ރާއްޖޭގައި މިއަހަރު އަލަށް 22 މީހަކަށް އެޗްއައިވީ ޖެހިފައިވާ ކަމަށާއި، އެ ބަލި ގިނައިން ފެތުރިފައިވަނީ ރައްކާތެރި ނޫން ގޮތުގައި ޖިންސީ ގުޅުން ހިންގުމުގެ ސަބަބުން ކަމަށް ހެލްތު މިނިސްޓަރު ގީލާ އަލީ ހާމަކުރައްވައިފި އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހެލްތު މިނިސްޓަރު ވިދާޅުވީ ލޭ އަޅާ މީހުންނާއި މަސްތުވާތަކެތި ބޭނުންކުރާ މީހުންނަކީ އެޗްއައިވީގެ ނުރައްކާ ބޮޑު ބައެއް ކަމަށާއި، ބަލިމީހުންގެ ގަޔަށް ލޭ އެޅުމުގެ ކުރިން މުހިންމު ޓެސްޓުތައް ހަދައި ރައްކާތެރިކަމުގެ ފިޔަވަޅުތައް އަޅަމުންދާ ކަމަށެވެ.

ނަމަވެސް މިހާރު ރާއްޖޭގައި ބަލި ފެތުރުމުގެ އެންމެ އާންމު ސަބަބަކީ ފުރިހަމައަށް ރައްކާތެރިނުވެ ޖިންސީ ގުޅުން ބެހެއްޓުން ކަމަށް ސަރުކާރުން ފާހަގަކުރެ އެވެ.

ރާއްޖެއިން އެޗްއައިވީގެ ކޭހެއް އެންމެ ފުރަތަމަ ފެނުނީ 1991 ވަނަ އަހަރު އެވެ. އޭގެފަހުން އެ އަދަދުތައް އެވްރެޖުކޮށް އަހަރަކު ތިނަކާއި ހަޔަކާ ދެމެދުގެ މިންވަރެއްގައި ހިފެހެއްޓިފައި އޮތުމަށްފަހު، މިއަހަރު ވަނީ ރިކޯޑު މިންވަރަކަށް އެޗްއައިވީއަށް މީހުން ޕޮޒިޓިވްވެފަ އެވެ.

ސަރުކާރުން ބުނާ ގޮތުގައި މީހުން ހޭލުންތެރިކުރުމުގެ މަސައްކަތްތައް ކުރިއަށްދާނީ ބަލި ފެތުރޭ މިންވަރަށް ބަލައިގެންނެވެ.

އެޗްއައިވީގެ ކޭސްތައް މައްޗަށް ދިޔަ ނަމަވެސް، ދުނިޔޭގެ ނިސްބަތުން ދިވެހިރާއްޖެއަކީ އަދިވެސް މި ބަލި މަދުން އުޅޭ (ލޯ ޕްރިވެލެންޓް) ގައުމެއްގެ ގޮތުގައި ގީލާ ފާހަގަކުރެއްވި އެވެ. އަދި އޭގެ މާނައަކީ އާބާދީގެ 0.01 އިންސައްތައަށް އަދިވެސް އެޗްއައިވީގެ އަސަރުކޮށް، ބަލި ދެނެގަނެވިފައިވާކަން ކަމަށް ގީލާ ވިދާޅުވި އެވެ. އަދި އެޗްއައިވީއަށް ޕޮޒިޓިވްވާ މީހުންނަށް ދޭންޖެހޭ ފަރުވާތަކާއި ކައުންސެލިން ފޯރުކޮށްދިނުމުގެ މަސައްކަތް ދެމެހެއްޓެނިވި ގޮތެއްގައި ސަރުކާރުން ކުރިއަށްދާނެ ކަމުގެ ޔަގީންކަން ވަނީ ދެއްވާފަ އެވެ.