ބޮލީވުޑާއި ހޮލީވުޑްގެ ތަރިންގެ އަމިއްލަ ދިރިއުޅުމާއި ލޯބީގެ ގުޅުންތަކާ މެދު ސޯޝަލް މީޑިއާގައާއި މީޑިއާތަކުގައި ވާހަކަ ދެއްކުމަކީ އާންމު ކަމެކެވެ.

ނަމަވެސް ހޮލީވުޑް މަޝްހޫރު އެކްޓްރެސް ޑަކޯޓާ ޖޯންސަން ވަނީ އޭނާގެ އަމިއްލަ ދިރިއުޅުމާ މެދު މާބޮޑަށް ޝައުގުވެރިވެގެން އުޅޭ މީހުންނަށް ވަރުގަދަ ރައްދެއް ދީފަ އެވެ.

ވޯގްގެ "ދަ ރަން-ޓްރޫ" ޕޮޑްކާސްޓްގައި ވާހަކަ ދައްކަމުން "ފިފްޓީ ޝޭޑްސް އޮފް ގްރޭ" އަދި "މެޑަމް ވެބް" ފަދަ މަޝްހޫރު ފިލްމުތަކުން ފެނިގެންގޮސްފައިވާ ޑަކޯޓާ ބުނީ، އޭނާގެ ލޯބީގެ ގުޅުންތަކާ މެދު މީހުން ދައްކާ ވާހަކަތަކަށް ސަމާލުކަން ދޭން ބޭނުންނުވާ ކަމަށެވެ.

ޑަކޯޓާ ބުނެފައިވަނީ، ފިރިހެން ރައްޓެހިންނާއެކު ކެއުމަކަށް ދިޔަޔަސް އެކަމާ ގުޅުވައިގެން ތަފާތު ވާހަކަތައް ފެތުރުމަކީ އާންމު ކަމެއް ކަމަށެވެ. އެފަދަ ވާހަކަތަކަށް ރައްދުދީ، ދިފާއުވާން މަސައްކަތް ކުރުމަކީ ބޭކާރު ކަމެއްގެ ގޮތުގައި އޭނާ ސިފަކުރި އެވެ.

"އިންޓަނެޓުގައި ކޮންމެ ދުވަހަކުވެސް ކޮންމެވެސް ހެއްވާ، ތާކުންތާކު ނުޖެހޭ ވާހަކައެއް އޮވޭ. އެއީ ތެދަކަށް ވިޔަސް ނުވަތަ ދޮގަކަށް ވިޔަސް އަހަންނަކަށް އަސަރެއް ނުކުރޭ. މީހުން ގަބޫލުކުރަން ބޭނުންވާ އެއްޗެއް ގަބޫލުކުރާނެ. އަހަރެންގެ ހަކަތަ އެކަމަކަށް ހުސް ކުރާކަށް ބޭނުމެއް ނޫން. އޭގެ ބަދަލުގައި ދިރިއުޅުމުގެ މުހިންމު އެހެން ކަންކަމަށް ސަމާލުކަން ދޭން ބޭނުންވަނީ. އެހެންވެ ބުނެލަން އޮތީ، އަމިއްލަ ކަންކަމައިގެން އުޅޭށޭ" ޑަކޯޓާ ބުންޏެވެ.

ކޯލްޑްޕްލޭގެ ލަވަކިޔުންތެރިޔާ ކްރިސް މާޓިންއާ އެކު ގާތްގަނޑަކަށް 8 އަހަރު ވަންދެން އުޅުމަށްފަހު ވަކިވެފައިވާ ޑަކޯޓާއަކީ، އަބަދުވެސް އޭނާގެ އަމިއްލަ ދިރިއުޅުމުގެ ވާހަކަތައް މީޑިއާތަކަށް ސިއްރު ކުރަން އިސްކަންދޭ ތަރިއެކެވެ.

ފަހަކަށް އައިސް އޭނާގެ ލޯބީގެ ދިރިއުޅުމާ މެދު އަނެއްކާވެސް ތަފާތު އަޑުތައް ފެތުރެން ފެށީ، ތަފާތު އާޓިސްޓުންނާއެކު އާންމު ތަންތަނުން ފެންނަން ފެށުމުންނެވެ.

ނަމަވެސް، ޑަކޯޓާގެ މި ވާހަކަތަކުން ސާފުވަނީ، އޭނާގެ އަމިއްލަ ދިރިއުޅުމާ މެދު އާންމުން ދައްކާ ވާހަކަތަކަށް އޭނާ އެއްވެސް ވަރަކަށް އަހައްމިއްޔަތުކަން ނުދޭ ކަމެވެ.