ދުނިޔޭގެ އެކި ކަންކޮޅުތަކުގައި ބޮޑު މަގުބޫލުކަމެއް ހޯދާފައިވާ "ގޭމް އޮފް ތުރޯންސް" ފްރެންޗައިޒްގެ ފުރަތަމަ ފީޗާ ފިލްމު "ގޭމް އޮފް ތުރޯންސް: އޭގޮންސް ކޮންކުއެސްޓް" ސިނަމާތަކުގައި އަޅުވާނެ ތާރީހު ވާނާ ބްރޯސްއިން އިއުލާން ކޮށްފި އެވެ.

ވާނާ ބްރޯސް އިން އިއުލާން ކޮށްފައިވާ ގޮތުގައި މި ފިލްމު ސިނަމާތަކަށް އަންނާނީ މީގެ ދެ އަހަރު ފަހުން 2029 ވަނަ އަހަރުގެ ޖޫން މަހުގެ އެއްވަނަ ދުވަހު އެވެ.

ޖޯޖް އާރް. އާރް. މާޓިންގެ މަޝްހޫރު ފޮތް "ފަޔާ އެންޑް ބްލަޑް"އަށް ބިނާކޮށް އުފައްދާ މި ފިލްމުގެ ވާހަކަ ބިނާވެފައިވަނީ "ގޭމް އޮފް ތުރޯންސް"ގެ ހާދިސާތަކުގެ 300 އަހަރު ކުރީގެ މާޒީއަށެވެ.

މިއީ "ހައުސް އޮފް ދަ ޑްރެގަން"ގެ ހާދިސާތަކުގެވެސް ގާތްގަނޑަކަށް 200 އަހަރު ކުރި އެވެ. ފިލްމުގައި ދައްކުވައިދޭނީ އޭގޮން I ތާރްގޭރިއަންއާއި އޭނާގެ ދެ އަނބިން ކަމަށްވާ ރެނިސް އާއި ވިސެނިއާ، އެމީހުންގެ ޑްރެގަން ބޭނުން ކޮށްގެން ވެސްޓެރޯސް ފަތަހަކޮށް، ތާރްގޭރިއަން ދަރިކޮޅުގެ ވެރިކަން ގާއިމުކުރި ގޮތެވެ.

މި ފިލްމު ޑައިރެކްޓްކުރަނީ "އަ ނައިޓް އޮފް ދަ ސެވަން ކިންގްޑަމްސް"ގެ އެޕިސޯޑްތަކާއި "ބްލެކް މިރާ" ޑައިރެކްޓްކުރި އޮވެން ހެރިސް އެވެ. އަދި ފިލްމުގެ ސްކްރީންޕްލޭ ލިޔެފައިވަނީ މަޝްހޫރު ސީރީޒް "ހައުސް އޮފް ކާޑްސް" އުފެއްދި އަދި "ސްޓާ ވާސް: އެންޑޯ"ގެ އެޕިސޯޑްތައް ލިޔުނު އޮސްކާ ނޮމިނޭޓެޑް ލިޔުންތެރިޔާ ބިއޯ ވިލިމޮން އެވެ.

"ގޭމް އޮފް ތުރޯންސް"ގެ ސިނަމެޓިކް ފިލްމެއް އުފެއްދުމުގެ ވާހަކަތައް 2013 ވަނަ އަހަރުން ފެށިގެން ދެކެވެމުން އައި ނަމަވެސް، މިއީ މި ފްރެންޗައިޒްގެ ފިލްމެއް ސިނަމާތަކަށް އަންނާނެކަން ރަސްމީކޮށް ކަށަވަރުވި ފުރަތަމަ ފަހަރެވެ. ނަމަވެސް، ފިލްމުން ފެންނާނެ އެކްޓަރުންގެ މައުލޫމާތު ވާނާ ބްރޯސް އިން އަދި އިއުލާނެއް ނުކުރެ އެވެ.