ތޫނު އެއްޗަކުން ހަމަލާދީ މަރާލި އިބްރާހިމް އާގިލްގެ މަރުގެ މައްސަލައިގެ އަޑުއެހުން ކެންސަލްކޮށްފި އެވެ.

އެމްއެމްއޭގެ ކުރިމަތިން ތޫނު އެއްޗަކުން ހަމަލާދީ މަރާލާފައި ވަނީ ގދ. ފަރެސްމާތޮޑާ، ކޮކާ، އަށް ނިސްބަތްވާ އުމުރުން 18 އަހަރުގެ އިބްރާހިމް އާގިލް އެވެ. އަދި މިއަދު ހެނދުނު 9 ގައި އަޑުއެހުން ބޭއްވުމަށް ކްރިމިނަލް ކޯޓުން ތާވަލްކޮށްފައިވެ އެވެ.

މި އަޑުއެހުން ކެންސަލްކުރީ މައްސަލައިގައި ވަކާލާތުކުރާ ދިފާއީ ވަކީލު އެހެން މައްސަލައެއް އެގަޑީގައި ކުރިއަށް ގެންދިއުމަށް ހަމަޖެހިފައިވާތީ، އެ އަޑުއެހުން ކެންސަލް ކޮށްދިނުމަށް ކްރިމިނަލް ކޯޓަށް އެދުމުންނެވެ.

އޮގަސްޓް 31، 2018 ވަނަ ދުވަހު ތޫނު އެއްޗަކުން ހަމަލާދީ މި ޒުވާނާ މަރާލާފައިވާއިރު، އޭނާ މަރުވީ އޭޑީކޭ ހޮސްޕިޓަލުގައި ފަރުވާދެމުން ގެންދަނިކޮށް އެރޭގެ އިރާކޮޅުގެ ވަގުތެއްގަ އެވެ.

އެ މައްސަލައިގައި ދައުލަތުން ދައުވާއުފުލީ، ހަމްދޫން ހަމްޒަތަށާއި، އަލީ މިޖުވާދު މާލިކު އިބްރާހިމްގެ އިތުރުން އިބްރާހީމް ވިޝާމްގެ މައްޗަށެވެ.