އީރާނާއެކު ސުލްހަވެރި އެއްބަސްވުމަކަށް ދާނީތޯ ނުވަތަ އެ ގައުމަށް ވަރުގަދަ އަސްކަރީ ހަމަލާއެއްދީ "ގޮއްވާލާނީތޯ" އެމެރިކާއިން ވަރަށް އަވަހަށް ގޮތެއް ނިންމަންޖެހޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިފަދައިން ވިދާޅުވީ ވައިޓް ހައުސްގެ އޯވަލް އޮފީހުގައި ބުދަ ދުވަހު ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުންނެވެ. އީރާނުގެ އިސް އޮފިޝަލުންނަކީ މޮޔައިންގެ ގޮތުގައި ސިފަކުރައްވަމުން، އެ ފަރާތްތަކާ އެކު ކުރިއަށްދާނީ ކޮން ގޮތަކަށްތޯ ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ޓްރަމްޕް ވިދާޅުވީ، ފަހަރެއްގައި އެ ގައުމު ގޮއްވާލަން ޖެހިދާނެ ކަމަށެވެ. އަދި އެމެރިކާއިން މިހާރު ޖެހިފައިވަނީ އެއްބަސްވުމަކަށް ދިއުމާ ނުވަތަ ހަމަލާދިނުމާ ދެމެދު ގޮތެއް ކަނޑައަޅަން ކަމަށާއި، އެކަމަށް އޮތް ވަގުތު ކުޑަތަންވަމުންދާތީ ވަރަށް އަވަހަށް ކޮންމެވެސް އެއް ގޮތަކަށް މި މައްސަލަ ނިމިގެންދާނެ ކަމަށް ވެސް ޓްރަމްޕް ވިދާޅުވި އެވެ.

ޓްރަމްޕް މިފަދަ ހަރުކަށި އިންޒާރެއް ދެއްވާފައި މިވަނީ، އިނގިރޭސިވިލާތުގައި ހުންނަ އެމެރިކާގެ އަސްކަރީ މަރުކަޒެއް ކަމަށްވާ އާރްއޭއެފް ފެއާފޯޑަށް ދޭން އުޅުނު ކަމަށް ބެލެވޭ ޓެރަރިސްޓް ހަމަލާއެއްގެ ފަހަތުގައި އީރާނުގެ އަތެއް ވޭތޯ އެމެރިކާގެ ކަމާބެހޭ އިދާރާތަކުން ތަހުގީގު ކުރަމުންދާ ދަނޑިވަޅެއްގަ އެވެ. ރައީސް ޓްރަމްޕް ވިދާޅުވީ އެ މައްސަލަ އެމަނިކުފާނު ވަރަށް ގާތުން ބައްލަވަމުން ގެންދަވާ ކަމަށެވެ.

ނަމަވެސް، މި ތުހުމަތުތައް ދޮގުކުރައްވަމުން އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވީ، އިނގިރޭސިވިލާތުގައި ހުރި އެމެރިކާގެ މަރުކަޒަށް ދޭން އުޅުނު ކަމަށް ބުނާ ހަމަލާއާ އީރާނާ އެއްވެސް ގުޅުމެއް ނެތް ކަމަށެވެ.

ދެ ގައުމުގެ ދެމެދުގައި ހިނގަމުންދާ ހަތް މަސް ދުވަހުގެ ހަމަނުޖެހުންތައް ހުއްޓުމަކަށް ގެނައުމަށްޓަކައި ނުސީދާ މަޝްވަރާތަކެއް ކުރެވެމުންދާއިރު، ހަތް ދުވަހުގެ މުއްދަތަކަށް ހަމަލާތައް މެދުކަނޑާލުމަށް އީރާނުން ހުށަހެޅި ހުށަހެޅުމަށް ޓްރަމްޕް ދެކޮޅު ހައްދަވާފައިވާ ކަމަށް އީރާނުގެ ދައުލަތުގެ މީޑިއާއިން ވަނީ ބުދަ ދުވަހު ހާމަކޮށްފަ އެވެ.