އެސްޓީއޯގެ ދަށުން ހިންގާ ސަބްސިޑަރީ ކުންފުނި އެފްއެސްއެމްގެ ތެޔޮ ވައްކަން ފަޅާއަރާފައި ވަނިކޮށް އެސްޓީއޯގެ މެނެޖިން ޑިރެކްޓަރު ޝިމާދު އިބްރާހިމް އިސްތިއުފާ ހުށަހަޅުއްވައިފި އެވެ.

ފިއުލް ސަޕްލައި މޯލްޑިވްސްގެ ބޮޑު ހިޔާނާތެއް ދާދިފަހުން ވަނީ ފެންމަތިވެފަ އެވެ. އެގޮތުން އެފްއެސްއެމްގެ ކުރީގެ މެނޭޖިން ޑިރެކްޓަ އިސްމާއިލް ސުހައިލް އަޑީގައި ހުންނަވައިގެން އެކުންފުނީގެ ތެޔޮ ބޯޓުތަކުން ނުއަގުގައި ތެޔޮ ވިއްކަވައިގެން ނާޖާއިޒު ފައިދާ ނަގާކަމުގެ ތުހުމަތު ކުރެވުނެެވެ.

އެ ތުހުމަތު ތަކާއެކު ފާއިތުވި ހަފްތާގައި ސުހައިލް ވެސް ވަނީ އިސްތިއުފާ ދެއްވާފަ އެވެ.

ސިމާދުގެ އިސްތިއުފާއާއި ގުޅޭގޮތުން ރަސްމީ ބަހެއް ލިބިފައި ނުވިނަމަވެސް، "ހުރިހާ" އަށް ވަނީ އޭނާ އިސްތިއުފާ ހުށަހަޅާފައިވާކަން ކަށަވަރުވެފަ އެވެ.

އެފްއެސްއެމް ހިޔާނާތާ ގުޅިގެން ރައީސް އޮފީހުން ދަނީ އެސްޓީއޯގެ ބޯޑަށް ބަދަލުތަކެއް ގެނައުމަށް މަސައްކަތް ކުރަމުންކަމަށް މައުލޫމާތު ލިބިފަ އެވެ.

އެފްއެސްއެމްގެ ބައެއް މުވައްޒަފުން ތެލުން ވައްކަންކޮށް އެއިން ލިބޭ ފައިސާއަށް ހިޔާނާތްތެރިވެ ފައިސާ ލޯންޑާ ކުރަމުންދާކަމުގެ ޝައްކުކުރެވޭ މައްސަލައެއް ފުލުހުން ތަހުގީގު ކުރަން ފަށާފައިވާކަން ހޯމް މިނިސްޓަރު އަލީ އިހުސާން ވަނީ އާދިއްތަ ދުވަހު ހާމަކުރައްވާފަ އެވެ.

އެނގިފައިވާގޮތުގައި މި މައްސަލައިގައި އެފްއެސްއެމްގެ 45 އަށްވުރެ ގިނަ މުވައްޒަފުން ވަނީ ވަޒީފާއިން ވަކިކޮށްފަ އެވެ.