އެއް މަސްދުވަހަށްވުރެ ގިނަ ދުވަހުގެ ޗުއްޓީއަކަށްފަހު، ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ފުރަތަމަ ޖަލްސާ ކުށްކޮށްގެން ހޯދާ މުދަލާ ބެހޭ ބިލުގެ މަސައްކަތާއެކު ހޯމަ ދުވަހު ފެށުމަށް ތާވަލުކޮށްފި އެވެ.

މަޖިލީހުގެ އެންމެ ފަހުން ޖަލްސާއެއް ބާއްވާފައި ވަނީ މިދިޔަ އޮގަސްޓް މަހުގެ 26 ވަނަ ދުވަހު އެވެ.

ހޯމަ ދުވަހުގެ ޖަލްސާގެ އެޖެންޑާގައިވާ ގޮތުން، ކުށްކޮށްގެން ހޯދާ މުދަލާ ބެހޭ ބިލުގެ އިބްތިދާއީ ބަހުސް ކުރިއަށްދާނެ އެވެ.

މަޖިލީހުގެ ގަވާއިދުގައިވާ ގޮތުން އަހަރުގެ ފަހު ދައުރު އޮކްޓޯބަރު މަހު ފެށިގެން ނޮވެމްބަރު މަހުގެ ނިޔަލަށް ކުރިއަށްދާނެ އެވެ. މީގެ ތެރެއިން ފެށޭ ދައުރުގެ އެންމެ މައިގަނޑު މަސައްކަތަކަށް ވާނީ އަންނަ އަހަރަށް ލަފާކޮށް ސަރުކާރުން ހުށަހަޅާ ދައުލަތުގެ ބަޖެޓަށް ބަހުސްކުރުމާއި، ބަޖެޓު ދިރާސާކޮށް ފާސްކުރުމުގެ މަސައްކަތެވެ.

މަޖިލީހުގެ އިދާރާގެ ތަފާސްހިސާބުތަކުން ދައްކާގޮތުގައި، މި އަހަރުގެ ދެވަނަ ދައުރު ދެ ފަހަރެއްގެ މަތިން ދަންމާލި ނަމަވެސް، ހުށަހެޅުނު މަސައްކަތްތަކުގެ ދެބައިކުޅަ އެއްބައިވެސް ނުނިމެ އެވެ. އެ ދައުރުގައި 28 ޖަލްސާއެއް ބާއްވައި 57 ގަޑިއިރު ހޭދަކޮށްފައިވާއިރު، ކޮމިޓީތަކުން 138 ބައްދަލުވުމެއް ބާއްވައި 63 ގަޑިއިރު ހޭދަކޮށްފައިވެ އެވެ. މީގެއިތުރުން ފުރަތަމަ ދައުރުގައި ނުނިމުނު 94 މަސައްކަތުގެ އިތުރުން ދެވަނަ ދައުރުގައި 120 މަސައްކަތެއް އިތުރަށް ހުށަހެޅުނެވެ.