"ނިކޮޓިން ޕައުޗް"ތަކުގެ ސަބަބުން ސިއްހަތަށް ނުހަނު ބޮޑެތި ނުރައްކާތަކެއް ކުރިމަތިވަމުންދާތީ، އެ ތަކެތި އުފެއްދުމާއި، އެތެރެ ކުރުމާއި، އިޝްތިހާރު ކުރުމުގެ އިތުރުން ވިއްކުން ހުއްޓުވުމަށް އިންޑިއާގެ މަރުކަޒީ ސަރުކާރުން އެ ގައުމުގެ އެކި ސްޓޭޓްތަކަށް އަންގައިފި އެވެ.

އިންޑިއާގެ ހެލްތު މިނިސްޓްރީން އެކި ސްޓޭޓްތަކުގެ ހެލްތު ކޮމިޝަނަރުންނަށް ފޮނުވާފައިވާ ސިޓީއެއްގައިވާ ގޮތުން، މިފަދަ ނިކޮޓިން ޕައުޗްތަކަކީ ދުންފަތުގެ އިސްތިއުމާލު ކުރުން ހުއްޓާލުމަށް އެހީތެރިވެދޭ ވަސީލަތެއްގެ ގޮތުގައި އިޝްތިހާރު ކުރި ނަމަވެސް، އެއީ އިންޑިއާގެ ގާނޫނުތަކުގެ ދަށުން ރެގިއުލޭޓް ކުރެވިފައިވާ ނުވަތަ ސިއްހީ ގޮތުން ހުއްދަދެވިފައިވާ ތަކެއްޗެއް ނޫނެވެ.

ކަންބޮޑުވުން ބޮޑުވީ ޒުވާނުންގެ މެދުގައި މަގުބޫލު ވުމުން!

ދުންފަތް ނުހިމެނޭ، ނަމަވެސް ސިންތެޓިކް ނުވަތަ ސާފު ކޮށްފައިވާ ނިކޮޓިން ހުންނަ މި ޕައުޗްތަކަކީ ކުދިކުދި ކޮތަޅުތަކެއްގައި ހުންނަ އަނގައަށް ލައިގެން ބޭނުންކުރާ އެއްޗެކެވެ.

މިއީ ސިނގިރޭޓާއި ވޭޕް ފަދައިން ދުން ބޭރުނުވާ އެއްޗަކަށްވާތީ، ޒުވާނުންނާއި ކުޑަކުދިންގެ މެދުގައި މި ތަކެތީގެ މަގުބޫލުކަން އަންނަނީ އިތުރު ވަމުންނެވެ.

ސިއްހީ މާހިރުން ފާހަގަ ކުރައްވާ ގޮތުގައި:

  • އިންތިހާއަށް އެޑިކްޓްވުން: މި ޕައުޗްތަކުގައި މަތީ މިންވަރަކަށް ނިކޮޓިން ހުންނާތީ، މިއަށް އާދަ ވުމުގެ ނުރައްކާ ވަރަށް ބޮޑެވެ.
  • ހިތާއި ނާރުތަކުގެ ބަލިތައް: މަތީ މިންވަރަކަށް ނިކޮޓިން ހަށިގަނޑަށް ވަނުމަކީ ލޭގެ ޕްރެޝަރު މަތިވެ، ހިތުގެ މައްސަލަތައް ކުރިމަތިވާ ކަމެކެވެ.
  • ކުޑަކުދިންގެ ސިކުނޑީގެ ހެދިބޮޑުވުން: ކުޑަކުދިންނާއި މާބަނޑު އަންހެނުން މި ތަކެތި ބޭނުންކުރުމަކީ ސިކުނޑީގެ ހެދިބޮޑުވުމަށް ބޮޑެތި ހުރަސްތަކެއް ކުރިމަތިކުރުވާ ކަމެކެވެ.

އިންޑިއާގެ ހެލްތު މިނިސްޓްރީގެ ސިޓީގައި ބުނެފައިވަނީ، "ފުޑް ސޭފްޓީ އެންޑް ސްޓޭންޑާޑްސް އެކްޓް"ގެ ދަށުން ނިކޮޓިންއަކީ ކާބޯތަކެތީގެ ތެރޭގައި އިންގްރީޑިއަންޓެއްގެ ގޮތުގައި ބޭނުން ކުރުން މަނާ މާއްދާއެއް ކަމަށެވެ.

އެއާއެކު "ޑްރަގްސް އެންޑް ކޮސްމެޓިކްސް އެކްޓް"ގެ ދަށުން ބޭހުގެ ގޮތުގައި ރަޖިސްޓްރީ ނުކުރާހާ ހިނދަކު، މިއީ ގާނޫނީ ގޮތުން ވިއްކޭނެ ތަކެތި ނޫން ކަމަށްވެސް ބުނެފައިވެ އެވެ.

އެހެންކަމުން، މިފަދަ އުފެއްދުންތައް ބާޒާރުން ނެގުމަށާއި، ބަޒާރުގައި ވިއްކަން ހުންނަ ތަންތަން ފާސްކޮށް ގާނޫނީ ފިޔަވަޅު އެޅުމަށް ސަރުކާރުން ވަނީ ކަމާބެހޭ އިދާރާތަކަށް އަންގާފަ އެވެ.

އިންޑިއާއަކީ މީގެ ކުރިން 2019 ވަނަ އަހަރު އީ-ސިގިރޭޓާއި ވޭޕް މަނާކުރި ގައުމެކެވެ. ނިކޮޓިން ޕައުޗްތަކާ ދެކޮޅަށް އެޅި މި ފިޔަވަޅަކީ ދުންފަތާއި ނިކޮޓިންގެ ވަބާއިން ރައްޔިތުން، ހާއްސަކޮށް ޒުވާނުން ސަލާމަތް ކުރުމަށް އެ ގައުމުން އަޅަމުންދާ ފިޔަވަޅުތަކުގެ ތެރެއިން މުހިންމު ފިޔަވަޅެކެވެ.