ޔޫއޭއީގެ އީގަލް ހިލްސް ކުންފުންޏަށް ރަސްމާލެ ދޫކޮށްލައިފި ނަމަ ދިވެހީންގެރާއްޖެ ދިވެހީންގެ އަތުގައި އޮވެދާނެ ކަމާމެދު، މި ސަރުކާރުގައި އެމްޑަބްލިޔޫއެސްސީގެ މެނޭޖިން ޑިރެކްޓަރުކަން ކުރެއްވި އަބްދުލް މަތީން މުހައްމަދު ސުވާލު އުފައްދަވައިފި އެވެ.

އޭނާ ފޭސްބުކްގައި ކުރެއްވި ޕޯސްޓެއްގައި ވަނީ ރަސްމާލެ ފަދަ ތަންތަން ބިދޭސީންނަށް ވިއްކާލަން އުޅޭ ކަމަށް ދެކެވޭ ވާހަކަތަކާ ގުޅިގެން ކަންބޮޑުވުން ފާޅުކުރައްވައިފަ އެވެ. އަދި މިފަދަ ކަންކަމުގައި ފުންކޮށް ވިސްނައި، ވަކި ފަރާތަކަށް ނުޖެހި އިލްމީ ބަހުސަކަށް ދިއުމަށް އޭނާ ވަނީ ގޮވާލައްވާފަ އެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ސްޓޭޓު މިނިސްޓަރަކާއި ޕީޕީއެމްގެ ސެކްރެޓަރީ ޖެނެރަލްގެ މަގާމު ވެސް ފުރުއްވި މަތީން ވިދާޅުވީ، މި ވިޔަފާރި މޮޑެލްގައި ސަތޭކަ ވަރަކަށް އަހަރުގެ ރާސްތާ ކަޑައްތުކުރާއިރު ގައުމު ދިވެހީންގެ އަތުގައި އޮންނާނެތޯ ބެލުމަކީ ކުރަންޖެހޭ ބަހުސެއް ކަމަށެވެ. އަދި މިކަމާ ގުޅޭ ލިޔެކިޔުންތައް ރައްޔިތުންނަށް ހާމަވެ، ނިންމުންތަކުގެ ދެފުށް ފެންނަންޖެހޭނެ ކަމަށް އޭނާ ވިދާޅުވި އެވެ.

އީގަލް ހިލްސްއިން ތަރައްގީކުރާ ރަސްމާލެ ވޯޓާފްރަންޓް އަދި މެރީނާ މަޝްރޫއުގެ ދަށުން ބިދޭސީންނަށް އެތަނުން ގެދޮރު ގަނެގެން ވަޒަންވެރިވުމުގެ ފުރުސަތު ލިބެ އެވެ. މަތީން ފާހަގަކުރެއްވި ގޮތުގައި، ދުނިޔޭގެ އެހެން ގައުމުތަކުގައި ކާމިޔާބު ކަމާއެކު ކުރިއަށްގެންގޮސްފައިވާ ވިޔަފާރި މޮޑެލްތައް ރާއްޖެއަށް ގެންނައިރު، ރާއްޖޭގެ އަސާސީ ސިފަތަކަށް ކޮށްފާނެ އަސަރާމެދު ފުންކޮށް ވިސްނަންޖެހެ އެވެ.

ދިވެހިރާއްޖެއަކީ ހަމައެކަނި ދިވެހި ދަރިކޮޅުގެ ސުންނީ މުސްލިމް ގައުމެއްކަން ފާހަގަކުރައްވަމުން، ބިދޭސީން ގެދޮރު ގަނެގެން ދިގު މުއްދަތަކަށް ރާއްޖޭގައި ތިބެވޭ މޮޑެލް ފުޅާކޮށް ސަހަރުތައް ބިނާކުރުމުގެ މަސައްކަތް ފެށިފައިވާ ކަމަށް އޭނާ ވިދާޅުވި އެވެ. އެގޮތުން ރަސްމާލޭގެ އިތުރުން ނ. އަތޮޅާއި ތ. އަތޮޅުގައި ވެސް އެފަދަ މަޝްރޫއުތައް ކުރިއަށްދާކަން އޭނާ ފާހަގަކުރެއްވި އެވެ.

https://www.facebook.com/share/p/1atdKrAKwL/

އެތައް ހާސް ބިދޭސީންނަކަށް ރާއްޖޭގައި ދިރިއުޅެވޭނެ މަގުފަހިކުރުމަކީ ހަމައެކަނި އިގުތިސާދީ ކަމެއް ނޫން ކަމަށާއި، ތަފާތު ދީންތަކާއި ސަގާފަތްތަކުގެ މުއްސަނދި މީހުން ރާއްޖޭގައި ފައިހަރުކުރާ ވާހަކައަކީ ރައްޔިތުންނަށް ސާފުވާންޖެހޭ ކަމެއް ކަމަށް މަތީން ވިދާޅުވި އެވެ.

ރަސްމާލެ ބޭރު ބަޔަކަށް ދެނީ ކެބިނެޓްގައި ވެސް މަޝްވަރާކުރުމެއްނެތި ސިއްރިއްޔާތުގަ އެވެ.

މި އެއްބަސްވުމުގައި ސޮއިކުރި ނަމަވެސް، މިހާރު އަމަލުކުރާ ގާނޫނުތަކުގެ ދަށުން ހުއްދަ ނުލިބޭތީ، 12 ބިލިއަން ޑޮލަރުގެ މި މަޝްރޫއަށް މަގުފަހިކުރަން އާ ގާނޫނުތަކެއް ހަދަން ނިންމާފައިވާ ކަމަށް ބަންޑާރަނައިބު އަހުމަދު އުޝާމް ވަނީ ވިދާޅުވެފަ އެވެ. ސަރުކާރުން އީގަލް ހިލްސްއަށް ރަސްމާލެ ދޫކޮށްލަން އެއްބަސްވެފައިވަނީ 99 އަހަރުގެ މުއްދަތަށެވެ.