އިނގިރޭސި ޝާހީ އާއިލާއިން ވަކިވެ، ވަކި ދިރިއުޅުމެއް އުޅެމުން އަންނަ ޕްރިންސް ހެރީއާއި އޭނާގެ އަންހެނުން މޭގަން މާކަލްގެ ހަޔާތުގެ މައްޗަށް ހަދާފައިވާ ޑޮކިއުމެންޓްރީއެއް ޖަރުމަނުގައި ވަނީ ދާދި ފަހުން ރިލީޒް ކޮށްފަ އެވެ.

މި ޑޮކިއުމެންޓްރީގެ ސަބަބުން ހެރީގެ ދެމަފިރިންނަށް ވާނެ ފައިދާއެއް ނެތް ކަމަށާއި ލިބެންޏާ ލިބޭނީ ވެސް ގެއްލުން ކަމަށް މާހިރުން ބުނެ އެވެ.

މިކަމާ ބެހޭގޮތުން ޝާހީ އާއިލާގެ ކަންތައްތައް ބަލާ ތަޖުރިބާކާރަކު ވިދާޅުވީ އާއްމުންގެ މެދުގައި ހެރީއާއި މޭގަން މަގުބޫލުކަން ކުޑަވެފައިވާ މި ދަނޑިވަޅުގައި އެ ޑޮކިއުމެންޓްރީ ނެރުމުން އެމީހުންގެ މަގުބޫލުކަން އިތުރަށް ކުޑަވާނެ ކަމަށެވެ.

"ހެރީ - ދަ ލޮސްޓް ޕްރިންސް"ގެ ނަމުގައި އުފައްދާފައިވާ އެ ޑޮކިއުމެންޓްރީ ޖަރުމަނުގައި ރިލީޒް ކުރެވުނު ނަމަވެސް އެމެރިކާއާއި އިނގިރޭސި ވިލާތުގައި ރިލީޒްއެއް ނުކުރާނެ އެވެ.

ހަބަރުތައް ބުނާ ގޮތުގައި އެ ޑޮކިއުމެންޓްރީގައި ދައްކުވައިދޭނީ 2020 ވަނަ އަހަރު ހެރީއާއި މޭގަން ޝާހީ އާއިލާއިން ވަކިވާން މަގުފަހިވި ކަންކަމާއި އެ ދެމީހުން ވަކިވުމަށްފަހު ޝާހީ އާއިލާއަށް އައި ބަދަލުތަކެވެ.

ޝާހީ އާއިލާއާއި ހެރީގެ ދެމަފިރިންނާ ދެމެދު އޮތް ގުޅުން ވަރަށް ބޮޑަށް ހީނަރުވެފައިވާއިރު އެ ގުޅުން އިތުރަށް ކުޑަވީ ހެރީގެ ބައޮގްރަފީ ނެރުނު ހިސާބުންނެވެ.