ހދ. ހިރިމަރަދޫ ރައްޔިތުން އެ އަތޮޅު ހަނިމާދުއަށް ބަދަލުކުރުމަށް ސަރުކާރުން ވެފައިވާ ވައުދާ އެއްގޮތަށް އެއްވެސް އަމަލީ މަސައްކަތެއް ނުފެށި ދިގުލައިގެން ދިއުމުގެ ސަބަބުން އެ ރަށުގެ ގިނަ އަދަދެއްގެ ރައްޔިތުން ތިބީ ވާނުވާ ނޭގޭ ހާލަތެއްގައި ކަމަށް ބުނެ ކަންބޮޑުވުން ފާޅުކުރަން ފަށައިފި އެވެ.

މި ކަންބޮޑުވުންތައް އިތުރުވެފައިވަނީ ސަރުކާރުން އެކި އެކި ބަހަނާތައް ދައްކައިގެން މަސައްކަތް ނުފަށައި ލަސްކުރަމުންދާ ކަމަށް ބުނެ އެވެ. ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ފަދަ ފުދުންތެރި ބޮޑު ކުންފުންޏަކާ މަޝްރޫއު ހަވާލުކޮށްފައިވާއިރުވެސް މަސައްކަތް ނުފެށިގެން އުޅޭ ސަބަބާމެދު އާންމުން ދަނީ ސުވާލު އުފައްދަމުންނެވެ.

"އެޗްޑީސީއަކީ މިލިއަނުން ފައިދާވާ ކުންފުންޏެއް. ކީއްވެގެންތޯއޭ ހައުސިން ޔުނިޓް އިމާރާތްކުރަން ނުފެށެނީ. ސަރުކާރުން އެބަޖެހޭ މިކަން އަޅުގަނޑުމެންނަށް ސާފުކޮށްލަދޭން،" އޭނާ ކިޔައިދިނެވެ.

ހިރިމަރަދޫ ރައްޔިތުން ހަނިމާދުއަށް ބަދަލުވާން އެދުނު މައިގަނޑު ސަބަބަކީ އެ ރަށުން އެކަށީގެންވާ ތައުލީމާއި ސިއްހީ ހިދުމަތް ލިބެން ނެތުމެވެ. އެ ރަށުގައި އުޅޭއިރު ރައްޔިތުންގެ ދިރިއުޅުމުގެ އާންމު ހާލަތު ދުވަހެއް ދުވަހަކަށް ދަނީ ދަށްވަމުންނެވެ.

މި މަޝްރޫއު ލަސްވާ މައްސަލައިގައި ހައުސިން މިނިސްޓްރީން ކުރިން ބުނެފައިވަނީ މަސައްކަތް ނުފެށިގެން އުޅެނީ ހަނިމާދޫ ކައުންސިލްގެ އެއްބާރުލުން ނުލިބިގެން ކަމަށެވެ. ނަމަވެސް ހަނިމާދޫ ކައުންސިލުން ވަނީ ސަރުކާރުގެ އެ ތުހުމަތުތައް ދޮގުކޮށްފަ އެވެ.

ލާމަރުކަޒީ ގާނޫނަށް ގެނެވުނު އިސްލާހުތަކާއެކު ކައުންސިލްތަކުން ހުއްދަ ނުދިންކަމުގައި ވިޔަސް ގަދަބާރުން ރަށްރަށުގައި ތަރައްގީގެ މަޝްރޫއުތައް ހިންގުމުގެ ބާރު ސަރުކާރަށް އޮވެ އެވެ. ގާނޫނަށް އެ އިސްލާހު ގެނައިތާ ގިނަ ދުވަސްތަކެއް ވެގެންދިޔައިރުވެސް މަސައްކަތް ނުފެށޭތީ މިކަމުގައި ހަނިމާދޫ ކައުންސިލްގެ ބޮލުގައި އިލްޒާމް އެޅުވޭނެ އެއްވެސް ޖާގައެއް ނޯންނާނެ ކަމަށް އެ ކައުންސިލުން ބުނެ އެވެ.

ރައީސުލްޖުމްހޫރިއްޔާ މުހައްމަދު މުއިއްޒު ހިރިމަރަދޫ ރައްޔިތުންނާ ބައްދަލުކުރައްވައި ވެވަޑައިގެންނެވި ވައުދަކީ 18 މަސް ދުވަހުގެ ތެރޭގައި ހަނިމާދޫގައި ގެތައް އަޅައި ނިންމަވައިދެއްވާނެ ކަމަށެވެ. ނަމަވެސް އެ މުއްދަތު ގާތްވަމުންދާއިރުވެސް އަމަލީ އެއްވެސް މަސައްކަތެއް ފެށިފައި ނުވާތީ ރައްޔިތުންގެ ކަންބޮޑުވުން ވަނީ އިންތިހާއަށް ބޮޑުވެފަ އެވެ.