ބޮލީވުޑްގެ މަޝްހޫރު އެކްޓަރު އަދި ފިލްމު އުފެއްދުންތެރިޔާ އާމިރު ޚާން އަށް، 37 ވަނަ ސިންގަޕޫރު އިންޓަނޭޝަނަލް ފިލްމު ފެސްޓިވަލް (އެސްޖީއައިއެފްއެފް)ގައި ޝަރަފުވެރި "ސްކްރީން އައިކަން އެވޯޑު" އެރުވުމަށް ނިންމައިފި އެވެ.

މިއެވޯޑަކީ އޭޝިއާގެ ސިނަމާއަށް އޭނާ ކޮށްދީފައިވާ އަގުހުރި ހިދުމަތްތަކާއި، ފަންނީ ގޮތުން ފިލްމީ ދާއިރާއަށް ގެނެސްދީފައިވާ ބޮޑެތި ކުރިއެރުންތަކުގެ އަގު ވަޒަން ކުރުމުގެ ގޮތުން ދެވޭ އެވޯޑެކެވެ.

މި ފެސްޓިވަލްގެ ތެރެއިން އާމިރު ޚާންގެ ތާރީހީ ކާމިޔާބު ފިލްމު "ލަގާން: ވަންސް އަޕޮން އަ ތައިމް އިން އިންޑިއާ" އަށް 25 އަހަރު ފުރުން ފާހަގަ ކުރުމުގެ ގޮތުން ހާއްސަ ސްކްރީނިންއެއް ވެސް ބޭއްވުމަށް ވަނީ ހަމަޖެހިފަ އެވެ.

2001 ވަނަ އަހަރު ރިލީޒްކުރި މި ފިލްމުގެ ސްކްރީނިންގގައި އާމިރު ޚާންގެ އިތުރުން ފިލްމުގެ ޑައިރެކްޓަރު އަޝުތޯޝް ގޯވާރިކަރުވެސް ބައިވެރިވާނެ އެވެ.

އެއާއެކު ފެސްޓިވަލްގެ "އިން ކޮންވަސޭޝަން ވިތު" ސީރީޒްގައި އާމިރު ޚާން ވާހަކައްދައްކައި، އޭނާގެ ފިލްމީ ޙަޔާތުގެ ތަޖުރިބާތައް ހިއްސާކުރާނެ އެވެ.

1893 ވަނަ އަހަރު އިނގިރޭސިންގެ އިސްތިއުމާރުގެ ދަށުގައި އިންޑިއާ އޮތް ދުވަސްވަރުގެ ވާހަކައެއްގެ މައްޗަށް އުފައްދާފައިވާ "ލަގާން"އަކީ އޮސްކާ އެވޯޑުގެ "ބެސްޓް ފޮރިން ލޭންގުއޭޖް ފިލްމު" ކެޓަގަރީއަށް ނޮމިނޭޓްވެ، ބައިނަލްއަޤްވާމީ ބޮޑު ކާމިޔާބީއެއް ހޯދި ފިލްމެކެވެ.

މިއަހަރުގެ ސިންގަޕޫރު އިންޓަނޭޝަނަލް ފިލްމު ފެސްޓިވަލް ކުރިއަށްދާނީ އޮކްޓޯބަރު 21 އިން ނޮވެމްބަރު 1 ގެ ނިޔަލަށެވެ. މި ފެސްޓިވަލްގައި އާމިރު ޚާންގެ އިތުރުން އޭޝިއާގެ އެކި ގައުމުތަކުގެ މަޝްހޫރު ފިލްމީ ތަރިންނާއި ޑައިރެކްޓަރުން ބައިވެރިވާނެ އެވެ.