ކޮންމެ ދުވަހަކު ހިނގުމަކީ ހަމައެކަނި ބަރުދަން ލުއިކުރުމާއި ހަށިގަނޑު ފިޓްކޮށް ބެހެއްޓުމަށް އެކަނި އޮތް ކަމެއް ނޫނެވެ. ދުވަހުން ދުވަހަށް ކުރާ މި އާދައިގެ ހަރަކާތަކީ ސިކުނޑީގެ ދުޅަހެޔޮކަމާއި، ހަނދާން ވަރުގަދަ ކުރުމާއި، ސަމާލުކަން ދިނުމުގެ ގާބިލުކަން އިތުރު ކުރުމަށް ވަރަށް ބޮޑު އެހީއެކެވެ.

އިންޑިއާގެ ޔަތާތު ހޮސްޕިޓަލްސްގެ ނިއުރޮލޮޖީ ޑިޕާޓްމަންޓުގެ ޗެއާމަން އަދި ގްރޫޕް ޑިރެކްޓަރު ޑރ. ކުނާލް ބަހްރާނީ ހާމަ ކުރެއްވި ގޮތުގައި، ނިއުރޮލޮޖީގެ ނަޒަރިއްޔާތުން ބަލާއިރު ހިނގުމަކީ ހީކުރާވަރަށްވުރެ މާ މުހިންމު ފައިދާތަކެއް ސިކުނޑިއަށް ފޯރު ކޮށްދޭ ކަމެކެވެ.

ނަފްސާނީގޮތުން ވަރުބަލިވާނަމަ ހަރަކާތްތެރިވުން އިތުރުކުރޭ!

ޑރ. ބަހްރާނީ ފާހަގަކުރެއްވި ގޮތުގައި، ސިކުނޑި ވަރުބަލިވެގެން، ސަމާލުކަން ދޭން އުނދަގޫވެގެން ނުވަތަ "ކުރިން ހުރި ތޫނުފިލިކަން ނެތިގެން" އަންނަ ގިނަ ބަލިމީހުންގެ ދިރިއުޅުމުގެ އާދަކާދައަށް ބަލާއިރު، ދުވަހުގެ ގިނަ ވަގުތު ހޭދަ ކުރަނީ އިށީނދެގެންނެވެ.

ނިދި މަދުވުމާއި، ނަފްސާނީ ސްޓްރެސްގެ އިތުރުން މާބޮޑަށް ގޮނޑީގައި އިށީނދެގެން އިނުން މަދުކޮށް، ކޮންމެ ދުވަހަކުވެސް ކޮންމެވެސް ވަރަކަށް ހިނގާ ހަރަކާތްތެރިވުމަކީ ސިކުނޑީގެ ވަރުބަލިކަން ދުރު ކޮށްދޭނެ ކަމެކެވެ.

ވިސްނުމާއި ހަނދާން ވަރުގަދަ ކޮށްދިނުން

ގަވާއިދުން ހިނގުމަކީ ސިކުނޑީގެ "އެގްޒެކެޓިވް ފަންކްޝަންސް" ނުވަތަ ރޭވުންތައް ރޭވުމާއި، ގޮތްތައް ނިންމުމާއި، ކަންކަން އިންތިޒާމު ކުރުމުގެ ގާބިލުކަން އިތުރުކޮށްދޭ ކަމެކެވެ.

އަދި ޖިސްމާނީ ހަރަކާތްތަކުގެ ސަބަބުން ސިކުނޑީގެ އުނގަނޫމާއި ހަނދާނާ ގުޅިފައިވާ ބައި ކަމަށްވާ "ހިޕޯކޭމްޕަސް"އަށް އެކަށީގެންވާ ލޭ ދައުރުވުމަށް އެހީތެރިވެދެ އެވެ.

ޑރ. ބަހްރާނީ ވިދާޅުވި ގޮތުގައި "ގިނައިން ހިނގުމަކީ ސީދާ ހަނދާން ގަދަވާނެ ކަމުގެ ކަށަވަރު ކަމެއް" ނޫން ނަމަވެސް، އުމުރުން ދުވަސް ވަމުންދާއިރު ސިކުނޑި ތާޒާކޮށް ބެހެއްޓުމަށް ގަވާއިދުން ހިނގުން މުހިއްމެވެ.

އެހެނިހެން ސީދާ އަދި ނުސީދާ ފައިދާތައް:

  • ސްޓްރެސް ކުޑަވުމާއި ނިދި ރަނގަޅުވުން: ގަވާއިދުން ހިނގުމުން ސްޓްރެސް ކުޑަވެ، ނިދުމަށް ފަސޭހަވެގެންދެ އެވެ. މިއީ ސިކުނޑީގެ ސަމާލުކަން އިތުރުކުރުމަށް ނުސީދާގޮތުން އެހީވެދޭ ކަންކަމެވެ.
  • މުސްކުޅި އުމުރުގައި އަމިއްލަ މިނިވަންކަން: އުމުރުން ދުވަސްވީ މީހުން ގަވާއިދުން ހިނގާ އުޅުމަކީ އެމީހުންގެ ހަރަކާތްތެރިކަން ދަމަހައްޓައި، އެހެން މީހުންނަށް ބަރޯސާނުވެ އުޅުމަށް މަގުފަހިކޮށްދޭ ކަމެކެވެ.

ޑޮކްޓަރަށް ދައްކަންޖެހޭ ހާލަތްތައް

ހިނގުމަކީ ސިކުނޑީގެ ސިއްހަތަށް ރަނގަޅު ކަމެއް ނަމަވެސް، މިއީ ސިކުނޑީގެ އެއްވެސް ބައްޔަކަށް އޮތް ސީދާ ޝިފާއެއް ނޫންކަން ޑޮކްޓަރު ފާހަގަކުރެއްވި އެވެ. އެއާއެކު ހިނގުމުގެ ވައްޓަފާޅިއަށް ކުއްލިއަކަށް ބަދަލު އައުން (މިސާލަކަށް ފައި ކައްސާލުން، އަރި އަޅާލުން) ފަދަ ކަމެއް ފެނިއްޖެނަމަ، ލަސްނުކޮށް ނިއުރޮލޮޖިސްޓަކަށް ދައްކައި ސިއްހީ އެހީތެރިކަން ހޯދަން ޖެހޭނެ އެވެ.

އެހެންކަމުން، ގިނައިރު އިށީނދެގެން ތިބޭ މީހުން ކައިރި ތަންތަނަށް ހިނގަން ފަށައި، މަޑުމަޑުން ހިނގާ ވަގުތާއި ބާރުމިން އިތުރު ކުރުމަކީ ސިކުނޑީގެ ދުޅަހެޔޮ ކަމަށް އެންމެ އެދެވިގެންވާ ގޮތެވެ.