ބޮލީވުޑްގެ މަޝްހޫރު އެކްޓަރު ގޯވިންދާއާއި އޭނާގެ އަނބިމީހާ ސުނީތާ އަހޫޖާގެ ކައިވެނީގެ މައްސަލަތަކުގެ ތެރެއަށް ކޯމަލް ރާނީ ސުވަރްނަކާރު ވަދެފައިވާ ކަމަށް ބުނެ ދެކެވޭ ވާހަކަތަކަށް އޭނާ ވަރުގަދަ ރައްދެއް ދީފި އެވެ.

ގޯވިންދާއާއެކު ލޯބީގެ ގުޅުމެއް އޮންނަ ކަމަށް ބުނެ އަޑު ފެތުރިފައިވާ ކޯމަލް ސޯޝަލް މީޑިއާގައި ބުނެފައިވަނީ "މީގެ ކުރިން ވެސް ހަލާކުވެފައިވާ ގެއެއް" އިތުރަށް ހަލާކެއް ނުކުރެވޭނެ ކަމަށެވެ.

މިއީ ގޯވިންދާގެ އަނބިމީހާ ސުނީތާ ކޯމަލްއަށް އަމާޒުކޮށް "ހޯމްބްރޭކާ" ނުވަތަ އާއިލާ ހަލާކުކުރާ މީހެއްގެ ތުހުމަތު ކުރުމުން، ކޯމަލް އިންސްޓަގްރާމް މެދުވެރިކޮށް ދިން ރައްދެކެވެ.

ކޯމަލްގެ އިންސްޓަގްރާމް ސްޓޯރީގައި ހިއްސާކުރި މެސެޖެއްގައި ސުނީތާއަށް އިޝާރާތްކޮށް ބުނެފައިވަނީ، އަމިއްލަ ފިރިމީހާއަށް އިހުތިރާމް ނުކުރާ އަދި އާއިލީ މައްސަލަތައް އާންމުންގެ ތެރެއަށް ތިލަކޮށްގެން އުޅޭ މީހަކު، އެހެން މީހުންގެ ބޮލުގައި އިލްޒާމް އަޅުވައިގެން ނުވާނެ ކަމަށެވެ.

އެއާއެކު އޭނާގެ ނަން ބޭނުން ކޮށްގެން އަމިއްލަ އެޖެންޑާ ކުރިއަރުވަން ނޫޅުމަށާއި، ގޯވިންދާއާއި ސުނީތާގެ މެދުގައި އުފެދިފައިވާ މައްސަލަތަކަކީ އޭނާއާ އެއްވެސް ގުޅުމެއް ހުރި ކަމެއް ނޫން ކަމަށްވެސް ކޯމަލް ބުނެފައިވެ އެވެ.

މި އަޑުތަކާ ގުޅިގެން ގޯވިންދާވެސް ވަނީ މީޑިއާއަށް މަޢުލޫމާތު ދީފަ އެވެ. ގޯވިންދާ ބުނެފައިވަނީ ކޯމަލްއަކީ އޭނާގެ ކުރިއަށް އޮތް ފިލްމު "ރޫޕާ" ގެ ކޯ-ސްޓާރު ކަމަށާއި، ދެމީހުންގެ މެދުގައި އޮތީ ހަމައެކަނި ޕްރޮފެޝަނަލް ގުޅުމެއް ކަމަށެވެ.

އޭގެ އިތުރުން މިއީ އޭނާގެ އާއިލާއާ އޭނާ ދުރުކޮށް، އާންމުންގެ ކުރިމަތީގައި އޭނާގެ އަބުރު ކަތިލުމަށްޓަކައި ބަޔަކު ރާވައިގެން ހިންގާ ހަރަކާތެއް ކަމަށް ގޯވިންދާ ތުހުމަތު ކުރި އެވެ.

"އަހަރެން މަސައްކަތް ކުރަނީ ޕްރޮފެޝަނަލްކޮށް. ވަކި ބަޔަކާއެކު މަސައްކަތް ކުރުމަކީ އެހެން މީހުން ބެހެންޖެހޭ ކަމެއް ނޫން" ގޯވިންދާ ބުނެފައިވެ އެވެ.

ގޯވިންދާ އާއި ކޯމަލްއާ ދެމެދު ލޯބީގެ ގުޅުމެއް އޮންނަ ކަމަށް ބުނެ އަޑު ފެތުރެން ފެށީ ދެމީހުން އެއާޕޯޓުންނާއި މުމްބާއީގެ މަޝްހޫރު ލާލްބާގްޗާ ރާޖާ ކޮއިލުން އެކުގައި ފެނުމާ ގުޅިގެންނެވެ.

އެއަށްފަހު، ގޯވިންދާގެ އަނބިމީހާ ސުނީތާ ވަނީ ގޯވިންދާގެ އުމުރާ ނުބައްދަލު ކުއްޖަކާއެކު އުޅޭ ކަމަށް ބުނެ ނުރުހުން ފާޅުކޮށްފަ އެވެ.

ނަމަވެސް، ކޯމަލްގެ މި ރައްދާއެކު، ގޯވިންދާގެ އާއިލީ މައްސަލަތަކާއި ފިލްމީ ދާއިރާގެ މި ހައިޖާނު ވަނީ އިތުރަށް ހޫނުވެފަ އެވެ.