. ގަންނަން ފަށައިގެން މަޑު މަޑުން، މަޑު މަޑުން ގޮސް 200 އެއްހާ އަހަރުވީ އިރުގައި މިއޮތީ ބޮޑު ކަންތައް ގަނޑަކަށް މިކަން ހަދާފައި. އެމީހުންނަށް އެ ބިމަށް ހައްގުތަކެއް އެހާ ހިސާބުން އެ އައީ،" ފައްޔާޒް ވިދާޅުވި އެވެ.

ނަމަވެސް، ރާއްޖޭގެ ރައްޔިތުކަން މުސްލިމު ބިދޭސީންނަށް ދިނުމަށްފަހު އެ ފަރާތްތަކަށް ބިން ވިއްކުމާ މެދު މާބޮޑު މައްސަލައެއް ނެތް ކަމަށް ފައްޔާޒް ވިދާޅުވި އެވެ. މިފަދަ ބޮޑެތި އަދި ދުރުރާސްތާގެ އަސަރުތަކެއް ކުރާނެ ނިންމުންތައް ނިންމުމުގެ ކުރިން ސަރުކާރުން ކާބަފައިންގެ ޒަމާނުއްސުރެ އޮންނަ އުސޫލުން ރައްޔިތުންގެ ފަރާތުން ބަހެއް ހޯދަންޖެހޭނެ ކަމަށް އޭނާ ވިދާޅުވި އެވެ.

ރަސްމާލެ ތަރައްގީ ކުރުމަށްޓަކައި އީގަލް ހިލްސް އާ ހަވާލުކޮށްފައިވަނީ ވަކި ހާއްސަ އުސޫލުތަކެއްގެ މަތިންނެވެ. މި މަޝްރޫޢުގެ ދަށުން ބިދޭސީންނަށް ދިގު މުއްދަތަކަށް ދިރިއުޅެވޭ ގޮތަށް އެޕާޓްމަންޓުތަކާއި ވިލާތައް ވިއްކުމަށް މިހާރު ވަނީ ހުޅުވާލާފަ އެވެ. ސަރުކާރަށް މި މަޝްރޫއުން އާމްދަނީ ލިބޭނީ އެ ތަންތަން ވިއްކައިގެން ލިބޭ ފައިސާއިން ކަނޑައެޅިފައިވާ ޕަސެންޓެކެވެ.