މާފުށީ ޖަލަށް އެއްޗެތިތަކެއް ވަގަށް ވައްދަން އުޅުނު މީހަކު ޖަލާ ދިމާލު ފަޅު ތެރެއަށް ގެނބިގެން މަރުވެއްޖެ އެވެ.

އެނގިފައިވާ ގޮތުގައި ރޭގެ ވަގުތެއްގައި މި ހާދިސާ ހިނގީ މާފުށި ޖަލާއި ދިމާލުން ތޮށިގަނޑު މައްޗަށް ފަތާފައި އަރާ މަންޒަރު މާފުށި ޖަލުގެ ސެކިއުރިޓީންނަށް ފެނުމުން އޭނާ އަމިއްލައަށް މޫދަށް ފުންމާލުމުން ކަމަށްވެ އެވެ.

މި މައްސަލައާ ގުޅިގެން ފުލުހުން ބުނީ، މާފުށި ޖަލާ ދިމާލުން ފަޅުތެރެއަށް މީހަކު ގެނބިފައިވާ ކަމަށް ރޭ 2:22 ގައި ރިޕޯޓުކޮށްފައިވާ ކަމަށެވެ. އަދި އެ މީހާ މޫދުން ނަގައިގެން ހެލްތު ސެންޓަރަށް ގެންދިޔައިރު ވެސް މަރުވެފައިވާ ކަމަށް ހެލްތު ސެންޓަރުން މައުލޫމާތުދިން ކަމަށް ފުލުހުން ބުނެފައިވެ އެވެ.

ފުލުހުން ބުނީ މި ހާދިސާގައި މަރުވީ އުމުރުން 33 އަހަރުގެ ދިވެހި ފިރިހެނެއް ކަމަށެވެ. އަދި މިކަމާ ގުޅިގެން ބަލަންޖެހޭ ކަންކަން ފުލުހުން ބަލަމުން ގެންދާނެ ކަމަށް ވެސް ފުލުހުން ބުނެފައިވެ އެވެ.

މާފުށީ ޖަލުގައި ތިބޭ ކުށްވެރިންނަށް ފޯނާއި ޑްރަގް އަދި އެ ނޫން ވެސް އެކި ތަކެތި ވަގަށް ވެއްދުމުގެ މައްސަލަ ވަރަށް ބޮޑުވެފައިވެ އެވެ.