ބޮލީވުޑްގެ މަޝްހޫރު އެކްޓަރު ޝާހިދު ކަޕޫރުގެ ކުރީގެ ލޯބިވެރިޔާ ކަރީނާ ކަޕޫރު ޚާން ހުށަހަޅައިދޭ މަގުބޫލު ރޭޑިއޯ ޝޯ "ވަޓް ވުމަން ވޯންޓް"ގެ އާ ސީޒަންގައި ޝާހިދުގެ އަންހެނުން މީރާ ރާޖްޕުތު ބައިވެރިވެއްޖެ އެވެ. މިއީ މި ދެ މީހުން އެކީގައި ފެނުނު ފުރަތަމަ ފަހަރެވެ.

ކަރީނާ ވަނީ އޭނާގެ އިންސްޓަގްރާމް ސްޓޯރީގައި މީރާއާއެކު ނަގާފައިވާ ފޮޓޯއެއް ހިއްސާކޮށްފަ އެވެ. އެ ފޮޓޯގެ ކެޕްޝަންގައި މީރާއަކީ ވަރަށް ހިތްހެޔޮ އަދި އޯގާތެރި މީހެއްގެ ގޮތުގައި ސިފަ ކޮށްފައިވެ އެވެ.

އާއްމުވި ފޮޓޯއިން ފެންނަ ގޮތުގައި މީރާ ހުރީ ކްރީމް ކުލައިގެ ކޯސެޓް ޓޮޕަކާއި ކަޅު ކުލައިގެ ލެދާ ސްކާޓެއްގަ އެވެ. ކަރީނާ ހުރީ ރަތް ކުލައިގެ ޓޮޕަކާއި މުށި ކުލައިގެ ލެދާ ސްކާޓެއްގަ އެވެ.

ކަރީނާއާއި ޝާހިދު ކަޕޫރު ވަނީ 2004 އިން 2007 އަށް ލޯބީގެ ގޮތުން ގުޅިގެން އުޅެފަ އެވެ. އޭގެ ފަހުން 2012 ވަނަ އަހަރު ކަރީނާ ވަނީ ސައިފް އަލީ ޚާންއާ ކައިވެނިކޮށްފަ އެވެ. ޝާހިދު މީރާއާ ކައިވެނިކުރީ 2015 ވަނަ އަހަރު އެވެ.

ކަރީނާއާއި ސައިފްގެ ދެ ފިރިހެން ކުދިން (ތައިމޫރު އަދި ޖެހާންގީރު) ތިބިއިރު، ޝާހިދާއި މީރާގެ އަންހެން ކުއްޖަކާއި (މީޝާ) ފިރިހެން ކުއްޖެއް (ޒޭން) ހުރެ އެވެ.

މީގެ ކުރިން ދުވަހަކުވެސް އެކީގައި ފެނިފައިނުވާ މި ދެ މީހުން އެކުގައި ޝޯއަކުން ފެނުމުން، ސޯޝަލް މީޑިއާގައި ގިނަ ބައެއްގެ ސަމާލުކަން މިކަމަށް ވަނީ ހުއްޓިފަ އެވެ.