ެކުނު ކޮރެއާގެ ރައީސް ޔޫން ސުކް ޔިއޯލްގެ އިތުބާރުނެތްކަމަށް ވޯޓުނަގައި މަގާމުން ދުރުކުރުމަށް އެގައުމުގެ ޕާލިމަންޓުން ފާސްކޮށްފި އެވެ.

މި ވޯޓަކީ ރައީސް ޔޫން ކުއްލިއަކަށް އެގައުމުގައި މާޝަލް ލޯ އިއުލާންކުރުމަށް ކުރެއްވި މަސައްކަތާ ގުޅިގެން އޭނާގެ އަމިއްލަ ޕާޓީންއާވެސް ދެކޮޅަށް ނުކުންނަވައި އިސްތިއުފާ ދިނުމަށް އިންކާރުކުރުމާ ގުޅިގެން ނަގާފައިވާ ވޯޓެކެވެ.

މިއީ ފާއިތުވި ދިހަ އަހަރު ތެރޭގައި ކޮރެއާގެ ވެރިއަކު މަޤާމުގައި ހުއްޓާ އިމްޕީޗްމަންޓް އިޖުރާއަތަކާ ކުރިމަތިލާންޖެހުނު ދެވަނަ ފަހަރެވެ. ވޯޓާއިއެކު އެ ޤައުމުގެ ކޮންސްޓިޓިއުޝަނަލް ކޯޓުންވަނީ މި މައްސަލައާ މެދު ފަހުގެ ނިންމުމެއް ނިންމަންދެން ޔޫންގެ ބާރުތައް ވަގުތީގޮތުން ހިފެހައްޓައި ސަސްޕެންޑްކޮށްފަ އެވެ.

ދެކުނު ކޮރެއާގެ ގާނޫނު ބުނާގޮތުން ބޮޑުވަޒީރު ހާން ޑަކް-ސޫ، ވަގުތީ ރައީސްގެ ގޮތުގައި މަސައްކަތް ކުރައްވާނެ އެވެ. އޭނާ ނޫސްވެރިންނަށް ވިދާޅުވެފައިވަނީ ދައުލަތުގެ ކަންކަން ހަރުދަނާކޮށް ހިންގުމަށް ހުރިހާ މަސައްކަތެއް ކުރާނެ ކަމަށެވެ.

ރައީސް ޔޫން ވަނީ ޑިސެމްބަރު 3 ވަނަ ދުވަހު ކުއްލިއަކަށް މާޝަލް ލޯ އިޢުލާންކޮށް، ސިފައިން ޕާލަމެންޓަށް ފޮނުވައިފަ އެވެ. އަދި އޭގެފަހުން މާޝަލް ލޯ އުވާލުމަށް ޕާލިމަންޓުން ވަނީ ގަރާރެއް ފާސްކޮށްފަ އެވެ.

ޔޫންގެ މި ނިންމެވުމުގެ ސަބަބުން ވަނީ ބޮޑު ނާކާމިޔާބީއަކާއި ކުރިމަތިލައްވަން ޖެހިވަޑައިގެންފަ އެވެ. އޭގެ ފަހުން އެތައް ބަޔަކު ދިޔައީ އޭނާގެ އިސްތިއުފާއަށް ގޮވާލަމުންނެވެ.

އެއަށްފަހު އިދިކޮޅު ޕާޓީތަކުން މީގެ ހަފުތާއެއް ކުރިން އޭނާ އިމްޕީޗްކުރަން މަސައްކަތް ކުރި އެވެ. ނަމަވެސް ޔޫންގެ ވެރިކަން ކުރާ ޕީޕަލްސް ޕަވާ ޕާޓީގެ މެންބަރުން ވޯޓުގައި ބައިވެރިނުވެ ބޮއިކޮޓްކޮށް، ރައީސް އަމިއްލައަށް އިސްތިއުފާ ދޭނެ ކަމަށް އުންމީދުކުރާކަމަށް އެ ޕާޓީން ބުނުމުން ޔޫން އެ ވޯޓުން ސަލާމަތްވެ ވަޑައިގެންނެވި އެވެ.

އޭގެފަހުން ޔޫން އިތުރަށް ބާރުގަދަކޮށް ބުރާސްފަތި ދުވަހު ދެއްވި ހިތާބެއްގައި އޭނާގެ މާޝަލް ލޯ ނިންމުން ދިފާއުކޮށް، އިދިކޮޅު ފަރާތްތަކަށް ފާޑުކިޔުއްވައި، އޭނާ މަސައްކަތް ކުރައްވަމުން ގެންދެވީ ޤައުމު ސަލާމަތްކުރަން ކަމަށް ވިދާޅުވެ، އެންމެ ފަހު ވަގުތާ ހަމައަށް ވެސް ރައްޔިތުންނާއެކު ހަނގުރާމަ ކުރައްވާނެކަމަށް ވައުދުވެވަޑައިގަތެވެ.

ނަމަވެސް އެ ހިތާބުގެ ކުޑައިރުކޮޅެއް ކުރިން، ޔޫންގެ ޕާޓީގެ ލީޑަރު ވަނީ ރައީސަށް ދެމުން އައި އެހީތެރިކަން އަނބުރާ ގެންގޮސް، އިމްޕީޗްމަންޓަކީ ޑިމޮކްރަސީ ދިފާއުކުރުމަށް އޮތް ހަމައެކަނި ގޮތް ކަމަށް ބުނެ، މެންބަރުން ބޭނުން ގޮތަކަށް ވޯޓު ދިނުމަށް އެދިފަ އެވެ.

އެގޮތުން މިއަދު ނެގި ވޯޓުން ރައީސް ޔޫންގެ އިތުބާރުނެތްކަމަށް ފާސްވީ 204 މެންބަރުންގެ ތާއީދާއެކު އެވެ. އަދި 85 މެންބަރުން އެކަމާއި ދެކޮޅަށް ވޯޓު ދިނެވެ.

ޔޫންގެ ބާރުތައް ވަގުތުން ހިފެހެއްޓިފައިވާއިރު، މިހާރު އޭނާ ދަނީ ކޮންސްޓިޓިއުޝަނަލް ކޯޓު، ޤައުމުގެ އެންމެ މަތީ ކޯޓުތަކުގެ ތެރެއިން އެއް ކޯޓުގެ ނިންމުމަކަށް އިންތިޒާރުކުރަމުންނެވެ. މި ނިންމުމާއިއެކު އޭނާގެ ކަންތައް ވާނެގޮތް ކަނޑައެޅޭނެ އެވެ. މިކަމަށް 6 މަސްދުސް ހޭދަވެދާނެކަމަށް ބެލެވެ އެވެ.

މިކަން ކަށަވަރުވެއްޖެނަމަ، އޭނާ ވާނީ އިމްޕީޗްމަންޓް މެދުވެރިކޮށް މަޤާމުން ވަކިކުރެވޭ ދެވަނަ ދެކުނު ކޮރެއާގެ ރައީސަށެވެ. މީގެ ކުރިން މިގޮތަށް ދިމާވެފައިވަނީ އެޤައުމުގެ ފުރަތަމަ އަންހެން ވެރިޔާ ޕާކް ގޫން ހައިއަށެވެ.

މިހާރު ވަގުތީ ރައީސްގެ ގޮތުގައި މަސައްކަތްކުރާ ބޮޑުވަޒީރު ހާން ޑަކް ސޫ އަށްވެސް ސިޔާސީ މައްސަލަތަކާ ކުރިމަތިލާން ވަނީ ޖެހިފައި އެވެ. އޭނާގެ މައްޗަށް މާޝަލް ލޯ ނިންމުމުގައި އަދާކުރި ދައުރާ ގުޅިގެން ތަހުޤީޤު ކުރެވެމުންދާތީ، ކުރިއަށް އޮތް ހަފުތާތަކުގައި ސިޔާސީ ހަމަނުޖެހުން އިތުރުވެދާނެ ކަމަށް ބެލެވެ އެވެ.