މާލޭގެ ރަސްފަންނު ސަރަހައްދުގައި ހުރި ރުށްތަކުން ހުއްދަނެތި ކުރުނބާ އެޅި ކަމުގެ ތުހުމަތުގައި ހައްޔަރުކުރި މީހެއްގެ ބަންދަށް ކްރިމިނަލް ކޯޓުން ހަތް ދުވަސް އިތުރުކޮށްފި އެވެ.

ސ. ހިތަދޫއަށް ނިސްބަތްވާ އެ މީހާ ހައްޔަރުކޮށް ކޯޓަށް ހާޒިރުކުރުމުން ނެރުނު ބަންދު އަމުރުގައިވާ ގޮތުން، އޭނާއަކީ މީގެ ކުރިންވެސް ބަންދުކޮށް އަދި ހައްޔަރުކޮށްފައިވާ ކަމުގެ ރެކޯޑް އޮތް މީހެކެވެ.

ކްރިމިނަލް ކޯޓުގައި އޮތް ބަންދު މުއްދަތު އިތުރުކުރުމުގެ މަޖިލީހުގައި އުމުރުން 57 އަހަރުގެ އެ މީހާ ބުނެފައިވަނީ ރަސްފަންނުގައި ހުންނަ ރުށްތަކުން ކުރުނބާ އެޅުމަކީ މަނާ ކަމެއްކަން އޭނާއަށް އެނގިފައި ނުވާ ކަމަށެވެ.

ގާޒީ މުޒައްމިލް ނާސިރު ނެރުއްވި އަމުރުގައި ވަނީ ވައްކަމުގެ ތުހުމަތުކޮށް ހައްޔަރުކުރި އެ މީހާ ބަންދުގައި ބަހައްޓަންޖެހެނީ އޭނާ ބަންދުން ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެތީ ކަމަށެވެ.

އޭނާ އެ ކުށް ކުރި ކަމަށް ކޮންމެވެސް ވަރެއްގެ ހެކި ހުރި ކަމަށާއި، އެ ހާދިސާއާ ގުޅޭ ރިޕޯޓެއް ފުލުހުން ކޯޓަށް ހުށަހަޅާފައިވާކަންވެސް ކޯޓު އަމުރުގައި ފާހަގަކޮށްފައިވެ އެވެ. ނަމަވެސް އެ މީހާ ރަސްފަންނުގެ ރުށްތަކުން އެޅީ ކިތައް ކުރުނބާ ކަމެއް ކޯޓުން އާންމުކުރި މައުލޫމާތަކުން އެނގޭކަށް ނެތެވެ.