މިއަދު ދިވެހިން ބޭނުންވަނީ އަވަސް އަދި ލުއިގޮތެކެވެ. ކަންމަތީ ފިހާރައިން ލިބެން ހުންނަ އައިޓަމެއް އޮންލައިންކޮށް މީހުން ގަންނަނީ ގެއިން ބޭރަށް ނުކުންނަން ބޭނުން ނުވާތީ ކަމަށް ބެލެވެ އެވެ. ވީމާ ޚިދުމަތްދޭ ގިނަ ފަރާތްތަކުގެ އެންމެ އިސްވާޖިބެއްގެ ގޮތުގައި މިއަދު ދެކެނީ ޚިދުމަތް ލިބިގަންނަ ފަރާތްތައް އަރާމުގައި ބައިތިއްބައިގެން، ވީހާވެސް ފަސޭހަ ޚިދުމަތެއް ފޯރުކޮށް ދެވޭނެ މަގެކެވެ. މީހުން ރިތިކޮށްދޭ މި ޒުވާނާގެ ވިސްނުމަކީ ވެސް ކްލަޔަންޓް ހުރި ތަނަކަށް ގޮސް ރީތި ނުވަތަ މޭކަޕް ކޮށްދިނުމެވެ.
ކުޑަ އާބާދީއެއް ހިމެނޭ ށ. ފޯކައިދޫ އަށް އުފަން އެ ރަށު، ނޫހިރި، ފާތުމަތު އަރީޝާ (އަރީ) އެންމެ ކުޑައިރުން ފެށިގެން ވެސް މޭކްޕް ކުރުމަށް ޝައުގުވެރިވެ އެވެ. ފޯކައިދޫ ސްކޫލުން ތައުލީމު ހާސިލްކުރުމަށް ފަހު އޭނާ ބޭނުންވީ ރަށު މީހުންނަށް ކޮންމެ ވެސް ގޮތަކުން ފައިދާހުރި މުހިންމު ހިދުމަތެއް ދިނުމަށެވެ. އެ ވަގުތު އޭނާގެ ހިތުގައި އޮތީ ދެކަމެކެވެ. އެއީ ކޭކު އެޅުމާއި މޭކަޕް ކުރުމެވެ.
މޭކަޕް ކުރުމަށް އަބަދު ވެސް ޝައުގުވެރިކަން ހުރުމުން ޔޫޓިއުބް ވީޑިއޯ ބަލައިގެން އޭނާ އަމިއްލައަށް އެކަން ދަސްކުރި އެވެ. އަދި ހަމަ އެ ދުވަސްވަރު ރަށުގައި ހިންގި ކޭކު ކޯހެއްގައި ބައިވެރިވެ ކޭކު އަޅަން ވެސް ދަސްކުރި އެވެ. ދެ ހިދުމަތް އެއްފަހަރާ ދިނުމަށް އޭނާ ވަރަށް ފުރިހަމައަށް ތައްޔާރުވި އެވެ.
"އަޅުގަނޑު ވަރަށް ކުޑައިރު ވެސް އެކި ކަހަލަ އާޓަށް ވަރަށް ޝައުގުވެރިވޭ. ކްރިއޭޓިވް ކަންތައް ވަރަށް ކުރާހިތްވޭ. އެގޮތުން މޭކަޕް ކުރުމަށް ވެސް ވަރަށް ޝައުގުވެރިވެ ދަސްކުރާ ހިތްވި. މީހަކު ކިޔާފާނެ އެއްޗެއްކަށް ނުވިސްނާ، ނެގެޓިވް އެއް ވެސް ވާހަކައެއް އަޑުނޭހުމަކީ އަޅުގަނޑަށް މިއަދު މި ހިސާބަށް އާދެވިފައި ހުރި ސަބަބު ކަމުގައި ބުނެވިދާނެ. މަސައްކަތެއް ފުރަތަމަ ފަށާއިރު، ގިނަ މަސައްކަތް ނުލިބުނު ނަމަވެސް އެކަމެއް ހުއްޓާ ނުލާ ކުރާނަމަ، ކުރިއަށް ދާނެ،" ދުވަހަކު ވެސް ސެލޫނެއްގައި މަސައްކަތް ކޮށްފައިނުވާ އަރީ ވާހަކަ ފެށީ މި މަސައްކަތަށް އަލަށް ނުކުންނަން ބޭނުންވާ ކުއްޖަކަށް ވެސް އިބުރަތްތެރި ބަސްކޮޅެއް ދޫކޮށްލަމުންނެވެ.
މޭކަޕް ކުރަން އަމިއްލައަށް ދަސްކޮށްފައި ފުރަތަމަ ވެސް އޭނާ ކުރީ އޭނާގެ އަމިއްލަ "ބްރައިޑަލް" މޭކަޕެވެ. އަމިއްލަ އަލަތު ކައިވެނި ޕާޓީއަށް މޭކަޕް ކޮށްލައިގެން ނުކުތުމުން ޕާޓީއަށް އައިސް ތިބި މެހެމާނުންނަށް ލިބުނީ ކުއްލި ހައިރާން ކަމެކެވެ. އެއީ އަރީގެ މޭކަޕްގެ ފެންވަރު ރަނގަޅު ވުމުންނެވެ. އިސާހިތަކު ރަށު ތެރޭގައި އަރީ ކޮށްފައިވާ މޭކަޕް ރީތިވެގެން އެ ވާހަކަ ރަށު ތެރޭގައި ދެކެވެން ފެށުނެވެ. އެއަށްފަހު ރަށުގެ އެކި ޚާއްސަ ދުވަސް ދުވަހު މޭކްޕަ ކުރުމަށް އަރީ ގެންދަން ފެށި އެވެ.
ކޭކުއެޅުން
"ކޭކުގެ މަސައްކަތް ފެށުމަށް ރަށުގައި ކޭކު ކޯހެއް ފުރަތަމަ ހެދީ. އެއަށްފަހު ކޭކްގެ މަސައްކަތް ވެސް ވަރަށް ބޮޑަށް ކުރިން. ވެޑިންކޭކް، ބާތުޑޭ ކޭކް ފަދަ ތަފާތު ވައްތަރުގެ ތަފާތު ސައިޒުގެ ކޭކް ވެސް އެޅިން،" ކޮވިޑްގެ ކުރިން ކޭކުގެ މަސައްކަތް ވަރަށް ފުޅާދާއިރާއެއްގައި ކުރި އަރީ ބުންޏެވެ.
ގޭގެއަށް ގޮސް މޭކަޕް ކޮށްދިނުން: މުޅިން އާ ހިދުމަތެއް ފެށުން
ފޯކައިދޫގައި މޭކަޕްކުރާ އެހެން މީހެއް ނެތުމުން، އޭނާގެ މަސައްކަތަށް އޮންނަ ޑިމާންޑް ބޮޑެވެ. ކޭކު އޯޑާތަކާއި، މޭކަޕް އެޕޮއިންޓްމަންޓްތައް ގިނަ އެވެ. މަސައްކަތް ލިބުމުގައި ދަތިކަމެއް ނެތުމުން މަސައްކަތް ޕްރޮމޯޓް ކުރާ ޕޭޖެއް ހެދުމަކީ މުހިންމު ކަމެއް ކަމުގައި އޭރު އޭނާ ނުދެކެ އެވެ.
"އޭރު ޕޭޖެއް ނެތަސް މަސައްކަތް ފުދޭ ވަރަކަށް ލިބޭ. ދެން މޭކަޕް ސާމާނު ހޯދަނީ ރަށުން. ރަށުން ނުލިބޭ ނަމަ މާލޭގައި އުޅޭ ފެމެލީ ކުދިން ކައިރީގައި ބުނެގެން މާލޭން ރަށަށް ގެންދަނީ. ދެން އަބަދު ވެސް ބަލަން ރަނގަޅު ޕްރޮޑަކްޓްސް ބޭނުން ކުރުމަށް،" ބްރައިޑަލް އިވެންޓެއްގައި މޭކްޕް ކުރުމުގެ ފުރުސަތަކަށް ބަލަބަލާ ހުރި، އަދި އައިރާ ބިއުޓީ ޑޮޓްއެމްވީ ޕޭޖްގެ ހިންގާ އަރީ ބުންޏެވެ.
ފޯކައިދޫގައި މޭކަޕް ކޮށްދޭން ދަނީ އެކަމަށް އެދި މެސެޖް ކުރުމުން ނުވަތަ ގުޅުމުންނެވެ. އަރީ ގޭގެއަށް ގޮސް މޭކަޕް ކޮށްދޭން ނިންމީ، އެއީ ގިނަ މީހުން ބޭނުންވާ ގޮތް ކަމުގައި ވީތީ އެވެ. ފަހުން މާލެއަށް ބަދަލުވެފައި އޭނާ ބޭނުންވީ ރަށުގައި މަސައްކަތް ކުރިގޮތަށް މާލޭގައި ވެސް މޭކަޕް ކޮށްދިނުމުގެ ޚިދުމަތް ދޭން ގޭގެއަށް ދިއުމަށެވެ. ދޮރުން ދޮރަށެވެ.
"މާލޭގައި އެކަން ފެށުނު ގޮތަކީ، މާލެ އައި ފަހުން ރަށު ކުއްޖެއްގެ ވެޑިންއެއް އޮވެއްޖެނަމަ، އަޅުގަނޑަށް މެސެޖް ކުރަން ފެށީ މޭކަޕް ކޮށްދޭން ދާން. އެ ހިސާބުން ހިތަށް އެރީ މާލޭގައި މި މަސައްކަތް ފަށާނީއޭ. އެހެން ހިތަށް އަރާފައި ޕޭޖެއް ހެދީ. ދެން ބޭނުންވާ އެއްޗެހި މަޑުމަޑުން ހޯދަން ފެށީ. މިހާރު މާލޭގެ އެކި ގޭގެއަށް މޭކަޕް ޚިދުމަތް ދެން،" މުސްތަގުބަލުގައި ސެލޫނެއް ހުޅުވައިގެން މޭކަޕް ކުރުމުގެ މަސައްކަތް ކުރުމަށް އުންމީދު ކުރާ އަރީ ބުންޏެވެ.
ތަފާތު އެކި ވައްތަރުގެ ހެދުން ފަހަން ވެސް އެހާމެ މޮޅު
ސްކޫލް ނިންމާފައި މާލޭގައި ހުރި ދުވަސް ވަރެއްގައި ފަހާ ކޯހެއް ވެސް އޭނާ ފުރިހަމަ ކޮށްފައިވެ އެވެ. ވީމާ ފެހުމަކީ ވެސް އޭނާގެ ހުނަރުތަކު ލިސްޓަށް އެމުނުނު އިތުރު ބޮޅެކެވެ. މިއަދު އަރީއަކީ "ހޯމް ވިޒިޓް" ކޮށްގެން މޭކަޕްގެ ރީތި އަވަސް ޚިދުމަތްދޭ ކުޅަދާނަ މޭކަޕް އާޓިސްޓެއްގެ އިތުރުން ޕާޓީ ހެދުން ފަރުމާކުރާ އަދި ފަހައިދޭ މޮޅު ފެހުންތެރިއެކެވެ. ރަނގަޅު އާމްދަނީއެއް ލިބޭ މި މަސައްކަތުގައި ހުރި އެންމެ ބޮޑު ހިތްހަމަޖެހުމަކީ، އަންހެން ބޭފުޅުންގެ ރީތި ހެދުންތައް ފަހައިދީ އަދި މޭކަޕް ކޮށްދިނުމުން އެ މީހުންނަށް ލިބޭ "ކޮންފިޑެންސް" ކަމުގައި އަރީ ބުންޏެވެ.
"އެއް ފަހަރު މޭކަޕް ކުރުމުން ދެވަނަ ފަހަރު ވެސް އަޅުގަނޑުގެ ފަރާތުން މޭކަޕް ޚިދުމަށް ބޭނުންވެގެން ގުޅީމަ ވަރަށް އުފާވޭ. އެހެން ވެއްޖެނަމަ އަޅުގަނޑު ދެކެނީ ކްލައަންޓް ހިތްހަމަޖެހޭ ފެންވަރެއްގެ މަސައްކަތެއް އަޅުގަނޑަށް ކޮށްދެވުނު ކަމަށް،" އަރީ ބުންޏެވެ.
ގޭގެއަށް ޒިޔާރަތް ކޮށްގެން މޭކްޕްގެ ޚިދުމަތް ދޭއިރު ދިމާވާ ބައެއް ދަތި އުނދަގޫ ކަންކަން ވެސް އޭނާ ހިއްސާކޮއްލި އެވެ. އޭގެ ތެރޭގައި ގިނަ އެޕޮއިންޓްމަންޓް ލިބިފައި ހުންނައިރު ހުރިހާ ގެއަކަށް އެއްފަހަރާ އެއް ވަގުތެއްގައި ދާންޖެހުމާއި އަދި އެއް ފެމިލީއެއްގެ އެންމެން އެއްފަހަރާ، އެއްގަޑިއަކަށް މޭކަޕް ކުރަން ޖެހުމެވެ. އެފަދަ ވަގުތުތަކުގައި ވަރަށް ވިސްނުންތެރި ކަމާއެކު ދުރާލާ ތައްޔާރު ވުމާއި ވަރުބަލި ނުވާނޭހެން ކަންކަން ރާވާލާ ކަމަށް އެނާބުންޏެވެ.
އަރީ އަކީ އެކަނިވެރި މައެކެވެ. މޭކަޕްގެ މަސައްކުރަމުން ދަރިފުޅުގެ ކަންކަން ކުރުމުގައި އޭނާގެ އާއިލާގެ ފަރާތުން ވަރަށް ބޮޑަށް އެހީތެރިކަން ލިބޭ ކަމަށް އޭނާ ބުންޏެވެ.
