ނޭޝަނަލް ފިލްމް އެވޯޑް ހޯދާފައިވާ، ރާޖްކުމާރް ރާއޯގެ މަޝްހޫރު ފިލްމު "ޝާހިދު" ސިނަމާތަކުގައި އެޅުވިތާ 13 އަހަރު ފަހުން އެންމެ ފަހުން އެމަޒޯން ޕްރައިމް ވީޑިއޯއިން އެ ފިލްމު ސްޓްރީމް ކުރަން ފަށައިފި އެވެ.

2013 ވަނަ އަހަރު ރިލީޒްކުރި މި ފިލްމަކީ ހަންސަލް މެހެތާ ޑައިރެކްޓްކޮށް، އަޕޫރްވާ އަސްރާނީ ކޯ-ރައިޓް އަދި އެޑިޓް ކޮށްފައިވާ ފިލްމެކެވެ.

މި ފިލްމު އޯޓީޓީ ޕްލެޓްފޯމަކަށް އައުން ލަސްވެގެން ދިއުމާ ގުޅިގެން ފިލްމުގެ ކޯ-ރައިޓަރު އަދި އެޑިޓަރު އަޕޫރްވާ އަސްރާނީ ވަނީ ސޯޝަލް މީޑިއާގައި ކަންބޮޑުވުން ފާޅުކޮށް ސުވާލުތަކެއް އުފައްދާފަ އެވެ.

އެކްސްގައި ހިއްސާކުރި މެސެޖެއްގައި އަޕޫރްވާ ބުނެފައިވަނީ، "ޝާހިދު"އަކީ އިންސާނީ ހައްގުތަކަށް މަސައްކަތްކުރި ވަކީލު ޝާހިދު އަޒްމީގެ ހަގީގީ ހަޔާތުގެ މައްޗަށް ބިނާކޮށް އުފައްދާފައިވާ ފިލްމެއް ކަމަށެވެ.

ޝާހިދުއަކީ ނިރުބަވެރިކަމުގެ ތުހުމަތު ކުރެވި، ކުށް ސާބިތުވުމުގެ ކުރިން މުސްލިމުންނަކީ ކުށްވެރިންގެ ގޮތުގައި ދެކެމުންދިޔަ ދަނޑިވަޅެއްގައި، އެމީހުންގެ ދިފާއުގައި އިންސާފު ހޯދައިދިނުމަށް ވަކާލާތުކުރި ބޭފުޅެކެވެ. އެ ހިތްވަރުގަދަ މަސައްކަތުގެ ސަބަބުން އޭނާ ވަނީ މަރާލާފަ އެވެ.

މިފަދަ މުހިންމު ފިލްމެއް ސްޓްރީމް ކުރާނެ އޯޓީޓީ ޕްލެޓްފޯމެއް ނުލިބި 13 އަހަރު ވޭތުވެގެންދިޔައީ ކީއްވެގެންތޯ އޭނާ ސުވާލުކުރި އެވެ.

އޭނާ ފާހަގަކުރި ގޮތުގައި 2014ގެ ފަހުން އިންޑިއާގެ ސިޔާސީ މަޝްރަހަށް އައި ބަދަލުތަކާއެކު، ހައްގުތަކަށް ވަކާލާތުކުރާ މީހުންނާއި ނޫސްވެރިންނަށް އޮތް ފިއްތުންތައް ބޮޑު ވެގެންދިޔަ އެވެ. މިއީ މިފަދަ ހަގީގީ އަދި ހިތްވަރުގަދަ ފިލްމުތައް އޯޓީޓީއަށް އައުން ލަސްވި މައިގަނޑު ސަބަބު ކަމަށް އޭނާ ތުހުމަތުކުރި އެވެ.

2013 ވަނަ އަހަރު ސިނަމާތަކަށް ނެރުނު "ޝާހިދު" އަކީ ކްރިޓިކުންގެ ބޮޑު ތަރުހީބެއް ލިބުނު ފިލްމެކެވެ. މި ފިލްމުގައި ރާޖްކުމާރް ރާއޯ ދެއްކި މޮޅު އެކްޓިންއަށް އޭނާއަށް އެންމެ މޮޅު އެކްޓަރުގެ ނޭޝަނަލް ފިލްމް އެވޯޑް ލިބުނުއިރު، ފިލްމުގެ ޑައިރެކްޓަރު ހަންސަލް މެހެތާއަށް އެންމެ މޮޅު ޑައިރެކްޓަރުގެ ނޭޝަނަލް އެވޯޑް ވަނީ ލިބިފަ އެވެ.

ޓޮރޮންޓޯ އިންޓަނޭޝަނަލް ފިލްމް ފެސްޓިވަލްގެ އިތުރުން ދުނިޔޭގެ އެކި ފިލްމް ފެސްޓިވަލްތަކުގައި ދެއްކި މި ފިލްމަކީ ރާޖްކުމާރް ރާއޯގެ ބޮލީވުޑް ކެރިއަރުގައި ބޮޑު ކުރިއެރުމެއް ހޯދައިދިން އެންމެ މުހިންމު އެއް ފިލްމެވެ.