"ހުރިހާ"ގެ ނަމުގައި މިއަދު އަލަށް ފެށި ނޫހުގެ ކިޔުންތެރިންނަށް ވަރަށް ބޮޑަށް މަރުހަބާ އެވެ.

މި ނޫހަކީ ރާއްޖެ އާއި ބޭރުގެ މުހިއްމު ޚަބަރުތައް ތާޒާކަމާއެކު އަދި ތަފުސީލާއެކު ހަފުތާގެ ކޮންމެ ދުވަހަކު 24ގަޑިއިރު ގެނެސްދޭ ނޫހަކަށް ވެގެންދާނެ އެވެ. މީގެ ތެރޭގައި ރާއްޖޭގައި ހިނގާ މުހިންމު ހާދިސާތަކުގެ ހަބަރާއި މުނިފޫހި ފިލުވުމާއި ލައިފް ސްޓައިލް، ކާޓޫން، ވާހަކަ ފަދަ ކިޔުންތެރިން ޝައުގުވެރިވާނެ ލިޔުންތައް ކޮންމެ ދުވަހަކު ގެނެސްދިނުމަށް އަޅުގަނޑުމެންގެ ޓީމުން މަސައްކަތްކުރާނެ އެވެ.

އަޅުގަނޑުމެން މަސައްކަތްކުރާނީ ވަކި ފަރާތަކަށް ނުޖެހި، ނޫސްވެރިކަމުގެ ހަމަތަކާއި އުސޫލްތަކާ އެއްގޮތްވާ ގޮތުގެމަތިން ރާއްޖޭގެ އިޖުތިމާއީ ފޭރާން ހެޔޮވަރުކޮށް، އާއްމުންގެ މައުލޫމާތު މުއްސަނދިވާނެ ފަދަ ޚަބަރާއި މައުލޫމާތު ފެތުރުމަށެވެ.

މީގެ އިތުރުން އާއްމުންނަށް ކޮންމެހެން ބޭނުންވާ ތަފާތު އެކި ދާއިރާތަކުން ތަޖުރިބާކާރުންގެ ކޮލަމްތައް ވެސް އަޅުގަނޑުމެން ގެނެސްދޭނަމެވެ. މިގޮތުން ދީނީ، ސިއްހީ އަދި އިގްތިސާދީ ރޮނގުން ތަފާތު ލިޔުންތައް ވެސް ކިއުންތެރިންނާ ހަމަޔަށް ގެނެސްދިނުމަށް އަޅުގަނޑުމެން މަސައްކަތްކުރާނަމެވެ.

އަޅުގަނޑުމެންގެ ކުރިއެރުމަކަށް ވާނީ ތިޔަ ބޭފުޅުން ދެއްވާ ބިނާކުރަނިވި ޚިޔާލާއި ފާޑުކިއުމެވެ. އެކަމަށް އަޅުގަނޑުމެން އަބަދުވެސް މަރުހަބާ ކިޔާނަމެވެ.

އެޑިޓަރުގެ ނޯޓް: އެޑިޓަރު: އަބްދުﷲ ޖަމީލު