ހުޅުމާލޭ ދެވަނަ ފިޔަވަހީގައި އެސްޖޭ ކޮންސްޓްރަކްޝަނުން އަޅާ މިސްކިތުގެ މަސައްކަތް ހުއްޓިފައިވާތީ، އެކަމާ ގުޅިގެން ކަންބޮޑުވުންފާޅުކުރި މީހުންނަށް އެ ކުންފުނީގެ ބޯޑު ޑިރެކްޓަރު ޝިހާދު އިބްރާހީމް ފުރައްސާރަކޮށްފި އެވެ.

ޒިކުރާ މިސްކިތް ހުރި ބިމުގައި 10 ބުރީގެ އިމާރާތެއް އަޅަން ކުރީގެ ރައީސް އަބްދުﷲ ޔާމީންގެ ވެރިކަމުގައި އެސްޖޭ ކުންފުންޏާ ހަވާލުކުރުމުން އެންޓި ކޮރަޕްޝަން ކޮމިޝަންގެ ތަހުގީގަކާ ގުޅިގެން މިދިޔަ ސަރުކާރުން އެ އެއްބަސްވުން ބާތިލްކުރި އެވެ.

ޒިކުރާ މިސްކިތުގެ މަޝްރޫއު ކުރިއަށްގެންދަން ޔާމީންގެ ސަރުކާރުން އިކުއިޑިޓީގެ ގޮތުގައި އެސްޖޭއަށް 30 މިލިއަން ރުފިޔާ ދީފައިވެ އެވެ. އެއްބަަސްވުން ބާތިލްކުރުމަށްފަހު އެ 30 މިލިއަން ހޯދަން މިދިޔަ ސަރުކާރުން އެސްޖޭއާ ދެކޮޅަށް ދައުވާކުރުމުން އެ ކުންފުނީގެ އެދުމުގެމަތިން ކޯޓުން ބޭރުގައި މައްސަލަ ހައްލުކޮށް ސެޓްލްމަންޓް އެގްރީމެންޓެއް ހެދި އެވެ.

ކޯޓުން ބޭރުގައި އެއްބަސްވިގޮތަކީ އެ 30 މިލިއަން ރުފިޔާގެ ބަދަލުގައި ހުޅުމާލޭގެ ދެވަނަ ފިޔަވަހީގައި ޒަމާނީ ފެންވަރުގެ މިސްކިތެއް އެޅުމަށެވެ. އެގޮތުން ޖެނުއަރީ 23، 2022 ވަނަ ދުވަހު ވަނީ އެ މިސްކިތް އެޅުމަށް އިސްލާމިކް މިނިސްޓްރީ އާއި އެސްޖޭ ކޮންސްޓްރަކްޝަނާއެކު އެއްބަސްވުމެއްގައި ސޮއިކޮށްފަ އެވެ. އެ އެއްބަސްވުމުގައިވާގޮތުން 30 މިލިއަނަށްވުރެ އިތުރަށް މިސްކިތަށް ހަރަދުވާ ފައިސާ ހަމަޖައްސަނީ އެސްޖޭގެ ސީއެސްއާރްގެ ދަށުންނެވެ.

ހުޅުމާލޭ ދެވަނަ ފިޔަވަހީގެ ސަލާހުއްދީން ސްކޫލް ކައިރީ އިމާރާތްކުރަން ފަށާފައިވާ އެ މިސްކިތުގެ މަސައްކަތް 2023 ވަނަ އަހަރު ހުއްޓުނުގޮތަށް ކުރިއަކަށް ނުދެ އެވެ. އެކަމުގެ ސަބަބުން އެ ސަރަހައްދުގައި ދިރިއުޅޭ ގިނަ ރައްޔިތުން އަންނަނީ ކަންބޮޑުވުންފާޅުކުރަމުންނެވެ.

ސޯޝަލް މީޑިއާގައި ވެސް އެކަމާ ގުޅޭގޮތުން ގިނަ ބަޔަކު ކަންބޮޑުވުންފާޅުކޮށް އެސްޖޭ ކުންފުންޏަށް ސުވާލުތަކެއް އަމާޒުކޮށްފައިވެ އެވެ. އެކަމުގެ ރައްދުގައި އެސްޖޭގެ ބޯޑު ޑިރެކްޓަރު ޝިހާދު ވަނީ އެކި މީހުންނަށް ފުރައްސާރަކޮށްފަ އެވެ.

އެގޮތުން އެކަމާ ގުޅޭގޮތުން އެކްސްގައި ނޫސްވެރިޔާ އާއިދާ އަބްދުލްހަކީމް ޝުއޫރުފާޅުރުމުން އެސްޖޭ ޝިހާދު ވަނީ އޭނާއާ ރައްޓެހިވާން އެހިކަމަށް ބުނެ ދޮގު ވާހަކަތަކެއް ދައްކައި އާއިދާއަށް ފުރައްސާރަކޮށްފަ އެވެ.

ނޫސްވެރިޔާ ޝަފްރާޒް އަހްމަދު ހުސައިން އެކަމާ ގުޅިގެން ކަންބޮޑުވުންފާޅުކުރުމުން ޝިހާދު ވަނީ އޭނާ އަކީ ނަމާދު ނުކުރާ މީހެއް ކަމަށް ބުނެ ފުރައްސާރަކޮށްފަ އެވެ.

އެ މިސްކިތް އަޅާ ސަރަހައްދުގެ ހިޔާ ޓަވަރެއްގައި ދިރިއުޅޭ މީހަކު ބުނީ އެ ސަރަހައްދުގައި އޭނާ ދިރިއުޅޭތާ ތިން ރޯދަ މަސް އައިސްފައިވާއިރު، އެ މިސްކިތުގެ މަސައްކަތް އަދިވެސް ނުނިމޭ ކަމަށެވެ.

އެ ސަރަހައްދުގައި ހުރި ވަގުތީ މިސްކިތުގައި ހާއްސަކޮށް ތަރާވީހް ނަމާދުކުރާއިރު ދިމާވާ ދަތިތައް ވީޑިއޯއާއެކު އޭނާ ވަނީ އެކްސްގައި ހިއްސާކޮށްފަ އެވެ.

މިސްކިތުގެ މަސައްކަތް ނުކުރިޔަސް އެސްޖޭއިން އަންނަނީ އެހެން ޕްރޮޖެކްޓުތައް ހިންގަމުންނެވެ. އެގޮތުން ހުޅުމާލޭގައި ރިއަލް އެސްޓޭޓް ފްލެޓްތަކެއް ވެސް އެ ކުންފުނިން އަޅަމުންދެ އެވެ. އަދި ޅ. ކުރެންދޫގައި ސޯޝަލް ހައުސިންގެ މަޝްރޫއެއް ވެސް އަންނަނީ ހިންގަމުންނެވެ. އެ ކުންފުނިން އަންނަނީ ބޮޑުއަގުގައި ހުޅުމާލެއިން ވެސް ބިން ގަންނަމުންނެވެ. ހުޅުމާލޭގައި އެސްޖޭއިން ހިންގާ އެހެން ޕްރޮޖެކްޓްތަކުގެ މަސައްކަތް ކުރަނީ މިސްކިތު ޕްރޮޖެކްޓަށް ގެނެސްފައިވާ ބިދޭސީން ލައްވަ އެވެ. އެ ބިދޭސީން މިސްކިތް އަޅާ ސަރަހައްދުގައި ހުރި ސައިޓުން ނުކުމެގެން އެހެން ސަރަހައްދުތަކަށް މަސައްކަތުދާ މަންޒަރު ފެންނަ ކަމަށް އެ ސަރަހައްދުގައި ދިރިއުޅޭ އާންމުން ބުނެ އެވެ.

މިސްކިތުގެ މަސައްކަތް ހުއްޓިފައި އޮންނަ ވާހަކަ ދައްކަން ފެށުމުންް ޝިހާދު އަންނަނީ މަދުން މީހުން ނަމާދަށްދާ މިސްކިތްތަކުގެ ފޮޓޯ ނަގައި ދިވެހީންނަކީ ނަމާދު ނުކުރާ ބައެއްކަން ދޭހަވާގޮތަށް އެކްސްގައި ޕޯސްޓްތައް ކުރަމުންނެވެ.

މި މިސްކިތުގެ މަސައްކަތް ނުނިމި ވަނިކޮށް، އެސްޖޭގެ ހަރަދުގައި ޒިކުރާ މިސްކިތް ތިން ބުރިއަށް އެޅުމަށް މިދިޔަ އަހަރުގެ ޖެނުއަރީ 24 ވަނަ ދުވަހު އިސްލާމިކް މިނިސްޓްރީން ވަނީ އެ ކުންފުންޏާ އެ މަސައްކަތް ހަވާލުކޮށްފަ އެވެ. ނަމަވެސް އެސްޖޭގެ އަމިއްލަ ހަރަދުގައި އަޅާ އެ މިސްކިތުގެ އަމަލީ މަސައްކަތް މިހާތަނަށް ފަށާފައެއްނުވެ އެވެ.

ޒިކުރާ މިސްކިތް އެޅުމަށް އެސްޖޭ ކޮންސްޓްރަކްޝަނާ ހަވާލުކުރަނީ -- ފޮޓޯ: ސަން

ހުޅުމާލޭ މިސްކިތް ހުއްޓިފައިވާ މައްސަލަ ސޯޝަލް މީޑިއާގައި ހޫނުވުމުން، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ އެ މިސްކިތުގެ މަސައްކަތް އަވަސްކުރުމަށް މަސައްކަތްކޮށްދެއްވާނެ ކަމަށް ވިދާޅުވެފަ އެވެ.

މިސްކިތުގެ މަސައްކަތް ހުއްޓިފައިވާއިރު، މިކަމާ ބެހޭގޮތުން އެއްވެސް ބަހެއް ބުނުމަށް ހުޅުމާލެ އުތުރު ދާއިރާގެ މަޖިލިސް މެމްބަރު ހުސައިން ޝަރީފަށް ނުކެރެ އެވެ. ހުސައިން ޝަރީފަކީ އެސްޖޭ ޝިހާދުގެ ބޮޑުބޭބެ އެވެ. އަދި ހުޅުމާލެ މެދު ދާއިރާގެ މެންބަރު އަބްދުﷲ ޝަޒީމަކީ އެސްޖޭ ޝިހާދުގެ ޅިޔަނެވެ. އެހެންކަމުން މިކަމާ ގުޅޭގޮތުން އެއްވެސް ވާހަކައެއް އެބޭފުޅުން ނުދައްކަވަ އެވެ.