ޕެރަމައުންޓްއާއި ވާނާ ބްރޯސް އެއްކޮށްލުމަށް ވި އެއްބަސްވުން ފައިނަލްވެ މުޅި ކުންފުނީގެ މައި ނަން "ސްކައިޑާންސް"ގެ ނަމަށް ބަދަލު ކުރުމަށް ނިންމައިފި އެވެ.

ޑޭވިޑް އެލިސަން އިސްކޮށް ހުންނަވައިގެން ހިންގި 110 ބިލިއަން ޑޮލަރުގެ މި ބޮޑު އެއްބަސްވުމާއެކު، ހޮލީވުޑްގެ އެންމެ ބޮޑު ދެ ކުންފުނި މިވަނީ އެއް ފުރާޅެއްގެ ދަށަށް އައިސްފަ އެވެ.

މި އެއްބަސްވުމުގެ ދަށުން ދުނިޔޭގެ އެންމެ މަޝްހޫރު ގިނަ ފްރެންޗައިޒްތަކާއި، ސްޓްރީމިންގް ހިދުމަތްތައް ވަނީ އެއް ފުރާޅެއްގެ ދަށަށް އައިސްފަ އެވެ.

މީގެ ތެރޭގައި ހެރީ ޕޮޓާ، ގޭމް އޮފް ތުރޯންސް، ސުޕަމޭން، ބެޓްމޭން، ސްޓާ ޓްރެކް، މިޝަން އިމްޕޮސިބަލް، ޓޮޕް ގަން، ދަ ގޯޑްފާދާ އަދި ސުޕޮންޖްބޮބް ފަދަ މަޝްހޫރު ފްރެންޗައިޒްތައް ހިމެނެ އެވެ.

މީގެ އިތުރުން ސްޓްރީމިން ހިދުމަތްތައް ކަމަށްވާ ޕެރަމައުންޓް ޕްލަސް، އެޗްބީއޯ މެކްސް އަދި ޕްލޫޓޯ ޓީވީ ވެސް ދެން ހިންގާނީ މި މައި ކުންފުނީގެ ދަށުންނެވެ.

މި ބަދަލާއެކު ޕެރަމައުންޓް ޕްލަސް އަދި އެޗްބީއޯ މެކްސް އެއްކޮށްލައި، އެއް ސްޓްރީމިންގ ހިދުމަތެއްގެ ގޮތުގައި ކުރިއަށް އޮތް ތަނުގައި ފެނިގެންދާނެ އެވެ.

މި ދެ ހިދުމަތް އެއްކޮށްލުމުން ސަބްސްކްރައިބަރުންގެ އަދަދު 200 މިލިއަނަށް ވުރެ މައްޗަށް އަރާނެ އެވެ. ނަމަވެސް، އާ ސްޓްރީމިންގް އެޕަށް ކިޔާނެ ނަމާއި، އަގުތަކަށް އަންނާނެ ބަދަލުތައް އަދި އިއުލާނެއް ނުކުރެ އެވެ.

މި ބަދަލުތައް އައި ނަމަވެސް، ސިނަމާތަކުގައި އަޅުވާ ފިލްމުތަކުގައި "ޕެރަމައުންޓް" އަދި "ވާނާ ބްރޯސް"ގެ ނަން ކުރިއެކޭވެސް އެއްގޮތަށް ބޭނުން ކުރަމުން ދާނެކަމަށް ޑޭވިޑް އެލިސަން ވަނީ ކަށަވަރު ކޮށްދެއްވާފަ އެވެ.

ލޮސް އެންޖެލިސްއާއި ހޮލީވުޑްގެ ގިނަ ބަޔަކު ވަޒީފާ އަދާކުރަމުންދާ މި ދެ ސްޓޫޑިއޯ އެއްކޮށްލުމާ ގުޅިގެން، ކުންފުނިން ވަނީ ހަ ބިލިއަން ޑޮލަރުގެ ހަރަދު ކުޑަ ކުރުމުގެ އަމާޒެއް ހިފާފަ އެވެ.

ނަމަވެސް ކުންފުނީގެ މެނޭޖްމަންޓުން ބުނެފައިވަނީ މި ހަރަދު ކުޑަކުރާނީ ޓެކްނޮލޮޖީއާއި ރިއަލް އެސްޓޭޓް ފަދަ ދާއިރާތަކުން ކަމަށާއި، ވަޒީފާތައް މަަދު ކުރުމަކީ މައިގަނޑު އަމާޒު ނޫން ކަމަށެވެ.