މިއަހަރުގެ ވީއެމްއޭ އެވޯޑްސްގައި މަޝްހޫރު ލަވަކިޔުންތެރިން ކަމަށްވާ މެޑޯނާއާއި ބްރޫނޯ މާސް ހުށައަޅައިދިން ހުށައެޅުމަށް އާއްމުން ފާޑުކިޔަމުން އެބަދެ އެވެ.

އެގޮތުން ގިނަ ބަޔަކު ވަނީ މެޑޯނާގެ ލިޕްސިންކް މައްސަލަތަކުގެ އިތުރުން ބްރޫނޯ މާސްގެ ކުރިން ރިކޯޑު ކޮށްފައިވާ ހުށަހެޅުން ކަމުނުދާ ކަމަށް ބުނެ އެކަން ފާހަގަ ކޮށްފަ އެވެ.

ލޮސް އެންޖެލިސްގެ ޕީކޮކް ތިއޭޓަރުގައި ސްނޫޕް ޑޯގް ހޮސްޓުކުރި މި ޝޯ ފެށުމަށް ތާވަލު ކޮށްފައިވަނީ އާދީއްތަ ދުވަހުގެ ރޭ (27 ސެޕްޓެމްބަރު 2026) އެމެރިކާގެ ގަޑިން އިރުއޮއްސި 7:30ގަ އެވެ.

ނަމަވެސް އެމެރިކަން ފުޓްބޯޅަ (އެންއެފްއެެލް) މެޗެއް ދިގުދެމިގެން ދިއުމުގެ ސަބަބުން، "ލައިވް" ކޮށް ދެއްކުމަށް ހަމަޖެހިފައިވި މި ޝޯ ފެށުން ވަނީ 20 މިނެޓަށް ލަސްވެފަ އެވެ. ސޯޝަލް މީޑިއާގައި ގިނަ ބަޔަކު ވަނީ ވަގުތަށް ޝޯ ނުފެށުމުން ނުރުހުން ފާޅުކޮށްފަ އެވެ.

23 އަހަރަށްފަހު ވީއެމްއޭސްގެ ސްޓޭޖަށް އެނބުރި އައި މެޑޯނާ ވަނީ ސެބްރީނާ ކާޕެންޓާ އަދި ޗާލީ އެކްސްސީއެކްސް އާއެކު ޝޯ ހުޅުވުމުގެ ގޮތުން ވަރުގަދަ ހުށަހެޅުމެއް ހުށަހަޅައިދީފަ އެވެ.

ނަމަވެސް، ލައިވްކޮށް ލަވަކިޔުމުގެ ބަދަލުގައި އޭނާ ލިޕްސިންކް ކުރިކަން ސާފުކޮށް އެނގެން ހުރުމުން ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ.

ބައެއް ސަޕޯޓަރުން ބުނެފައިވަނީ މެޑޯނާގެ ހަކަތައާއި ޝޯގެ ފެންވަރު ރަނގަޅު ނަމަވެސް، ލިޕްސިންކް ކުރުމުގެ ސަބަބުން ހުށަހެޅުމުގެ ފުރިހަމަކަން ގެއްލުނު ކަމަށެވެ.

މީގެ އިތުރުން، ބްރޫނޯ މާސްގެ "ޑާންސް ވިތު މީ" ހުށަހެޅުމަކީވެސް ލައިވް ހުށަހެޅުމެއް ނޫންކަން އެނގުމުން ސަޕޯޓަރުން ވަނީ މާޔޫސްވެފަ އެވެ.

ބްރޫނޯ މާސް އެވަގުތު އޭނާގެ "ރޮމެންޓިކް ޓުއާ"ގެ ކޮންސަޓަކަށް ކޮލޮރާޑޯގައި ހުރުމުގެ ސަބަބުން، ވީއެމްއޭސްގައި ދައްކާފައިވަނީ އޭނާގެ ޓުއާގެ ތެރެއިން ކުރިން ރިކޯޑުކޮށްފައިވާ ވީޑިއޯ އެކެވެ.

ލައިވް އެވޯޑް ޝޯއެއްގެ ގޮތުގައި އިޝްތިހާރުކުރި އިވެންޓެއްގައި ކުރިން ރިކޯޑު ކޮށްފައިވާ ވީޑިއޯ ދެއްކުމުން ގިނަ ބަޔަކު ވަނީ ނުރުހުން ފާޅުކޮށްފަ އެވެ.

މި މައްސަލަތަކާއެކުވެސް، 2026 ގެ ވީއެމްއޭސް ވެގެންގޮސްފައިވަނީ ސޯޝަލް މީޑިއާގައި އެންމެ ގިނައިން ބަހުސް ކުރެވުނު އެއް އެވޯޑު ޝޯއަށެވެ.